“Usa ka Realistikanhon ug Praktikal nga Giyang-Basahon”

SA MIAGING ting-init ang Arkansas Democrat Gazette nagrepaso sa ubay-ubayng mga basahon nga gipatik sa Watch Tower Bible and Tract Society. Mahitungod sa usa niana, kini nag-ingon: “Ang Mga Pangutanang Gisukna sa mga Batan-on maoy usa ka realistikanhon ug praktikal nga giyang-basahon alang sa mga pamilya, walay sapayan sa ilang gianibang relihiyon. . . .

“Kining basahona nagtanyag sa mga magbabasa ug maayo kaayong moral ug emosyonal nga tambag. Pananglitan, ang mga awtor nakasabot nga ang tanang batan-on nagtinguhag kagawasan gikan sa ginikananong pagdili, apan naghatag kini sa mosunod nga tambag sa mga batan-on:

“‘Gusto ba nimo ang dugang kagawasan ug responsabilidad? Nan pamatud-i nga ikaw kasaligan. Isipang seryoso ang bisan unsang mga buluhaton nga ihatag kanimo sa imong mga ginikanan.’

“Pipila lang ka ginikanan ang dili magpabili sa usa ka basahon nga kanunayng nagtudlo sa pagtulon-an sa personal nga pagka-may-tulubagon ug padayong nagtambag sa mga batan-on nga magmatinahuron sa ilang kaugalingon ug sa uban. Bisan kon ang basahon kanunayng nagtaganag pamatuod sa Bibliya sa mga tambag niini, kini sa dakong sukod gipasukad sa praktikal nga kaalam ug panghukom. . . . Ang seksiyon bahin sa pagtamod-sa-kaugalingon ilabinang makapahingangha, sanglit daghang batan-on ang nalimbongan sa paghunahuna nga ang walay-pugong nga pagdayeg-sa-kaugalingon maoy mapuslanon.”

Human sa pagkutlo gikan sa basahon, ang artikulo mipadayon: “Kining malumong mga pahinumdom nga ang pagpasiatab sa kaugalingon maoy usa ka matang sa garbo ug nga ang pagkamapainubsanon maoy pundasyon sa Kristohanong kinabuhi maoy lagmit nga mosumpo sa pipila sa walay-hinungdang popular nga sikolohiya nga gisilsil diha sa mga batan-on pinaagig maayog-tuyo nga mga higala ug mga magtatambag.”

Kon buot nimong makabenepisyo sa impormasyon diha sa Mga Pangutanang Gisukna sa mga Batan-on​—Mga Tubag nga Mosaler, ikaw makadawat ug usa ka kopya pinaagi sa pagpil-ap ug pagpadala sa nag-ubang kupon ngadto sa adres nga gipakita sa kupon o sa nahiangayng adres nga nalista sa panid 5 niining magasina.

□ Padalhi ako ug kopya sa librong Mga Pangutanang Gisukna sa mga Batan-on​—Mga Tubag nga Mosaler.

□ Palihog kontaka ako mahitungod sa libreng pagtuon sa Bibliya sa balay.