Mabinantayong Paggamit sa Telebisyon

ANG telebisyon nagsilbing “pangunang tigsugilanon, yaya ug tighulma sa opinyon sa publiko,” miingon ang Not in the Public Interest​—Local TV News in America, usa ka taho nga gihipos sa usa ka pundok nga tigsusi sa media sa Tinipong Bansa. “Gilibotan kita sa TV . . . Sama sa aso sa sigarilyo nga ginabuga sa uban, kini anaa sa hangin.” Ug maingon nga ang paghingos ug aso sa sigarilyo nga ginabuga sa uban makadaot, mao man ang pagtan-aw ug daghang oras sa mga programa sa TV nga walay pili-pili dunay makadaot nga epekto​—ilabina sa kabataan.

Kon bahin sa krimen ug kapintasan diha sa TV, ang mao gihapong taho nag-ingon nga “daghang gatosang pagtuon sa pagpanukiduki nagpakita nga ang pagtan-aw ug mapintas nga mga talan-awon may makadaot nga impluwensiya sa pagkakat-on, pagkamabingkilon ug empatiya sa bata.” Ang American Medical Association nag-ingon sa 1992 nga ang “kapintasan diha sa telebisyon maoy usa ka risgo nga makadaot sa panglawas sa mga batan-on.”

Sa unsang paagi imong makontrolar ang dili maayong epekto sa mga programa sa TV diha sa imong mga anak? Ang taho naglista ug pipila ka sugyot, nga gipasibo gikan sa mga rekomendasyon sa daghang organisasyon sa panglawas sa publiko, kon unsaon paggamit sa telebisyon sa mabinantayong paagi. Ang uban niadtong mga sugyota naglakip sa mosunod.

◼ Planoha ug limitahe ang imong pagtan-awg TV. Limitahe kon unsay tan-awon sa mga bata. Ayaw ibutang ang TV diha sa mga kuwarto sa mga bata.

◼ Pagbutang ug globo tapad sa TV aron matan-aw sa mga bata ang mga dapit nga ilang nakita sa mga programa.

◼ Pagtan-aw ug telebisyon uban sa imong mga anak aron imong ikapatin-aw ang mga butang sama sa kalainan sa pantasya ug sa tinuod. Daghang bata nga wala pay diyes anyos dili gayod makakita sa kalainan.

◼ Ibalhin ang telebisyon layo sa makita dayon nga lugar sa imong balay. Ibutang ang TV sa kabinet, nga dunay sira. Magpalisod kinig diyutay sa pagpaandar niini ug sa pagbalhinbalhin ug channel.