Kon sa Unsang Paagi Nahiusa Pag-usab ang Among Pamilya

Sumala sa giasoy ni Lars ug Judith Westergaard

ANG ilang balay morag normal nga puy-anan alang kang bisan kinsang malipayong pamilya sa Denmark. Komportable kini nga balay nga dunay nindot nga hardin, nga nahimutang sa malinawong baryo. Sulod sa balay, usa ka dakong letrato diha sa bungbong nagpakitag mahimsog ug mapahiyomong mga anak sa pamilya.

Ang amahan, si Lars, maoy usa ka ansiyano sa kongregasyon sa mga Saksi ni Jehova. Ang iyang asawa, si Judith, maoy usa ka payunir (bug-os-panahong ebanghelisador). Bisag malipayon sila nga magtiayon, dili ingon niana ang kahimtang kaniadto. Si Lars ug Judith nakaagom ug kagubot ug panag-away nga misangpot ug diborsiyo ug pagkabungkag sa pamilya. Apan, karon, ang ilang pamilya nahiusa pag-usab. Ngano? Pasagding silay moasoy sa nahitabo.

Si Lars ug Judith andam moasoy kon unsay hinungdan nga nadaot pag-ayo ang ilang kaminyoon ug kon sa unsang paagi sila nahiusa pag-usab. Sila nagtuo nga ang ilang eksperyensiya basin makatabang sa uban.

Maayo Kaayo ang Pagsugod Niini

Lars: Ang among kaminyoon lunlon nga kalipay sa dihang nagsugod kini sa Abril 1973. Ang kalibotan morag puno sa paglaom. Kami walay nahibaloan sa Bibliya ni sa mga Saksi ni Jehova, apan kami kombinsido nga mahimo namo ang kalibotan nga mas maayong dapit nga pagapuy-an kon ang mga tawo magkugig maayo alang niana. Busa okupado kami sa daghang politikanhong paningkamot. Ang among kalipay midako sa dihang ang among pamilya nadugangan ug tulo ka himsog ug liksi nga mga batang lalaki​—si Martin, Thomas, ug Jonas.

Judith: Ehekutibo ako sa usa ka sanga sa serbisyo sibil. Sa samang higayon, nalinga ako sa mga kalihokan sa politika ug sa unyon sa pamuo. Sa ulahi gihatagan ako ug dagkong mga posisyon.

Lars: Sa akong bahin, ako nagtrabaho sa usa ka dakong unyon sa pamuo, ug nakab-ot ko ang usa ka dakong posisyon. Ang among mga karera miuswag ug dako, ug morag walay makadaot sa among haruhayng pamuyo.

Anam-anam nga Nagkalayo

Lars: Apan nalinga kaayo kami sa among tagsatagsa ka kalihokan nga nagkamenos ang among panahon sa pag-ubanay sa usag usa. Nagtrabaho kami sa mao ra nga partido sa politika apan sa lainlaing bahin niana. Ang among tulo ka batang lalaki giatiman sa uban, sa pribado o sa day-care nga mga institusyon. Sanglit kaming duha naghunahuna lamang sa among kaugalingong alatubangon, ang among pamilyahanong kinabuhi nahimong magubot. Kon kaming duha magkaatol nga anaa sa balay, sagad moulbo ang kusog nga mga panag-away. Dayon nagsugod ako sa pag-inom ug alkoholikong ilimnon ingong usa ka matang sa makapahupayng tambal.

Judith: Siyempre, nahigugma gihapon kami sa usag usa ug sa mga bata, apan ang among gugma wala gayod maugmad sa paagi nga angay unta niini; morag nalaya kini. Ang among relasyon mitab-ang pag-ayo, ug ang mga bata nag-antos tungod niini.

 Lars: Agig dakong pagsulay aron mahibalik ang kalig-on sa among pamilya, mihukom ako sa paghunong sa akong trabaho. Sa 1985 mibalhin kami gikan sa siyudad ngadto sa baryo nga among gipuy-an na karon. Miarang-arang makadiyot ang kahimtang, apan ako ug ang akong asawa okupado gihapon sa among tagsatagsa nga mga alatubangon. Sa kataposan, sa Pebrero 1989, ang among 16 ka tuig nga kaminyoon sa kataposan misangpot ug diborsiyo. Ang among pamilya nagun-ob.

Judith: Sakit kaayo ang pagtan-aw sa akong kaugalingong pamilya nga nabungkag ug ang pagtan-aw sa pag-antos sa mga bata. Grabe kaayo ang among kasuko nga dili gani kami magkauyon labot sa pag-ambitay sa katungod sa pag-atiman sa mga bata, busa nakuha ko ang katungod sa pag-atiman nilang tulo.

