Mahiusa ba ang Kalibotan?

SA DILI pa dugayng katuigan milyonmilyong tawo sa Sidlakang Uropa ug bisan diin ang nag-antos sa mga sangpotanan sa makapabahinbahin nga gubat. Apan, bisan nagpadayon kanang pintas nga mga panag-away, libolibong tawo diha niining nadaot-sa-gubat nga mga nasod ang nakaugmad ug nakahupot ug tinuod nga panaghiusa sa ilang taliwala. Matikdi kining pipila ka pananglitan.

Sa 1991 ang internasyonal nga panon nga duolag 15,000 nagtigom sa Zagreb, Croatia. Usa ka polis nga didto sa maong lugar nadasig sa pag-ingon: “Maayong ipakita sa palaumagian sa balita kon unsay nagakahitabo dinhi sa estadyum, dinhi mismo, diin atong makita ang mga Serbiano, Croatiano, Sloveniano, Montenegrino, ug uban pa nga nanglingkod tupad sa usag usa nga makigdaiton.” Unsay nakaingon niadtong talagsaong panaghiusa?

Sa 1993 ang usa ka mas dakong internasyonal nga kombensiyon, nga may temang “Balaang Pagtulon-an,” gihimo sa Kiev, ang kaulohan sa Ukraine. Dihay kinatas-ang ihap sa nanambong nga duolag 65,000. Ang atubangang panid sa Evening Kiev nagtaho: “Ang mga Saksi ni Jehova . . . nahiusa dili lamang pinaagi sa asul nga mga badge nga may nasulat nga ‘Balaang Pagtulon-an’ kondili pinaagi sa tinuod nga pagtuo.”

Balaang Pagtulon-an​—Puwersa sa Panaghiusa

Nahibulong ka ba kon nganong ang mga Saksi ni Jehova nagtagamtam sa panaghiusa samtang ang pagkabahinbahin kaylap sa ilang palibot? Ang Polakong Propesor nga si Wojciech Modzelewski nagpaila sa rason pinaagi sa pagsulti bahin sa mga Saksi: “Ang pangunang hinungdan sa ilang makigdaitong tinamdan mao ang presenteng  determinasyon sa pagsunod sa mga prinsipyo nga gipadayag diha sa Bibliya.” Sa pagkatinuod, ang mga Saksi nahiusa sa tibuok kalibotan pinaagi sa balaang pagtulon-an bahin sa Maglalalang, si Jehova nga Diyos. Unsa kanang pagtulon-ana?

Gitumong ni Jesu-Kristo ang hinungdanong prinsipyo nga nakapahiusa sa dihang siya miingon bahin sa iyang mga sumusunod: “Sila dili bahin sa kalibotan, maingon nga ako dili bahin sa kalibotan.” Oo, ang kahimtang sa pagkaneyutral nga gibarogan sa mga Saksi ni Jehova sa bisan diin nakapahiusa kanila. Uyon kini sa mga pulong ni Jesus sa dihang siya miampo: “Ako nagahangyo . . . aron nga silang tanan mahimong usa, maingon nga ikaw, Amahan, nahiusa kanako ug ako nahiusa kanimo, nga sila usab mahiusa kanato.”​—Juan 17:​16-21.

Kini nga baroganan sa pagkaneyutral maoy puwersa sa panaghiusa kay kini nagpalihok sa mga Saksi sa tanang bahin sa kalibotan sa pagkinabuhi sumala sa gisulti ni manalagnang Isaias mahitungod sa tanan kinsa “tudloan [sa Diyos] . . . bahin sa iyang mga dalan.” Miingon si Isaias nga kini sila “magasalsal sa ilang mga espada ingong mga punta sa daro ug sa ilang mga bangkaw ingong mga galab.” Nagpadayon ang manalagna: “Usa ka nasod dili mobakyaw sa espada batok sa usa ka nasod, ni sila makakat-on pa sa gubat.”​—Isaias 2:​2-4.

Ang panaghiusa ug pakigdait nga makita diha sa mga kombensiyon sa mga Saksi ni Jehova sa Sidlakang Uropa sa miaging dekada nag-ilustrar nga ang tagna ni Isaias natuman na sa gamayng sukod. Sa Uropa ug bisan diin, ang mga Saksi sa mahulagwayong paagi nagsalsal na sa ilang mga espada ingong mga punta sa daro ug sa ilang mga bangkaw ingong mga galab. Ingong resulta, ilang natagamtam ang kalinaw ug panaghiusa karon niining nagkabahinbahin nga kalibotan. Dili ikatingalang ang editoryal sa usa ka mantalaan kas-a miingon: “Kon ang tibuok kalibotan magkinabuhi sumala sa pagtulon-an [sa Bibliya] sa mga Saksi [ni Jehova] matapos unta ang pag-ula ug dugo ug pagdumot, ug ang gugma maoy maghari”! Maingon ba niana ang kahimtang?

