Unsa na bay Nahitabo sa Batang si Peter?

SINULAT SA KORESPONSAL SA PAGMATA! SA ECUADOR

ANG Agosto 22, 1970, nga Awake! naundan ug usa ka artikulong “Operasyon sa Kasingkasing nga Walay Pag-abono sa Dugo.” Gibatbat niini ang sugilanon sa kinabuhi sa usa ka siyete-anyos nga Canadianong batang lalaki nga ginganlag Peter, kinsa nagkinahanglag makaluwas-ug-kinabuhing operasyon sa 1963.

Ang pangunang mananambal ni Peter miingon nga adunay pamaagi nga mabatonan nga makaayo sa iyang depektosong balbula sa kasingkasing. Apan sa dihang gidala sa mga ginikanan ni Peter ang ilang anak ngadto sa usa ka espesyalista ug nangutana kon ang operasyon mahimong himoon nga walay dugo, ang doktor mitubag: “Dili. Imposible gayod kana. Ako nahibalo sa akong gisulti.”

Kay wala mahigawad, ang mga ginikanan ni Peter padayon sa ilang pagpangita ug ngadtongadto nakakaplag ug siruhano nga andam mohimo sa operasyon nga dili mogamit ug dugo. Unsay resulta niini? Bisan pag si Peter nakalabang-buhi sa operasyon, ang iyang mga ginikanan gisultihan nga panahon lang ang makasulti kon unsa ka malamposon ang pamaagi. Busa, unsa na bay nahitabo sa batang si Peter?

Sa dihang si Peter 13-anyos, siya ug ang iyang pamilya mibalhin sa Ecuador, Amerika del Sur, sa pag-alagad diin mas dako ang panginahanglan sa mga magsasangyaw sa maayong balita sa Gingharian sa Diyos. (Mateo 24:14) Si Peter nabawtismohan sa edad 15 ug nahimong usa ka regular payunir (bug-os-panahong ebanghelisador) sa edad 18. Sa edad 26 siya nahimong usa ka espesyal payunir, nga nag-alagad diha sa usa ka balangay nga nahimutang sa 3,000 metros ibabaw sa lebel sa dagat sa Andes. Niadtong 1988, sa edad 31, si Peter duyog sa iyang asawa, si Isabel, misugod sa pag-alagad ingong usa ka nagapanawng hawas sa Watch Tower Society. Siya nagpadayon gihapon niini nga katungdanan karon, nga nagaduaw sa lainlaing kongregasyon matag semana aron dasigon sila.

Sa pagkamatuod, si Peter nagkinabuhi sa usa ka aktibo kaayong kinabuhi, nga wala na magkinahanglan ug dugang operasyon. Pagkamapasalamaton niya ug sa linibong ubang mga Saksi tungod sa kooperasyon sa hanas nga mga siruhano nga mitahod sa mga katungod sa ilang mga pasyente!

[Hulagway sa panid 23]

Si Peter sa edad siyete, wala madugay human sa operasyon

[Hulagway sa panid 23]

Si Peter ug Isabel Johnston karon