Makataronganon ba ang Ebolusyon?

KARONG adlawa, ang teoriya sa ebolusyon gikaingong tinuod niadtong mga nagpasiugda niini. Apan, unsa ka makataronganon ang mga pangangkon nga sagad nilang gihimo? Tagda ang mosunod.

Ang seda nga gigama sa mga lawalawa maoy usa sa kinalig-onang mga materyales nga nailhan. Sumala sa New Scientist, “ang matag hilo mainat sa 40 porsiyento sa gitas-on niini ug makasuhop ug enerhiya nga usa ka gatos ka pilo kay sa puthaw ug dili mabugto.” Giunsa man paghimo kining talagsaong seda? Ang hagkot nga likido, nga usa ka protina, mosubay sa gagmitoyng mga ugat-ugat sa lawas sa lawalawa, ug ang likido mahimong solidong hilo pinaagi sa pag-usab sa pagkaplastar sa protina nga mga molekula niini, saysay pa sa Encyclopædia Britannica.

Ang New Scientist nanghinapos: “Ang lawalawa kinaiyanhon nga nakamugnag mga teknik nga labaw kaayo kay nianang iya sa labing hanas nga mga kemista.” Nagpasabot ba kini nga ang lawalawa kinaiyanhon nga nakamugnag mga teknik sa paggama nga komplikado kaayo nga wala pa masabti sa tawo?

Usa ka artikulo sa The Wall Street Journal, ni Phillip E. Johnson, propesor sa balaod sa University of California, nag-ingon nga walay ebidensiya ang ebolusyon apan ang mga tigsuportar niini sagad mosaway niadtong mokuwestiyon niini. Ang artikulo nagkomento: “Ang teoriya sa ebolusyon nalisdan pag-ayo sa pagpatunghag ebidensiya​—apan ang mga tigpaluyo niini dili buot ug matinud-anong lantugi nga tingali makadaot sa ilang mapihigong paagi sa panglantaw sa kalibotan.”

Ang laing pananglitan nga nagpakita sa kawalay katarongan sa ebolusyonaryong panghunahuna maoy bahin sa mga tanom. Ang mga siyentipiko nga nanukiduki sa Morocco nakakalot ug 150 ka mga fossil sa archaeopteris, “ang kinadul-ang matang sa unang mga tanom nga may binhi nga nadiskobrehan hangtod karon, nga gigikanan sa kadaghanang mga kahoy karong adlawa,” matod sa The Daily Telegraph sa London. Ang editor sa siyensiya sa mantalaan nagpahayag nga kining tanoma “nakatabang sa paghulma sa modernong kalibotan pinaagi sa pag-imbentog mga dahon ug mga sanga.” Ang “pag-imbento” maoy “pagmugna pinaagi sa paghunahuna.” Makataronganon ba nga ipasidungog ngadto sa usa ka tanom ang katakos sa paghunahuna ug sa pag-imbento?

Si Solomon, usa sa labing makinaadmanong mga tawo, nagtambag kanato sa ‘pagbantay sa atong katakos sa panghunahuna,’ sa paghunahuna alang sa atong kaugalingon. Ang panginahanglan sa pagbuhat sa ingon mas mahinungdanon pa gayod karon.​—Proverbio 5:2.