Unsay Kahulogan Niining Tanan?

KON analisahon nimo ang moral nga mga sukdanan sa di pa dugayng katuigan, makita nimo ang tin-awng kiling. Sa walay duhaduha, ang moral nga mga sukdanan nag-anam ka daot taliwala sa nagkadaghang katawhan. Unsay tinuod nga kahulogan niining tanan?

Nagpasabot ba kini, sama sa giangkon sa ubang mga tawo, nga ang atong tibuok nga sibilisasyon ug ang tanang tawo dunay mangiob nga palaaboton, nga hapit nang malaglag? O ang mao bang mga kausaban bahin lamang sa naandang proseso sa pag-us-os ug pag-uswag sa kasaysayan?

Ang ulahing gihisgotan mao ang gihunahuna sa daghang tawo. Ilang gilantaw ang pagkahugno sa moral sa atong panahon ingong usa lamang ka kiling, usa sa daghang kausaban latas sa kasaysayan. Nagdahom gayod sila nga ang kasagarang kiling ngadtongadto mausab ug nga ang mas taas nga moral nga mga sukdanan mobalik. Husto ba sila?

Ang “Kataposang mga Adlaw”

Tagdon nato ang mga kamatuoran sa panglantaw sa basahon nga sulod sa kasiglohan kaylap nga gidawat nga awtoridad bahin sa moral nga mga isyu​—ang Pulong sa Diyos, ang Bibliya. Makapalamdag ang pagtandi sa kalibotan karon nianang sa matagnaong kahubitan nga gihatag sa Bibliya bahin sa labing mahukmanong panahon sa tawhanong kasaysayan. Mao kini ang yugto sa panahon nga gitawag ug “kataposang mga adlaw” o “katiklopan sa sistema sa mga butang.” (2 Timoteo 3:​1; Mateo 24:3) Sumala sa gipakita niini nga mga pahayag, kining maong panahon maoy magtimaan sa tinong kataposan sa usa ka yugto ug sinugdanan sa usa ka bag-ong yugto.

Ang Pulong sa Diyos nagtagna nga ang kataposang mga adlaw timan-an sa “makuyaw nga mga panahong lisod sagubangon.” Aron matabangan ang mabinantayong mga maniniid sa pag-ila sa kataposang mga adlaw, ang Bibliya naghatag ug ubay-ubayng detalye nga sa tingob maghatag ug tin-awng kahubitan, o daghag-bahin nga ilhanan, niining talagsaong yugto sa panahon.

Ngil-ad nga mga Taras sa mga Tawo

Matikdi ang usa sa mga bahin niini nga ilhanan nga dayag karon: ‘Ang mga tawo managbaton ug dagway sa diyosnong pagkamahinalaron apan nagapanghimakak sa gahom niini.’ (2 Timoteo 3:​2, 5) Walay laing yugto sa kasaysayan ang gitiman-an sa ingon ka gamhanan ug bug-os nga sekularisasyon. Ang Diyos kaylap nga gisalikway ingong bugtong awtoridad, ug kadaghanang tawo dili modawat sa Bibliya ingong bugtong tuboran sa kamatuoran. Siyempre, naglungtad gihapon ang mga relihiyon, apan daghan ang wala kaayoy impluwensiya. Sila pantalya lamang.

Ang Bibliya naghisgot sa laing bahin sa ilhanan: “Ang mga tawo . . . walay pagpugong-sa-kaugalingon, mabangis,” ug “tungod sa pag-uswag sa kalapasan mobugnaw ang gugma sa kadaghanan.” (2 Timoteo 3:​2, 3; Mateo 24:12) Ang Gregong pulong nga gihubad ug “mabangis” nagpasabot, lakip sa ubang mga butang, ug “kakulang sa tawhanong simpatiya ug pagbati.” Karon ang mga bata pa kaayo nagpakita nga sila “mabangis” ug nanaghimog nagkaanam ka pintas nga mga krimen.

