“Mamatay Gyod Ka!”

SUMALA SA GIASOY NI LEANNE KARLINSKY

Ang akong pagpangita sa kinamaayohang mabatonang pagtambal nga walay dugo sa Espanya

KON puwede kang mobiyahe bisan asa sa kalibotan, asa man ka gustong moadto? Alang kanako yano ra ang tubag. Ako nagtudlog Kinatsila sa tunghaan, ug duyog sa akong bana, si Jay, ug sa akong anak nga si Joel, ako nagtambongan sa nagsultig-Kinatsila nga kongregasyon sa mga Saksi ni Jehova sa Galax, Virginia, T.B.A. Nan, ang akong pangandoy mao ang pagbiyahe ngadto sa Espanya. Busa mahanduraw nimo ang kadako sa akong kalipay sa dihang ang akong mga ginikanan mitanyag nga dad-on nila ako didto! Bisan tuod ang akong bana ug anak dili makauban, ang akong damgo hapit nang matinuod samtang ang akong mga ginikanan ug ako misakay sa usa ka direktang biyahe sa ayroplano paingon sa Madrid. Pag-abot namo sa Abril 21, mihukom kami sa pagdrayb paingon sa Estella, usa ka gamayng lungsod sa Navarre, sa amihanang Espanya. Akong gihimong komportable ang akong kaugalingon diha sa lingkoranan sa likod ug dihadiha nahikatulog.

Ang sunod nakong nahinumdoman mao nga ako nagbuy-od sa usa ka uma, nga ang adlaw nagsidlak sa akong mga mata. ‘Hain man ko? Nganong nakaabot ko dinhi? Nagdamgo ba ko?’ Samtang kining mga pangutanaha misantop sa akong hunahuna, usa ka makalilisang nga kamatuoran ang akong nasabtan. Dihay dili maayong nahitabo, ug kini dili damgo. Ang akong walang bukton sa sinina nagkaguhayguhay, ug dili nako malihok ang akong mga bukton o ang akong mga bitiis. Sa ulahi, akong nahibaloan nga ang among kotse milusot sa usa ka ali sa daplin sa karsada ug ako nalagpot gikan sa sakyanan samtang kini nahulog sa 20-metros nga paril. Maayo na lang, ako ug ang akong mga ginikanan wala mahinumdom sa aksidente.

Nagpakitabang ko, ug usa ka drayber sa trak ang nagdali pagduol nako. Dayon nanaog siya sa ubos pa gayod sa paril paingon sa kotse, diin natanggong ang akong mga ginikanan. “Padalia ang ambulansiya!” misinggit siya sa iyang kauban. “Grabe ang pagkaangol sa nanagsakay sa kotse!” Dayon mibalik siya diin ako naghigda nga walay lihok, ug nga may maayong tuyo, gisulayan niya pagtul-id ang akong bitiis. Misinggit ko sa kasakit, nga nakaamgo sa unang higayon nga grabe diay ang akong pagkaangol.

Sa wala madugay didto na ko sa emergency room sa lokal nga ospital sa Logroño. Ang polis malulotong nagpahibalo sa mga Saksi ni Jehova sa maong dapit kon hain ko ug kon unsay nahitabo. Sa wala madugay, daghan gikan sa mga kongregasyon sa Estella ug Logroño ang didto sa tupad sa akong kama, uban sa lokal nga Hospital Liaison Committee. Sa pagkatinuod, sa tibuok kalisdanan dinhi niining ospitala, ang minahal nga mga isigka-Kristohanon nga wala pa gayod nako mahimamat kanhi andam ug kinabubut-ong nag-atiman sa akong mga panginahanglan, sa tibuok adlaw.  Mahigugmaon usab nilang giatiman ang akong mga ginikanan, kinsa naulian nga igo nang pagawason sa ospital mga usa ka semana human sa aksidente.