Kon sa Unsang Paagi Modangat ang Tibuok-Kalibotang Panaghiusa

Aron modangat ang panaghiusa sa tibuok yuta, labaw pa ang  gikinahanglan kay sa usa ka gamayng grupo lamang sa maayog-tuyong mga tawo. May panginahanglan usab sa usa ka kagamhanan nga may gahom sa pagkuto sa impluwensiya niadtong kinsa mobatok sa panaghiusa ug pakigdait. Sa pagkatinuod, gitudloan ni Jesus ang iyang mga sumusunod nga mag-ampo sa ingon gayod nianang matanga sa kagamhanan: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:10) Oo, gipakita ni Jesus nga ang kagamhanan lamang sa Diyos, “ang gingharian sa mga langit,” ang makasulbad sa mga suliran sa kalibotan​—lakip na ang suliran sa pagkabahinbahin.​—Mateo 4:17.

Si Jesu-Kristo mao ang Hari niining langitnong Gingharian. Ilalom sa iyang pagmando ang mga tawo sa yuta makasinati sa wala pa mahitabo sukad nga panahon sa pakigdait ug panaghiusa. Kining tibuok-kalibotang panaghiusa dili modangat ingong sangpotanan sa hinimog-tawong ekonomikanhong mga reporma. Ang usa ka kagamhanan sa kalibotan diha sa mga kamot sa “Prinsipe sa Pakigdait” mao lamang ang makahimo sa maong butang.​—Isaias 9:​6, 7.

Ang mga inhustisya karon, nga sagad gipahinabo sa kakabos ug pag-abusar sa gahom, dili tugotan sa Prinsipe sa Pakigdait. Nagsaad ang Bibliya: “Manghapa kaniya ang tanang hari; ang tanang kanasoran, sa ilang bahin, manag-alagad kaniya. Kay iyang pagaluwason ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang. Gikan sa pagpanglupig ug sa kapintasan iyang tubson ang ilang kalag . . . Daghan na unyay mga lugas sa ibabaw sa yuta; sa tumoy sa kabukiran adunay pagsugwak.”​—Salmo 72:​11, 12, 14, 16.

Ang pagkaway-trabaho usab mao na unyay butang sa nangagi ilalom sa pagmando ni Kristo. Matod sa manalagnang si Isaias: “Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang kaugalingong mga kamot.” (Isaias 65:22) Hunahunaa ra, ang tanan sa yuta makahimog mapuslanon, makapatagbaw nga buluhaton!

Tinuod nga Panaghiusa​—Kanus-a?

Apan kanus-a magsugod ang pagmando ni Kristo ibabaw sa yuta? Sa pagtubag sa maong pangutana, gitumong ni Jesu-Kristo ang panahon nga mailhan pinaagig mga gubat, mga taho sa gubat, mga sakit, mga linog, ug uban pang mga hitabo. Apan, gitumong usab niya ang usa ka positibong bahin​—ang tibuok-kalibotang pagsangyaw sa maayong balita sa Gingharian sa Diyos. (Mateo 24:​3-14; Lucas 21:11) Kining mga hitaboa, matod ni Jesus, matapos sa “dakong kasakitan” nga maoy magpatungha sa bug-os nga kausaban sa pagmando sa yuta. (Mateo 24:21) Basaha ang iyang pakigpulong nga natala sa Mateo kapitulo 24 ug Lucas kapitulo 21. Itandi ang mga kahimtang nga iyang gitagna sa kon unsay imong makita sa kalibotan. Tin-aw nimong makita nga kita karon nagkinabuhi sa panahong hapit nang mosalga ang Diyos sa hinimog-tawong pagmando. Ang iyang Gingharian, uban kang Jesu-Kristo ingong Hari, mopuli sa pagmando. Duol na ang usa ka nahiusang kalibotan!

Nagpabilin ang pangutana, Unsay angay nimong buhaton aron makita ang katumanan niining saara? Sanglit ang Bibliya nagdulag hinungdanong papel sa mga palaaboton sa mga tawo sa umaabot, maalamon nga maningkamot aron mahibalo ug dugang pa sa Bibliya. Busa, malipay ang mga Saksi ni Jehova nga moduaw sa imong balay aron sa pagdumala ug libreng pagtuon sa Bibliya uban kanimo. * Kon dawaton nimo kining maong tanyag, sa dili madugay imong masabtan nga ang panaghiusa sa kalibotan dali rang makab-ot ug nga ikaw usab makaambit niana!

[Footnote]

 [Mga hulagway sa panid 8, 9]

Sa tibuok kalibotan, ang mga Saksi ni Jehova nagpahimulos ug talagsaong panaghiusa

Kiev, Ukraine

Zagreb, Croatia

[Hulagway sa panid 10]

Katuyoan sa Diyos nga ang mga tawo mahimong usa ka nahiusa, tibuok-yutang pamilya