Gikan sa Among mga Magbabasa

Pagpili ug Kapikas sa Kaminyoon Salamat sa amahanong pagtagad nga inyong gipakita kanamong mga batan-on diha sa artikulong “Ang Hunahuna sa Bibliya: Kon Unsaon Pagpili ug Kapikas sa Kaminyoon.” (Oktubre 8, 1999) Ang kawalay-kasinatian magpahinabo sa daghang batan-on nga magdalidali pagminyo, nga nasaypan ang binatang-gugma ingong tinuod nga gugma. Mas gusto ko pang mag-inusara kay sa makigminyo sa usa ka tawo nga dili nako igkauyon.

S.R.M., Brazil

Ako 40 anyos na ug wala pa gayod maminyo. Ako nag-ampo kang Jehova matag adlaw bahin sa pagpangitag kapikas, ug akong gipaningkamotan pag-ayo nga maugmad ang mga hiyas nga gikinahanglan sa pagpalampos sa kaminyoon. Makapadasig kaayo ang pagbasa sa mga sugyot bahin sa pagpangitag lig-on sa espirituwal nga tawo, usa kinsa sama kanakog mga tumong ug naningkamot sa pag-ugmad sa mga bunga sa espiritu sa Diyos. Daghan kaayong salamat sa pagpalig-on sa akong determinasyon nga magpadayon sa paghulat kang Jehova.

E. F., Tinipong Bansa

Mga Sayaw Sulod sa daghang tuig, gikan sa akong balkon akong namatikdan ang Uropanhong mga sayaw nga nanaghimog mga salag. Mangabot kini sa Mayo ug mawagtang dihadiha sa Agosto. Tungod sa artikulong “Sayaw​—Tulin nga Molupad” (Oktubre 8, 1999), daghan na akog nahibaloan karon bahin niining makalingaw nga mga linalang.

A. D., Alemanya

Sugilanon sa Kinabuhi Ako usa ka bug-os-panahong ebanghelisador sulod sa kapin sa usa ka dekada na karon ug sagad naaghat pag-ayo sa pagpasalamat kaninyo tungod sa inyong maayo-kaayong pagkasulat nga mga artikulo. Ang labing makahuloganon para kanako mao ang talagsaong mga eksperyensiya sa mga misyonaryo. Gitinguha ko kanunay nga mahimong usa kanila. Ang mga eksperyensiya sama niadtong kang Willem ug Gré van Seijl (“Ang Katinuoran Milabaw pa sa Akong mga Pagdahom,” Oktubre 8, 1999) mitabang kanako nga mamentinar ang akong tinguha sa pag-alagad sa usa ka langyaw nga nasod.

P. K., Tinipong Bansa

Sa panahon nga akong gibasa ang artikulo, ako naguol pag-ayo. Usahay bation ko nga dili gayod nako makab-ot ang akong espirituwal nga mga tumong. Nalisdan usab ako sa pagmentinar ug usa ka positibong tinamdan sa akong trabaho ingong usa ka bug-os-panahong ebanghelisador. Si Willem ug Gré dihay maayo, masanagong panglantaw bisan pa sa mga kababagan, ug si Jehova nagpanalangin sa ilang mga paningkamot. Nagpalig-on kana sa akong pagsalig nga ako usab makakab-ot sa akong mga tumong kon akong huptang lig-on ang akong pagtuo.

K. C., Tinipong Bansa

Pagkamahigalaon Salamat kaayo sa artikulong “Mga Batan-on Nangutana . . . Nganong Dili Ko Makaarang sa Pagkahimong Mas Mahigalaon?” (Oktubre 22, 1999) Ako 17 anyos, ug ang artikulo halos nagpahunahuna kanako nga kini gisulat gayod alang kanako. Gipahayag gayod niini ang akong gibati. Sagad kong madunggan nga may moingong ako mapahitas-on. Apan ang kamatuoran nga ang usa mas hilomon kay ni bisan kinsa dili katarongan nga sayop nga hukman kanang tawhana.

R. R., Alemanya

Usa ka grabeng sakit nga akong naagoman sa bata pa nagpabati kanako nga nahilain sa uban. Kining artikuloha mitabang kanako sa pagdawat ug pagdumala sa akong pagbati ug sa pagpangitag paagi sa pagbuntog sa kahimtang. Akong paningkamotan ang pagpakighigala diha sa akong kongregasyon.

J.F.F., Brazil

Sayop nga Gidaghanon! Ako kanunayng malingaw sa inyong mga artikulo ug sa naandang pagkatukma niini. Apan, diha sa “Pagpaniid sa Kalibotan,” ang ulohang “Nabuang sa Sakyanan” (Septiyembre 8, 1999) miingon: “Gibanabana nga mga 40 ka milyong behikulo ang nagdagan sa pagkakaron sa Tinipong Bansa.” Ang aktuwal nga gidaghanon mas daghan pa kaayo niana.

R. K., Tinipong Bansa

Gikasubo namo kini nga sayop. Sa wala-tuyoa among nakutlo ang sayop nga estadistika. Sa pagkakaron, kapin sa 130 ka milyong sakyanan ang narehistro sa Tinipong Bansa.​—ED.