Sa mga ala 1:​00 s.b. sa Miyerkoles, ang mga doktor nangabot aron operahan ang akong nabali nga bat-ang. Akong giingnan ang doktor nga dili ko gustong magpaabono ug dugo. * Nagpanuko siya sa pag-uyon sa akong hangyo, bisan tuod giingnan ko niya nga lagmit akong mamatay. Nakalabang ako sa pagdisdis, apan natingala ko nga ang akong mga samad wala limpiyohi, ni ilisan ang akong mga bendahe sa ulahi.

Pagka-Biyernes ang ihap sa mga selula sa akong dugo mius-os ngadto sa 4.7, ug nagkaluya na ko. Ang doktor miuyon nga hatagan ako ug kapuli nga pagtambal​—mga ineksiyon sa erythropoietin (EPO), nga, duyog sa iron ug mga suplemento nga magpadaghan sa dugo, magpalihok sa paggama ug pula nga selula sa dugo. * Nianang tungora, si Jay ug Joel nangabot. Pagkamaayo nga makita ang akong bana ug ang akong anak!

Sa mga ala 1:​30 s.b., usa ka doktor miingon kang Jay nga ang ospital nakakuha na ug orden gikan sa korte sa pag-abono ug dugo kon mograbe ang akong kahimtang. Giingnan siya ni Jay nga ang akong kagustohan mao nga dili ko buot magpaabono ug dugo sa bisan unsang mga kahimtang. “Nan mamatay siya!” mitubag ang doktor.

Nakigsulti si Jay sa Hospital Liaison Committee bahin sa pagbalhin kanako sa laing pasilidad​—kanang motahod sa akong kagustohan. Dili buot ingnon nga ang tanan niining ospitala misupak. Usa ka doktor, pananglitan, nagpasalig kanako nga buhaton niya ang tanan aron pagtino nga ako trataron uban sa tanang pagtahod nga takos kanako. Apan sa wala madugay ang ubang mga doktor nagpit-os kanako. “Gusto ba nimong mamatay ug biyaan ang imong pamilya?” sila nangutana. Ako silang gipasaligan nga buot nako ang kinamaayohang pagtambal nga mabatonan nga walay dugo. Ang mga doktor wala mapalihok sa pagtabang. “Mamatay gyod ka!” pintok nga miingon ang usa ka doktor.

Ang Hospital Liaison Committee nakakaplag ug usa ka ospital sa Barcelona nga miuyon sa pagtambal kanako nga walay dugo. Pagkalahi gayod sa duha ka ospital! Sa Barcelona duha ka nars ang malulotong naghunad sa akong samad ug naghimo kanakong komportable. Sa dihang nag-ilis sa akong mga bendahe, usa sa mga nars nakakita nga kini berde ug nanggahi na tungod sa miuga nga dugo. Matod niya naulaw siya nga ang iyang mga paisano nagtratar nako niining paagiha.

Sa wala madugay nadawat nako ang medikal nga pagtambal nga angay untang sugdan didto pa sa ospital sa Logroño. Talagsaon ang mga sangpotanan. Sulod sa pipila ka adlaw ang akong hinungdanong mga organo layo na sa peligro, ug ang ihap sa akong hemoglobin misaka ngadto sa 7.3. Sa pagbiya nako sa ospital, kini misaka ngadto sa 10.7. Sa dihang gikinahanglan nako ang dugang pagdisdis diha sa usa ka ospital sa Tinipong Bansa, kini miabot ug 11.9.

Mapasalamaton ako sa mga paningkamot sa mga doktor ug mga nars nga andam nga motugot sa kagustohan sa ilang mga pasyente, mouyon man sila niana o dili. Sa dihang ang kawani sa ospital motahod sa mga tinuohan sa usa ka pasyente, ilang gitambalan ang katibuk-an sa maong tawo​—ug busa ilang gitagana ang labing maayong pagtambal nga mabatonan.

[Mga footnote]

[Hulagway sa panid 12]

Uban sa akong bana ug anak

[Hulagway sa panid 13]

Duha ka membro sa Hospital Liaison Committee