Lars: Si Judith ug ako naghimog pipila ka makalibog nga mga paningkamot aron dili mabungkag ang among pamilya. Miampo pa gani kami sa Diyos ug panabang. Apan kami wala kaayoy kahibalo bahin sa Diyos.

Judith: Ang among mga pag-ampo nagpabati kanamo nga ang Diyos dili magpatalinghog. Mapasalamaton kami nga sukad niadto nakita namo nga ang Diyos magpatalinghog diay sa mga pag-ampo.

Lars: Kami wala gayoy ideya nga kinahanglang maningkamot kami ug maghimog mga kausaban sa among kaugalingon. Busa ang diborsiyo nahimong makasubong sangpotanan.

Usa ka Wala Damhang Kausaban Alang Kang Lars

Lars: Samtang ako nag-inusarang nagpuyo, may mga kausaban nga wala gayod nako damha. Usa ka adlaw midawat ako ug duha ka magasin gikan sa mga Saksi ni Jehova. Kaniadto balibaran ko dayon ang mga Saksi. Apan samtang nagbasa ako niadtong magasina, akong nahibaloan nga ang mga Saksi nagtuo diay sa Diyos ug kang Jesu-Kristo. Dako gayod kana nga katingala. Wala akoy ideya nga sila mga Kristohanon.

Halos sa mao gihapong higayon, nakig-ipon ako sa usa ka babaye nga akong nahibalag. Usa diay siya ka Saksi ni Jehova kaniadto. Sa dihang nagsugod ako sa pagpangutana, iya akong gipakitaan diha sa Bibliya nga Jehova ang ngalan sa Diyos. Busa ang “Mga Saksi ni Jehova” nagpasabot nga “Mga Saksi sa Diyos”!

Gihikay sa babaye nga makatambong ako sa pakigpulong publiko sa Assembly Hall sa mga Saksi ni Jehova. Ang akong nakita didto nakapukaw gayod sa akong interes. Miadto ako sa lokal nga Kingdom Hall aron makakat-on pag dugang, ug usa ka pagtuon sa Bibliya ang nasabotan. Wala ra magdugay nga naamgohan ko nga ang paagi sa akong pagkinabuhi sayop, busa mibulag ako sa akong babaye nga kaipon ug nagpuyo nga nag-inusara sa akong gidak-ang lungsod. Human sa gamayng pagpanuko gikontak ko ang mga Saksi ni Jehova didto ug gipadayon ang akong pagtuon sa Bibliya.

Bisan pa niana, may mga pagduhaduha gihapon ako. Tinuod ba gayod nga katawhan sa Diyos ang mga Saksi ni Jehova? Komosta ang akong tanang nakat-onan sa bata pa ako? Sanglit gimatuto ako ingong Sabadista, gikontak nako karon ang usa ka ministro sa Sabadista. Siya misugot nga tun-an ako matag Miyerkoles, samtang tun-an ako sa mga Saksi ni Jehova matag Lunes. Ang gusto ko lang masayran mao ang tin-awng tubag gikan sa duha ka pundok bahin sa upat ka espesipikong butang: ang pagbalik ni Kristo, ang pagkabanhaw, ang doktrina sa Trinidad, ug ang paagi nga kinahanglang organisahon ang kongregasyon. Mikabat lamang ug pipila ka bulan nga napanas ang akong tanang pagduhaduha. Diha sa matag usa niining upat ka bahin​—ug diha sa tanang butang​—ang mga doktrina lamang sa mga Saksi ni Jehova ang bug-os nga gipasukad sa Bibliya. Tungod niini, malipayon akong nakigbahin sa tanang kalihokan sa kongregasyon  ug wala magdugay nagpahinungod kang Jehova. Sa Mayo 1990, ako gibawtismohan.

Komosta si Judith?

Judith: Sa tayuktok sa among krisis sa kaminyoon, nagsugod ako sa pagsimba pag-usab. Sa dihang akong nadunggan nga si Lars nahimong usa sa mga Saksi ni Jehova, wala gayod ako malipay. Ang among kinamanghorang anak nga lalaki, ang diyes-anyos nga si Jonas, usahay moduaw sa iyang amahan, apan gidid-an nako si Lars sa pagdala kang Jonas sa bisan unsang mga miting sa mga Saksi. Miapelar si Lars sa mga awtoridad, apan mipabor sila nako.

