Gikan sa Among mga Magbabasa

Mga Dula nga Magsundog ug Karakter Di pa dugay nga miabot ang akong bag-ong kompiyuter. Buot ko nga magdula lang ug pipila ka dula apan misangko sa pagdulag halos 16 ka oras nga walay hunong! Sa dihang akong naamgohan kon unsay nahitabo, dihadiha kong gipala ang tanang dula diha sa akong kompiyuter. Ugaling, sa ulahi misugod ko sa pagbati nga tingali sobra ra pod ang akong gihimo. Apan sa mao rang semanaha, miabot ang inyong artikulo nga “Mga Batan-on Nangutana . . . Aduna bay Kapeligrohan sa mga Dula nga Magsundog ug Karakter?” (Agosto 22, 1999) Nakaamgo ko kon unsay gihimo sa maong mga dula kanako. Nagpasalamat ko kang Jehova sa pagbukas sa akong mga mata niini nga kapeligrohan.

L. H., Brazil

Adunay dula sa baraha nga nauso kaayo sa Hapon. Daghan sa baraha ang dunay satanikong mga ngalan, pananglitan, “Kortina sa Itom nga Yawa.” Nalinga ko kaayo sa dula nga ang akong espirituwalidad halos nadaot. Sa kataposan nakaplagan sa akong inahan ang mga baraha ug gipanglabay kini. Mibati gihapon ko ug kawili sa mga baraha. Apan human mabasa kining artikuloha, kana nga kawili nawala. Nakatabang kaayo nako ang artikulo.

K. N., Hapon

Walay-Dugo nga Pagpanambal Ang akong edad 11 anyos, ug ang artikulong “Gikinahanglan ba Gayod ang mga Pag-abonog Dugo?” espesyal para nako. (Agosto 22, 1999) Ang akong igsoong babaye makaduha gioperahan sa kasingkasing. Ang akong mga ginikanan mihangyo nga himoon kini nga dili mogamit ug dugo. Abi nako ug mamatay siya, pero tulo na ka tuig ang milabay, ug maayo ra ang iyang kahimtang!

C. S., Tinipong Bansa

Sayop nga Kabayo! Nalingaw gayod ako sa artikulong “Tabo sa Oktubre​—‘Internasyonal nga Tabo sa Kabayo sa Uropa.’” (Marso 22, 1999) Apan natingala ako sa pagkakita sa hulagway sa skewbald cob nga ginganlan ug “piebald cob.”

S. P., Habagatang Aprika

Ang among magbabasa may kahibalo gayod bahin sa mga kabayo! Sumala sa British Skewbald and Piebald Association, ang piebald cob aduna lamay itom ug puti nga mga kolor​—dili sama sa skewbald nga gipakita diha sa among hulagway. Among gikasubo ang maong wala-tuyoang sayop.​—ED.

Mga Gene Desisayis anyos ako, ug interesado kaayo ko sa biolohiya sa molekula. Ang seryeng “Pagbadbad sa Misteryo sa Imong mga ‘Gene’” (Septiyembre 8, 1999) balanse kaayo ang pagkapatin-aw. Nakabasa ko ug libro nga bug-os nga nagsaysay sa mga misteryo sa DNA. Sa dako kong katingala, gikobrehan sa inyong artikulo kanang tanang impormasyon apan sa mas masabtan ug maapresyar nga mga termino.

S. R., Pransiya

Tungod sa mga artikulo, nakakuha ko ug taas nga marka sa akong pasulit sa biolohiya. Ang inyong pagbatbat sa mga nucleic acid ug kon sa unsang paagi kini may kalabotan sa mapanunod nga mga kinaiya maoy yano kaayo ug bug-os!

D.A.N., Brazil

Ako usa ka magtutudlo sa primarya nga tunghaan, ug dugay na kong naghunahuna kon unsaon nako pagtabang sa akong mga estudyante nga makasabot sa komposisyon sa lawas sa tawo. Akong nakaplagan ang impormasyon niining mga artikuloha nga yano ra aron masabtan sa akong mga estudyante, bisan tuod naglakip kini ug daghang lisod nga siyentipikanhong mga termino. Ang Pagmata! naghimo niini nga sayon kaayong sabton.

K. M., Lesotho

Kahadlok sa Paglupad Salamat! Sa Lunes maoy unang higayon nga mosakay akog ayroplano, ug nakuyawan gayod ako niini. Tingali ang pangunang hinungdan mao nga dili nako masabtan kon sa unsang paagi ang usa ka dako kaayong makina daw dili mahulog bisan sa grabidad. Busa nalipay ko sa pagkakita sa artikulong “Unsay Gikinahanglan Aron Padayon Kining Maglupad?” (Septiyembre 8, 1999) Ang pagkahibalo nga ang mga kompaniya sa ayroplano naghimo sa maong mga pag-atiman aron maseguro nga hilwas ang ilang mga ayroplano​—mag-X-ray pa gani niini​—nakatabang nako nga dili kaayo makuyawan sa paglupad. Busa bisan pa sa akong kahadlok, akong tipigan kining artikuloha, ug mosakay gayod ako nianang maong ayroplano!

T. T., Tinipong Bansa