Usa ka Ihalas nga Mutya

SA UGA NGA MGA DESYERTO sa Aprika, diin nihit ang ulan, motubo ang usa ka mutya​—ang rosas sa desyerto. Maanindot nga pagkaporma, nga may nalubag nga mga sanga, kining dugaong kahoykahoy hinayng motubo ug gikaingong mabuhig gatosan ka tuig. Ang burot nga punoan sa kahoykahoy ug mga gamot niini nagsilbing pondohanan sa tubig, nga magpaarang niini nga molambo diha sa mamala, umaw nga palibot.

Ang gatasong duga, mga gamot, ug mga liso niining dugaon nga tanom adunay makamatay nga hilo. Ang pinuga gikan sa mga liso gigamit sa pagbutang ug hilo diha sa mga tumoy sa mga pana, ug iitsa sa lokal nga mga mangingisda ang mga sanga niini ngadto sa tubig aron malanag ang isda ug sayon sikopon. Dugang pa, ang mga magbalantay sa hayop mogamit sa mga bahin sa tanom sa paghimog hilo nga mopatay sa mga libon ug kuto diha sa ilang mga kamelyo ug baka. Katingad-anan, bisan pa sa makamatay nga kinaiya sa kahoykahoy, ang ihalas nga mga mananap mokaon sa mga dahon niini nga dili madaot.

Apan ngano man nga ang makahilong rosas sa desyerto matawag nga mutya? Naputos sa mga pungpong sa maanindot nga kabulakan, ang rosas sa desyerto maoy talagsaon, uban sa hayag nga mga kolor gikan sa sanag nga pughawng pula ngadto sa lutong pula. Sa dihang ang yuta mamala ug abohon, kining maanindot nga ihalas nga mutya magpatunghag nagkalidadis nga kabulakan nga mogilak kon mahayagan sa adlaw.

Ang maong kahibulongang katahom sa desyerto maoy usa ka pahinumdom lamang sa panahon sa dihang “ang kamingawan ug ang mamala nga rehiyon magsadya, ug ang desyertong kapatagan magakalipay ug mamulak.” (Isaias 35:1) Kining makapalipay nga saad matinuod gayod ilalom sa umaabot nga pagmando sa Gingharian sa Diyos. Nianang panahona ang tibuok yuta “magsadya,” dili lamang mahimong usa ka matahom nga paraiso kondili usa usab ka malinawong dapit alang sa tanang tawo.​—Salmo 37:​11, 29; Isaias 35:​6, 7.

[Picture Credit Line sa panid 31]

© Mary Ann McDonald