Nakahibalag ako ug laing lalaki. Dugang pa, nalinga ako pag-ayo sa politika ug sa tanang matang sa buluhaton sa komunidad. Busa kon may nakahisgot sa posibilidad sa panag-uli pag-usab sa among pamilya niadtong panahona, morag imposibleng mahitabo.

Sa nangitag ikaatake batok sa mga Saksi ni Jehova, akong giadto ang ministro sa lokal nga parokya, kinsa prangkang miadmitir nga wala gayod siyay nahibaloan bahin sa mga Saksi ug walay basahon bahin kanila. Ang giingon lamang niya mao nga mas maayong magpalayo ako gikan kanila. Siyempre, kana wala makapausab sa akong negatibong panghunahuna bahin sa mga Saksi ni Jehova. Apan napugos ako sa pakigkita kanila sa paagi nga wala nako damha.

Ang akong igsoong lalaki nga nagpuyo sa Sweden nahimong usa sa mga Saksi ni Jehova, ug ako gidapit sa iyang kasal diha sa Kingdom Hall! Kadto nga kasinatian nakahimog kalit nga kausaban sa akong panghunahuna bahin sa mga Saksi. Sa akong katingala sila maoy dili makalaay nga mga tawo sama sa akong panglantaw kanunay kanila. Sila mga maluloton ug malipayon, nga maayong mopakatawa.

Kasamtangan, ang akong bana kanhi, si Lars, bug-os nga nausab. Siya mas responsable na, nagagugol ug panahon sa mga bata, maluloton ug mapugnganon sa iyang sinultihan, ug makasaranganon nga moinom dili sama sa miagi. Ang iyang personalidad madanihon kaayo! Siya maoy usa na ka matang sa tawo karon nga dugay na nakong gipangandoy nga siya maingon. Makaguol kaayo ang paghunahuna nga dili na ako minyo kaniya ug nga tingali moabot ang adlaw nga magminyo siya ug laing babaye!

Dayon nagplano ako ug tago nga “atake.” Kas-a samtang si Jonas miestar uban sa iyang amahan, naghikay ako sa pagbiyahe aron sa pagpakigkita kang Jonas ug Lars uban sa akong duha ka igsoong babaye nga nagpasumangil nga ang duha ka iyaan angayng may higayon sa pagpakigkita sa ilang pag-umangkon. Nagkitakita kami sa usa ka parke nga lulinghayawan. Samtang giatiman sa mga iyaan ang bata, si Lars ug ako nakakitag bangko ug nanglingkod.

Sa akong kakurat, sa dihang gihisgotan nako ang bahin sa among umaabot, si Lars mikuha ug usa ka libro sa iyang bulsa. Gitawag kini ug Paghimo sa Imong Pamilyahanong Kinabuhi nga Malipayon. * Iyang gitunol nako ang libro ug misugyot nga akong basahon ang mga kapitulo bahin sa papel sa bana ug sa asawa diha sa pamilya. Iyang ilabinang gisugyot nga akong tan-awon ang mga kasulatan.

Dayon, sa dihang si Lars ug ako nanindog gikan sa bangko, buot kong mohawid sa iyang bukton, apan malulotong gisalikway niya kana. Si Lars walay intensiyon nga makiglabot nako pag-usab nga dili mahibalo sa akong hunahuna bahin sa iyang bag-ong pagtuo. Medyo nahiubos ako niana, apan akong naamgohan nga ang iyang tinamdan makataronganon gayod ug maoy alang sa akong kaayohan kon mahimo man ugaling nako siyang bana pag-usab.

Kining tanan nakadugang sa akong kaikag bahin sa mga Saksi ni Jehova. Sa pagkasunod adlaw, gikontak nako ang usa ka babaye nga nahibalo akong usa ka Saksi, ug nagkasabot kami nga siya ug ang iyang bana ang mohatag kanako sa impormasyon nga buot kong mahibaloan bahin sa ilang relihiyon. Sila dunay mga tubag sa Bibliya sa akong tanang daghang pangutana. Akong nakita nga ang gitudlo sa mga Saksi ni Jehova bug-os nga gipasukad sa Bibliya. Sa matag punto, kinahanglang moadmitir ako nga mao kini ang kamatuoran.

Nianang panahona mibulag ako gikan sa Evangelical  Lutheran Church ug gihunong ang akong mga kalihokan sa politika. Mihunong gani ako sa pagpanabako. Kadto ang kinalisorang lakang sa tanan. Ang akong pagtuon sa Bibliya nagsugod sa Agosto 1990, ug sa Abril 1991, gibawtismohan ako ingong usa sa mga Saksi ni Jehova.