Dugang pa, ang tulin nga teknikal ug ekonomikanhong mga kaugmaran, ug ang kadalo nga miduyog niini, nagpahinabo sa nagkadaghang tawo nga isalikway ang karaang mga prinsipyo. Nga walay paghunahuna sa uban, gamiton nila ang bisan unsang mga paagi, bisan ang dili matinud-anong mga paagi, aron daghan silag mahakop kutob sa maarangan sa pagtagbaw sa ilang hakog nga mga tinguha. Ang dakong pag-uswag sa pagpanugal maoy laing pamatuod sa  kahakog, ug ang gidaghanon sa krimen sa miaging pipila ka dekada maoy lig-on ug tin-awng pamatuod niini.

Usa ka bahin nga ilabinang kaylap sa atong panahon mao kini: “Ang mga tawo . . . mga mahigugmaon sa kalipayan inay nga mga mahigugmaon sa Diyos.” (2 Timoteo 3:​2, 4) Usa ka pananglitan niini mao nga ang mga tawo buot ug unodnong kalipay, apan dili nila gusto ang responsibilidad nga magkinabuhi uban sa usa ka kapikas sa kaminyoon sa tibuok kinabuhi. Ang resulta mao ang hilabihan ka daghang nangabungkag nga mga relasyon sa pamilya, dili-malipayon ug dili-suod sa pamilya nga mga anak, nag-inusarang mga ginikanan, ug mga sakit nga gipasa sa pakigsekso.

Ang laing bahin sa ilhanan mao nga “ang mga tawo unya maoy mahigugmaon sa kaugalingon, mga mahigugmaon sa salapi.” (2 Timoteo 3:2) Sumala sa Alemang magasin nga Die Zeit, “ang nagpalihok sa sistema [sa ekonomiya karon] mao ang kahakog.” Labi pa sukad masukad, ang pagpanapi mao ang labing hinungdanong butang sa kinabuhi sa daghang tawo. Niining hakog nga pangagpas, wala panumbalinga ang ubang mga prinsipyo.

Mga Hitabo sa Kalibotan

Gawas pa sa paghubit sa pagkahugno sa mga prinsipyo sa tawo, ang Bibliya nagtagna usab nga ang kataposang mga adlaw timan-an sa talagsaon kaayong mga kasamok nga mag-apektar sa tawhanong pamilya. Kini nag-ingon, pananglitan, nga ang “nasod motindog batok nasod, ug gingharian batok gingharian; ug aduna unyay dagkong mga linog, ug sa usa ka dapit human sa lain mga kamatay ug mga kakulag pagkaon.”​—Lucas 21:​10, 11.

Gawas sa ika-20ng siglo, walay laing yugto sa kasaysayan sa dihang daghan kaayong tawo ang naapektahan sa daghan kaayong makatay-og sa kalibotan nga mga katalagman sulod sa usa ka limitadong yugto sa panahon. Pananglitan, kapin sa 100 ka milyong tawo ang gipamatay sa mga gubat nianang panahona, gidaghanon nga  pilopilo ang labaw kay sa gidaghanon sa nangamatay sa gubat sa ubay-ubayng kasiglohan kanhi nga tingbon. Ang ika-20ng siglo dunay duha ka gubat nga lahi kaayo sa bisan unsa nga kini gitawag ug mga gubat sa kalibotan. Ang tibuok-yutang mga pag-awayay nga sama niini wala gayod mahitabo kaniadto.

Usa ka Daotang Nagatukmod nga Puwersa

Ang Bibliya nagpadayag usab sa paglungtad sa usa ka gamhanan, daotang espiritung linalang, “ang usa nga gitawag ug Yawa ug Satanas,” nga ang tuyo mao ang pagpatalikod sa mga tawo sa tinuod nga mga prinsipyo ug pagyudyod kanila ngadto sa moral nga kadunotan. Kini nag-ingon nga sulod sa kataposang mga adlaw, siya manaog sa yuta, “nga may dakong kasuko, kay nahibalo nga siya may mubo nga yugto sa panahon.”​—Pinadayag 12:​9, 12.

