Usa ka Yuta nga Wala nay Gilubong nga mga Mina

KINSAY makasulbad sa suliran bahin sa gilubong nga mga mina? Sa ato nang nakita, ang mga paningkamot sa tawo dili makaluka sa pagdumot, pagkakitid sa hunahuna, ug kadalo. Bisan pa niana, ang mga estudyante sa Bibliya nakasabot nga ang Maglalalang makahimog dumalayong kasulbaran. Apan unsaon niya pagbuhat kana?

Pagtukod ug usa ka Malinawong Katilingban

Mga tawo, dili mga hinagiban ang nakig-away diha sa mga gubat. Busa, kon kita buot nga makasinatig kalinaw, ang pagdumot nga maoy nagbahinbahin sa mga tawo ngadto sa rasanhon, tribonhon, ug nasodnong mga grupo kinahanglang mahanaw. Ang Diyos nagsaad nga himoon kini pinaagi sa iyang Gingharian, nga maoy gitudlo nga iampo sa milyonmilyong tawo sa tibuok kalibotan.​—Mateo 6:​9, 10.

Ang Bibliya naghisgot bahin kang Jehova ingong “ang Diyos nga nagahatag ug kalinaw.” (Roma 15:33) Ang kalinaw nga gitanyag sa Diyos wala gipasukad diha sa mga pagdili ug mga tratado, ni kana gipasukad sa kahadlok nga basin mosumbalik ang usa ka kaaway nga nasod nga armado kaayo. Sa kasukwahi, ang hinatag-sa-Diyos nga kalinaw maglakip sa mga kausaban sa paagi sa panghunahuna sa mga tawo ug sa mga tinamdan nga ilang gihuptan bahin sa ilang mga isigkatawo.

Si Jehova nga Diyos mag-edukar sa mga maaghop diha sa iyang mga paagi sa kalinaw. (Salmo 25:9) Ang iyang Pulong, ang Bibliya, nagsaad ug usa ka panahon sa dihang kadtong tanan nga buhi “mahimong mga tawong tinudloan ni Jehova, ug dagaya unya ang pakigdait sa imong mga anak.” (Isaias 54:13) Sa usa ka sukod, kini nagakahitabo na. Sa tibuok kalibotan, ang mga Saksi ni Jehova nailhan nga nagpalambo sa kalinaw taliwala sa mga tawong nagkadaiya kaayo ang mga kagikan. Ang mga tawong natudloan sa taas nga mga sukdanan sa Bibliya maninguha sa pagkinabuhi diha sa panaghiusa walay sapayan sa mga isyu nga tingali magbahin kanila. Ang edukasyon sa Bibliya nakapabag-o sa ilang tibuok nga panglantaw gikan sa pagdumot ngadto sa paghigugma.​—Juan 13:​34, 35; 1 Corinto 13:​4-8.

 Gawas pa sa edukasyon, ang panginahanglan alang sa tibuok-kalibotang pagtinabangay dugay nang giisip ingong usa ka hinungdanong elemento sa paghanaw sa mga hinagiban. Pananglitan, ang International Committee of the Red Cross nagrekomendar nga ang internasyonal nga katilingban hiniusang magpalambo ug mga paagi nga makapugong ug makaayo sa pagdumala sa kapeligrohan bahin sa gilubong nga mga mina.

Si Jehova nagsaad nga mobuhat ug labaw pa. Ang manalagnang si Daniel nagtagna: “Ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magatapos niining tanang [naglungtad] nga mga gingharian, ug kini mobarog hangtod sa panahong walay tino.”​—Daniel 2:44.

Palamposon sa Gingharian sa Diyos ang dili mahimo sa tawo. Pananglitan, sa matagnaong paagi ang Salmo 46:​9 nag-ingon: “Iyang [Jehova] gipahunong ang mga gubat hangtod sa kinatumyan sa yuta. Iyang gibali ang busogan ug giputolputol ang bangkaw; iyang gisunog sa kalayo ang mga karo.” Ang Gingharian sa Diyos magpatunghag kahimtang diin ang tawo makatagamtam gayod ug kalinaw uban sa iyang Maglalalang ug uban sa iyang isigkatawo.​—Isaias 2:​4; Sofonias 3:​9; Pinadayag 21:​3, 4; 22:2.

Si Augusto, nga gihisgotan sa sinugdanan sa nag-unang artikulo, nahupayan niining mensahea sa Bibliya. Ang iyang mga ginikanan, nga mga Saksi ni Jehova, nagtabang kaniya nga motuo sa kahibulongang mga saad sa Bibliya. (Marcos 3:​1-5) Siyempre, sa pagkakaron kinahanglang iyang antoson ang sakit nga mga epekto sa pagbuto sa gilubong nga mina nga maoy nakaangol kaniya. Bisan pa niana, si Augusto nagalantaw sa unahan sa adlaw sa dihang ang saad sa Diyos bahin sa usa ka paraisong yuta mamatuman. “Nianang panahona,” ang manalagnang si Isaias nagtagna, “ang mga mata sa mga buta mabuka, ug . . . ang bakol mokatkat ingon sa laking osa.”​—Isaias 35:​5, 6.

Sa maong umaabot nga Paraiso, ang gilubong nga mga mina dili na mahimong kapeligrohan nga makapatay ug makapungkol. Hinunoa, ang mga tawong magkinabuhi sa tanang bahin sa yuta magpuyo diha sa kasegurohan. Ang manalagnang si Miqueas naghubit niana niining paagiha: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba mismo ni Jehova sa mga panon maoy nagsulti niini.”​—Miqueas 4:4.

Buot ka bang makakat-on ug dugang bahin sa mga saad sa Diyos sumala sa gipakita diha sa iyang Pulong, ang Bibliya? Kontaka ang mga Saksi ni Jehova sa lokal nga dapit, o pagsulat ginamit ang tukmang adres nga gilista sa panid 5 niining magasina.

[Hulagway sa panid 8, 9]

Ilalom sa Gingharian sa Diyos, ang gilubong nga mga mina dili na mahimong kapeligrohan