Gikan sa Among mga Magbabasa

Selibasiya Dili ko mouyon sa taho diha sa “Pagpaniid sa Kalibotan” nga nag-ulohang “Selibasiya​—Ngano?” (Septiyembre 22, 1999) Kamo nag-ingon nga ang katarongan sa Simbahan “walay pasikaranan diha sa Kasulatan.” Tungod sa giingon sa Mateo 19:​10-12 ug 1 Corinto 7:​8, 26, 27, makahinapos ako nga adunay pasikaranan sa selibasiya.

M. T., Tinipong Bansa

Tinuod nga girekomendar sa Bibliya ang pagkatagsaanon ingong tilinguhaong dalan alang sa pipila. Apan, ang Bibliya wala magbaod nga magpabiling dili-minyo ang Kristohanong mga ministro. Si apostol Pedro ug ubang may-katungdanang mga lalaki sa unang Kristohanong kongregasyon maoy minyong mga tawo. (1 Corinto 9:​5; 1 Timoteo 3:​2) Busa, ang pinugos nga selibasiya walay pasikaranan diha sa Kasulatan.​—ED.

Patuotuo Ingong batid sa mga pinulongan, kinahanglang akong dad-on sa inyong pagtagad ang usa ka sayop diha sa Oktubre 22, 1999, nga Pagmata! Diha sa seryeng “Mga Patuotuo​—Nganong Peligroso Kaayo?” inyong gipasabot nga ang Alemang pulong nga gesundheit maoy usa ka paagi sa pag-ingong “Kaluy-an ka sa Diyos” sa dihang dunay moatsi. Ang Iningles nga hubad nianang pulonga maoy “kahimsog.”

C. C., Tinipong Bansa

Dili namo tuyong ipasabot nga ang “gesundheit” mao ang tukmang hubad sa Iningles nga ekspresyon. Gilista kini, uban sa duha pa ka langyawng mga ekspresyon, ingong “kaamgid” sa paggamit sa Iningles nga ekspresyong “Kaluy-an ka sa Diyos.”​—ED.

“Cystic Fibrosis” Bag-o pa lang nakong natapos pagbasa ang artikulong “Pagkinabuhi nga Dunay ‘Cystic Fibrosis.’” (Oktubre 22, 1999) Natandog ako sa paagi sa pagsagubang ni Jimmy Garatziotis niining grabeng balatian. Ang iyang pagpabili sa iyang minahal nga asawa makapadasig usab. Akong naamgohan kon unsa ka daghang butang ang atong gibalewala​—bisan ang atong katakos nga makaginhawa sa normal!

D. A., Inglaterra

Wala akoy ingon niana nga sakit apan nag-antos ako sa usa ka matang sa sakit sa baga ug depekto sa kasingkasing. Makapahupay kanako ang pagbasa niini nga eksperyensiya. Parehas ang akong pagbati kang Jimmy sa iyang pag-ingon nga gusto niyang makadagan diha sa halapad nga kapatagan, usa ka pangandoy nga gilaoman namong matuman sa umaabot nga bag-ong kalibotan nga gisaad sa Diyos.

F. A., Italya

Ang Danube Buot ko kamong pasalamatan sa nindot nga artikulong “Ang Danube​—Kon Makasulti pa Unta Kini!” (Oktubre 22, 1999) Sa bata pa ako, nagpuyo ko duol sa tuboran sa Danube ug nakagusto kaayo niini. Ingong usa ka tigtuon sa sirkulasyon sa tubig, ako may kahigayonan sa pagsuhid sa mga suba, ug ako nagtuo nga kini sa linaing paagi maoy kahibulongang mga linalang sa Diyos.

D. O., Croatia

Kamo nag-ingong ang University of Vienna, nga gitukod niadtong 1365, mao ang kinakaraanan diha sa nagsultig-Aleman nga kalibotan. Kon ang inyong ipasabot mao ang mga dapit diin Aleman ang sinultihan sa pagkakaron​—Alemanya, Austria, ug bahin sa Switzerland​—kini nga pahayag husto. Apan, ang kinakaraanang unibersidad nga Aleman ang pinulongan gitukod niadtong 1348 sa Prague, kaulohan sa Republika sa Czech karon. Niadtong panahona kini bahin sa Austria.

M. E., Alemanya

Sa pagkatinuod, ang Prague mao ang kaulohan sa Bohemia. Bisan tuod Aleman ug Czech ang sinultihan didto kanhi, ang opisyal nga pinulongan sa unibersidad maoy Latin.​—ED.

Pagkamaulawon Daghan kaayong salamat sa artikulong “Mga Batan-on Nangutana . . . Nganong Dili Ko Makaarang sa Pagkahimong Mas Mahigalaon?” (Oktubre 22, 1999) Kini maoy pagkaon sa hustong panahon. Nag-antos ako sa pagkamaulawon sa tibuok kong kinabuhi. Ako 17 anyos ug maglisod nga makighimamat ug mga tawo sa unang higayon ug makig-uban sa mga bag-ohan diha sa Kristohanong mga panagkatigom. Tungod niini, akong napalabay ang daghang kahigayonan nga daghag mahimamat ug malipay sa pagpakig-uban sa mga igsoong lalaki ug babaye. Ang inyong artikulo nagtabang kanako sa pagkaamgo nga daghang tawo ang maulawon ug nga kini maoy usa ka butang nga akong mabuntog.

B. H., Tinipong Bansa