Kristohanong Gugma Kontra sa Usa ka Bolkan

SINULAT SA KORESPONSAL SA PAGMATA! SA CAMEROON

USA ka higante ang kusog kaayong mibuto sa miaging tuig sa nasod sa Cameroon sa Kasadpang Aprika. Ang Mount Cameroon maoy usa ka bolkan nga may gihabogong 4,070 metros ibabaw sa lebel sa dagat. Kini nga pagbuto​—ang ikalima na sa bukid sulod sa ika-20 nga siglo​—gikataho nga mao ang kinakusgan ug kinagrabehan hangtod karon.

Ang katalagman unang nahitabo sa Sabado sa hapon, Marso 27, 1999. Ang mga nakasaksi diha sa lungsod sa Buea, nga nahimutang sa tiilan sa bukid, mitaho nga ang mga bungbong, balay, ug bisan mga kahoy kusog kaayong miuyog. Pagkasunod gabii, mga alas otso imedya, nahitabo ang kinakusgan, kinagrabehang pagtay-og sa rehiyon. Nabatyagan kini sa gilay-ong 70 kilometros sa Douala. Ang ulohang balita sa Le Messager sa Martes, Marso 30, 1999, nag-ingon: “Pagbuto sa Mount Cameroon​—250,000 ka Tawo Miatubang sa Kalayo.” Kini mipadayon: “Mikurog ang yuta ug 50 ka beses sa duha ka adlaw; 4 na ka baba sa bolkan ang mitungha; ginatos ka balay ang nangaguba; ang palasyo sa presidente sa Buea natumpag.”

Duolan sa 80 ka Saksi ni Jehova ang nagpuyo sa Buea. Daghang balay ang nangaguba pag-ayo nga dili na maayo, lakip ang usa nga gigamit ingong Kingdom Hall. Apan, walay namatay.

Kristohanong Gugma nga Nagalihok

Dihadihang milihok ang Kristohanong gugma aron mahatagag solusyon ang kagun-oban nga gipahinabo niining nasuko kaayo nga higante. Gitudlo ang usa ka komite sa hinabang, ang Nagamandong Lawas sa mga Saksi ni Jehova naghimog kahikayan aron sa pagtaganag gikinahanglan kaayong salapi, ug ginatos ka Saksi ang naghimo dayon ug mahigugmaong pagsakripisyo sa ilang panahon, kusog, ug kuwarta.

Ang mga kongregasyon sa mga Saksi ni Jehova nagpadalag mga suplay sa pagkaon. Usa ka Saksi midonar ug 1,000 ka haloblak. Ang lain mihikay aron mapalit ang aluminum nga pang-atop sa baratong presyo. Diha pay lain nga milakaw ug 16 kilometros aron makakuhag linaras nga kahoy. Usa ka batan-ong lalaki nga nagtigom ug kuwarta aron makabayad ug bugay ngadto sa iyang mga uganganon mioktaba sa iyang kasal ug migamit sa kuwarta aron ipaayo ang iyang chain saw. Miadto siya sa lasang, diin sulod sa tulo ka semana nagputol siyag igong gidaghanon sa kahoy nga makatukod ug usa ka enterong balay! Ang kusgan nga batan-ong Kristohanong mga igsoong lalaki milukdo sa linaras ngadto sa usa ka dapit nga lima ka kilometro ang gilay-on, diin kini gikarga sa usa ka trak.

Ang pagpanukod-pag-usab misugod sa Abril 24 sa dihang 60 ka boluntaryo ang nagtigom diha sa dapit nga nahitaboan  sa katalagman. Sa misunod nga mga hinapos sa semana, ang gidaghanon miuswag sa kinatas-ang ihap nga 200. Tulo ka Saksi nga may bug-os-panahong trabaho ang miadto pagkatapos sa ilang regular nga adlaw sa trabaho ug namanday hangtod sa lapas sa tungang gabii. Usa ka Saksi nga taga-Douala ang nagtrabaho diha sa iyang sekular nga trabaho sa tibuok buntag; dayon mobiyahe siyag 70 kilometros sa iyang motorsiklo ug motrabaho hangtod sa tungang gabii una mopauli. Unom ka balay ang nahuman nga wala pay duha ka bulan. Sa kasamtangan, ang Kongregasyon sa Buea nagpadayon sa paghimog mga tigom diha sa usa ka pribadong puy-anan, bisan tuod ang tumatambong sa tigom halos doble sa gidaghanon sa mga membro sa kongregasyon.

Nianang mao gihapong panahon, ang komite sa hinabang nag-apod-apod ug kapin sa 40,000 ka tabletas aron sa paglunsay sa nahugawang tubig ug nagpaospital sa mga napulo ka tawo nga nag-antos gumikan sa mga sakit sa respiratoryo nga resulta sa makahilong gas ug abo sa bolkan. Unsay reaksiyon niadtong nakasaksi niining Kristohanong gugma?

Kristohanong Gugma Milabaw

Human makita ang usa sa mga balay nga gitukod sa mga igsoon, usa ka tawo gikan sa Provincial Delegation of Agriculture miingon: “Ang balay maoy usa ka dakong pamatuod mismo . . . , usa ka timailhan sa gugma.” Usa ka magtutudlo mikomento: “Wala gayod ako makakita ug ingon niana sa akong kinabuhi. . . . Usa gayod kini ka ilhanan sa matuod nga Kristiyanidad.”

Kadtong personal nga nakapahimulos daghan usab ug ikasulti. Si Timothy, 65 anyos ug masakiton, misulat: “Matag higayon nga motan-aw kami sa among bag-ong balay, manglugmaw ang mga luha sa kalipay sa among mga mata. Nagsige mi ug pasalamat kang Jehova tungod sa iyang nabuhat alang kanamo.” Usa ka babayeng balo nga dili usa sa mga Saksi ni Jehova naglisod pag-ayo uban sa iyang upat ka anak sa dihang nalumpag ang ilang balay. Unya, kadtong gisuholan sa pagtabang kaniya mikawat sa iyang materyales nga pang-atop. Gitabangan siya sa mga boluntaryong Saksi. Siya miingon: “Di ko kahibalo kon unsaon pagpasalamat. Ang akong kasingkasing napuno sa kalipay.” Si Elizabeth, nga asawa sa usa ka Kristohanong ansiyano, miingon: “Malipayon ako nga dunay gugma sa organisasyon ni Jehova. Nagpakita kini nga nag-alagad kita sa buhi nga Diyos.”

Kusog kaayo ang pagbuto sa bolkan, apan wala kini makapalong sa Kristohanong gugma niini nga panag-igsoonay. Sumala pa sa gidasig kang apostol Pablo nga isulat, “ang gugma dili gayod mapakyas.”​—1 Corinto 13:8.

[Mga hulagway sa panid 16]

Mga suba sa natunaw nga laba nagpahinabog dakong kadaot

[Hulagway sa panid 17]

Mga boluntaryo naghago aron ayohon ang nangaguba nga mga balay

[Hulagway sa panid 16, 17]

Mount Cameroon