Gikan sa Among mga Magbabasa

“Cystic Fibrosis” Buot kong ipahayag ang akong dakong pasalamat sa artikulong “Pagkinabuhi nga Dunay ‘Cystic Fibrosis.’” (Oktubre 22, 1999) Ang akong bana ug ako katalirongan ni Jimmy Garatziotis ug sa iyang asawa, ug makadasig kaayo ang pagkakitag mga batan-on nga adunay ingon niana ka lig-ong pagtuo bisan pa sa mabug-at nga mga problema.

S. D., Italya

Sa daghang tuig naghulat ako ug ingon niana nga artikulo nga mogula. Ang akong bana ug ako dunay sayis-anyos nga batang babaye nga dunay cystic fibrosis. Busa gibasa dayon nako ang artikulo. Makadasig kaayo ang pagtan-aw sa kasibot ni Jimmy Garatziotis sa buluhatong pagsangyaw, bisan pag siya masakiton. Ug makalipayng masayod nga kita dunay paglaom nga usa ka bag-ong kalibotan diin diha niana wala na unyay sakit.

H. O., Tinipong Bansa

Ang panig-ingnan ni Jimmy nagpamatuod nga bisan pag dili kaayo himsog ang atong panglawas, daghan kitag mahimo sa pagdayeg kang Jehova.

P. C., Brazil

Mga Droga Salamat sa pagpatik sa mga serye nga “Gikontrolar ba sa Droga ang Kalibotan?” (Nobyembre 8, 1999) Kaniadto ako tiggamit ug droga​—cocaine, marijuana, hashish. Nagaabuso usab ako sa alkoholikong ilimnon ug motabakog kapin sa 40 ka sigarilyo sa usa ka adlaw. Ang pag-undang niining batasana lisod kaayo, apan gihatagan ako sa Diyos ug kusog. Siyam na ka tuig sukad nga ako mihunong, ug ako mapasalamaton nga nakapalayo sa yanang niining kalibotana nga wala matakdi ug grabeng mga sakit o mabalhog sa prisohan. Sanglit nahibalo ako sa pisikal, emosyonal, ug ekonomikanhong kalisod nga ipahinabo sa pag-abuso sa droga, naglaom ako nga ang mga artikulong sama niini makatandog sa mga kasingkasing sa mga batan-on.

G. M., Italya

Gigamit nako ang mga serye diha sa essay sa tunghaan, nga niini nadawat nako ang kinatas-ang grado ug mga komplimento sa akong magtutudlo. Ako malipay gayod mobasa sa Pagmata!, ilabina sa mga artikulo nga naghisgot bahin sa mga isyu karong panahona. Kini nagtabang kanako nga mahimong realistiko bahin sa kinabuhi.

I. M., Italya

Mga Tanamang Palma Ang artikulong “Pagduaw sa Usa ka Talagsaong Hardin” (Nobyembre 8, 1999) maoy usa sa kinanindotang mga artikulo nga ako nalingaw ning bag-o pa. Mahanduraw gayod nako ang akong kaugalingon diha sa Paraiso, nga nagplanog maayo ug sama niana ka nindot nga tanaman. Ang gugma niining tawhana sa iyang mga tanom nakapatandog gayod nako. Pagkadako sa iyang apresasyon sa matahom nga kalalangan ni Jehova, nga maoy angay himoon natong tanan!

L. C., Canada

Pagkamahigalaon Ang artikulong “Mga Batan-on Nangutana . . . Sa Unsang Paagi Ako Mahimong Mas Mahigalaon?” (Nobyembre 22, 1999) nakatandog pag-ayo nako. Ako 16 anyos ug naglisod sa pagpakigsulti ngadto sa uban, ilabina diha sa Kristohanong mga tigom. Salamat sa inyong paghunahuna sa mga batan-ong sama nako nga adunay problemang sama niini. Akong paningkamotan nga masunod ang maayong tambag nga inyong gihatag niining artikuloha.

I. A., Pransiya

Mga Langgam nga Moawit Salamat sa artikulong “Makalingawng Tigdyuwet nga mga Mag-aawit.” (Disyembre 8, 1999) Mahanduraw ko gayod nga namati niining mga langgama nga nag-awit ug matahom nga musika diha sa sanga sa kahoy! Adlaw-adlaw akong nagpasalamat kang Jehova sa paglalang ug mga mananap nga nagalingaw kanato.

Y. S., Hapon

Diabetes Ingong bahin sa akong kurso tapos sa paggraduwar, gitudlo ako sa pagdumalag seminar bahin sa diabetes mellitus. Ang simple ug tin-awng pagsaysay nga gipatik diha sa artikulong “Ang Imong Anak nga Babaye Dunay Diabetes!” (Septiyembre 22, 1999) dako kaayog tabang. Ang sugilanon ni Sonya Herd nagpaamgo kanako kon unsa ka dako ang panginahanglan sa pasyente nga makabaton ug sayon sabton nga impormasyon.

T. K., Brazil