Ang Yawa gihubit sa Bibliya ingong “magmamando sa awtoridad sa hangin, ang espiritu nga nagalihok karon diha sa mga anak sa pagkadili-masinugtanon.” (Efeso 2:2) Nagpakita kini nga ang Yawa dunay gamhanang impluwensiya sa daghang tawo, nga kasagaran wala sila makamatikod niini, sama ra nga kita usahay wala makamatikod sa dili-makitang hugaw diha sa hangin.

Pananglitan, ang impluwensiya ni Satanas makita diha sa daghang modernong mga paagi sa komunikasyon: mga video, pelikula, telebisyon, Internet, panganunsiyo, libro, magasin, ug mantalaan. Daghang materyal, ilabina kanang gitumong sa wala magbantay nga mga batan-on, napuno sa naghinobra ug ngil-ad nga mga kiling, sama sa rasismo, okultismo, imoralidad, ug sadistikong kapintasan.

Daghang sinserong mga tawo ang nahingangha sa kasamahan sa gihubit sa Bibliya sa kataposang mga adlaw ug sa aktuwal nga mga kahimtang sa kalibotan sa atong adlaw. Tinuod, dihay pipila ka hitabo sa kasaysayan una pa sa ika-20ng siglo nga sa gamayng mga paagi morag mohaom sa kahubitan sa Bibliya. Apan sulod lamang sa ika-20ng siglo, ug karon sa ika-21ng siglo, nga makita ang tanang bahin sa ilhanan.

Ang Moabotay nga Bag-ong Yugto

Nasayop kadtong nagtuo nga ang katawhan pagalaglagon maingon man kadtong nag-ingon nga ang mga butang magpadayon sa gihapon. Hinunoa, ang Bibliya tin-awng nagpakita nga ang presenteng katilingban sa kalibotan nga nagmando sa yuta pulihan sa usa ka bag-o gayod nga pagmando.

Human hisgoti ni Jesus ang ubay-ubayng mga bahin sa ilhanan sa kataposang mga adlaw, siya miingon: “Niining paagiha kamo usab, inigkakita ninyo niining mga butanga nga magakahitabo, hibaloi nga ang gingharian sa Diyos duol na.” (Lucas 21:31) Ang langitnong Gingharian sa Diyos mao ang pangunang tema sa pagsangyaw ni Jesus. (Mateo 6:​9, 10) Ug gitudlo siya sa Diyos nga mahimong Hari niini nga Gingharian, usa ka kagamhanan nga sa dili madugay magmando sa tibuok yuta.​—Lucas 8:​1; Pinadayag 11:​15; 20:​1-6.

Sa pagkatapos sa kataposang mga adlaw, ang langitnong Gingharian sa Diyos sa mga kamot ni Kristo magpapha niadtong tanang kaaway niini​—ang Yawa ug kadtong nagpaluyo kaniya​—ug pulihan ang imoral nga katilingban karon ug matarong nga bag-ong kalibotan. (Daniel 2:44) Niining bag-ong kalibotan, ang matul-id-ug-kasingkasing nga katawhan makatagamtam ug walay-kataposang kinabuhi sa yuta nga nahimong usa ka paraiso.​—Lucas 23:​43; 2 Pedro 3:​13; Pinadayag 21:​3, 4.

Kadtong nasilag sa pagkahugno sa moral karon ug nakasabot nga ang daghag-bahin nga ilhanan sa kataposang mga adlaw natuman diha sa presenteng mga hitabo makalaom sa usa ka maanindot nga umaabot. Niini pasalamatan nato ang Labing Gamhanan nga Diyos, kinsa nagatagad kanatong mga tawo ug dunay mahimayaong katuyoan alang sa iyang linalang, ang yuta.​—Salmo 37:​10, 11, 29; 1 Pedro 5:​6, 7.

Ang mga Saksi ni Jehova nag-awhag kanimo sa pagkat-on ug dugang bahin sa atong mahigugmaong Maglalalang ug sa paglaom nga mabuhi diha sa hinlo sa moral nga kalibotan, nga iyang gitagana alang sa tanang nagapangita nga katawhan. Sumala sa giingon sa Bibliya, “kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

[Hulagway sa panid 10]

Ang matul-id-ug-kasingkasing nga mga tawo makatagamtam ug walay-kataposang kinabuhi diha sa usa ka paraisong yuta