Ilang Ikaduhang Kasal

Judith: Karon kaming duha maoy bawtismadong mga Saksi. Bisan pag nagkabulag kami, kaming duha nagtuon sa Bibliya. Tungod sa maayong mga pagtulon-an niini, kami lahi na kay sa kaniadto. Kami nahigugma gihapon sa usag usa, tingali mas lalom pa kay sa kaniadto. Busa ania kami karon, libre na sa pagminyo pag-usab​—ug mao kanay among gihimo. Nagbayloay kami sa among mga panaad sa ikaduhang higayon, apan niining higayona diha sa Kingdom Hall sa mga Saksi ni Jehova.

Lars: Ang talagsaon nahitabo​—ang among pamilya nahiusa pag-usab! Pagkadakong kalipay ug kangaya ang among gibati karon!

Judith: Ang kasal gitambongan sa among mga anak, daghang paryente, ug daghang bag-o ug daang mga higala. Lalim kaayo kadto nga kasinatian. Lakip sa among mga bisita mao ang pipila nga nakaila kanamo sa among kaminyoon sa una; sila nalipay nga nakakita kanamo nga nagkauli pag-usab ug natingala sa pagkakita sa tinuod nga kalipay taliwala sa mga Saksi ni Jehova.

Ang mga Anak

Lars: Sukad sa among pagbawtismo kami malipayon nga nakakita sa among duha ka anak nga mipili sa pagpahinungod sa ilang mga kinabuhi ngadto kang Jehova.

Judith: Si Jonas nagpabili sa kamatuoran sa Bibliya sukad nga nasinati siya niini sa bata pa sa dihang siya moduaw sa iyang amahan. Siya diyes anyos pa lamang niadtong higayona sa dihang gisultihan niya ako nga gusto siyang moipon sa iyang papa tungod kay, sumala pa sa iyang giingon, “Si Papa nagsunod sa Bibliya.” Si Jonas gibawtismohan sa dihang siya 14. Siya nakatapos sa iyang edukasyon, ug karon siya maoy usa ka bug-os-panahong ministro.

Lars: Ang among kinamagulangang anak, si Martin, karon 27 na. Ang kausaban nga nakita niya kanamo nagpahunahuna kaniyag maayo. Siya mibiya sa balay ug nagpuyo sa laing bahin sa nasod. Duha ka tuig sa miagi siya nagsugod sa pagtuon sa Bibliya uban sa lokal nga kongregasyon sa mga Saksi ni Jehova didto. Human lamang sa lima ka bulan, siya andam na nga magpabawtismo. Siya nagpadayon nga may maayong mga plano alang sa iyang umaabot nga kinabuhi ingong usa ka Kristohanon.

Ang among tungatungang anak, si Thomas, dili pa usa ka Saksi ni Jehova karon. Gihigugma gihapon namo siya, siyempre, ug dunay maayong relasyon kaniya. Siya malipayon sa kausaban nga nahitabo sa among pamilya. Ug kaming tanan nagkauyon nga tungod sa mga prinsipyo nga among nakat-onan gikan sa Bibliya ingong mga ginikanan, ang among pamilya nahiusa pag-usab. Pagkadakong panalangin kini alang kanamo nga kami karon kanunayng mag-uban ilalom sa usa ka balay, uban sa tanang tulo ka anak ug duha ka ginikanan!

Ang Among Kinabuhi Karon

Lars: Wala kami mag-ingon nga kami nangahimong hingpit. Apan kami nakakat-on ug usa ka butang​—nga ang gugma ug pagtinahuray sa usag usa mao ang pangunang mga butang diha sa malamposong kaminyoon. Ang pundasyon sa among kaminyoon karon lahi na kaayo kay niadtong sa miagi. Gidawat namong duha ang awtoridad nga mas hataas kay sa among kaugalingon, kay kaming duha miila nga kami nagkinabuhi alang kang Jehova. Si Judith ug ako tinuod nga nahiusa ug naghulat sa umaabot nga masaligon.

Judith: Seguro kami maoy buhing pamatuod nga si Jehova mao ang labing maayong magtatambag sa kaminyoon ug sa pamilya.

[Footnote]

[Hulagway sa panid 20]

Si Lars ug Judith panahon sa ilang unang kasal, sa 1973

[Hulagway sa panid 21]

Tulo ka batang lalaki nga nawad-an sa ilang nahiusang pamilya ug nakakaplag niini pag-usab

[Hulagway sa panid 23]

Si Lars ug Judith karon, nahiusa pag-usab pinaagi sa pagsunod sa mga prinsipyo sa Bibliya