Mga Korbata Kaniadto ug Karon

SULOD sa mga milenyo ang mga lalaki maikagon gayod sa pagdayandayan sa ilang mga tutonlan ug mga liog. Pananglitan, sa mga 1737 W.K.P., ang Paraon sa Ehipto mihatag kang Jose ug kuwentas nga bulawan.​—Genesis 41:42.

Karong adlawa diha sa daghang bahin sa kalibotan, ang mga lalaki naggamit nianang atong ginganlan ug mga korbata. Sumala sa nagkalainlaing mga tinubdan, ang unang mga tiggamit sa modernong mga korbata nakita sa Inglaterra ug Pransiya sa ulahing bahin sa ika-16 nga siglo. Ang mga lalaki nagsul-ob ug dyaket nga gitawag ug doublet. Alang sa dayandayan nagbaliog sila ug ruff. Kasagaran ang ruff, nga mahimong may gibag-ong pipila ka pulgada, maoy usa ka dako samag-platong giringgiring nga gibaliog. Ginama kadto sa puti nga panapton ug gipatuskig aron dili mausab ang porma niini.

Ngadtongadto, ang ruff giilisan sa gitawag ug gipayungyong nga kuwelyo. Kadto maoy puting kuwelyo nga nagtabon sa tibuok abaga ug gipayungyong hangtod sa ibabaw sa bukton. Kining mga kuwelyoha gitawag usab ug mga Vandyke. Lakip sa uban pang nagsul-ob niini, mao ang mga Puritano.

Sa ika-17ng siglo, ang usa ka tsaliko gisul-ob ilalom sa naandang amerikana. Ang liog sa nagsul-ob gibaliogan ug panapton, o cravat. Kining panaptona gipalikos sa liog ug kapin sa usa ka beses. Ang mga tumoy gipabitay sa atubangan sa polo. Ang mga dibuho gikan sa ulahing bahin sa ika-17ng siglo nagpakita nga kaniadto ang mga cravat popular kaayo.

Ang mga cravat ginama sa katsa, lino, ug bisan gani engkahe. Mahal kaayo ang mga engkahe. Si James II sa Inglaterra gikaingong mibayad ug 36 ka pound ug 10 ka shilling alang sa usa ka engkahe nga cravat para sa iyang koronasyon, medyo dako nang kantidad niadtong panahona. Dagko ang ubang mga engkahe nga cravat. Ang hulagway ni Charles II sa Westminster Abbey nagpakita sa iyang engkahe nga cravat nga 15 sentimetros ang gilapdon ug 86 sentimetros ang gitas-on.

Dihay daghang paagi sa pagbaligtos sa mga cravat. Usahay ang usa ka laso nga seda ipatong sa cravat aron dili kini mahiwi ug dayon mohimog dakong baligtos ubos sa suwang. Kining estiloha sa baliog gitawag ug solitaryo. Ang baligtos susama sa modernong bow tie. Gikaingong dihay labing menos usa ka gatos ka paagi sa pagbaligtos ug cravat. Si Beau Brummell, usa ka Ingles nga maoy nag-impluwensiya sa mga estilo sa panapot sa mga lalaki, gikaingong migugol ug tibuok buntag sa pagbaligtos ug cravat aron matarong kini pagtaod.

Sa katuigang 1860, ang cravat nga dihay taas nga mga tumoy nahimong kaamgid sa modernong matang sa panapton nga gibaliog ug ginganlan nga korbata. Gitawag usab kadtog four-in-hand (binalo pagbaligtos). Kining ngalana gikuha gikan sa paagi sa paghigot nga gigamit sa mga tigpadagan sa mga grupo sa upat-ka-kabayo. Ang mga polo nga de-kuwelyo nauso. Ang korbata gibaligtos ubos sa suwang, ug ang taas nga tumoy niini gipabitay atubangan sa polo. Mao kanay pagtungha sa modernong korbata. Ang laing matang sa korbata, ang bow tie, nauso sulod sa katuigang 1890.

Karong adlawa ang korbata giisip sa daghang tawo ingon nga hinungdanong bahin sa pamostura sa naggamit niini. Ang ubang mga tawo mokomento pa gani bahin sa usa ka estranghero pinasukad sa matang sa korbata nga iyang gigamit. Busa, hinungdanon ang paggamit ug mga korbata nga hinlo ug may mga disenyo o mga kolor nga mobagay sa imong polo, pantalon, ug dyaket.

 Ang gipiling paagi sa pagbaligtos angayng ihigot nga hapsay. Lagmit ang labing popular nga pagbaligtos mao ang four-in-hand. (Tan-awa ang dibuho sa panid 14.) Kini hinlo ug kasarangan ug kaylap nga gidawat para sa pormal nga mga okasyon. Ang laing popular nga pagbaligtos mao ang Windsor, nga medyo mas dako. Ang usa ka lupyak sagad himoon diha sa korbata ubos gayod sa baligtos.

Daghang lalaki ang samokan nga magkorbata. Dili sila moangay sa kahugot diha sa ilang tutonlan. Apan, ang ubang nakasinati niining sulirana nakakaplag nga ang kasagarang nakaingon sa kaalingasa mao ang gidak-on sa polo. Kon mao kini ang imong problema, seguroa nga ang kuwelyo sa imong polo dili kaayo gamay. Kon husto ang gidak-on niini, dili ka gani makamatikod nga ikaw nagkorbata.

Sa daghang kayutaan ang korbata giisip ingong hinungdanong bahin sa panapot alang sa negosyo o sa pormal nga okasyon. Tungod nianang katarongana daghang Kristohanong lalaki ang magkorbata sa dihang makig-ambit sa pormal nga mga bahin sa ilang ministeryo. Oo, ang usa ka pirasong panapton palibot sa liog sa usa ka lalaki makadugang sa dignidad ug makahimo kaniyang talahoron tan-awon.

[Diagram sa panid 14]

(Alang sa aktuwal nga pagkahan-ay, tan-awa ang publikasyon)

Kon unsaon paghigot ang four-in-hand *

1 Pagsugod nga ang lapad nga tumoy sa korbata maoy halos 30 sentimetros ubos sa gamay nga tumoy, ug ipabanday kini sa gamay nga tumoy, dayon ipailalom kini.

2 Ipabanday pag-usab ang lapad nga tumoy, ug ipalusot kini sa taas agi sa buho.

3 Nga ang tudlo luag nga naggunit sa atubangan sa baligtos, hulbota ang lapad nga tumoy agi sa buho sa atubangan.

4 Hinayhinaya pagpahugot ang baligtos, nga naggunit sa gamay nga tumoy ug nagpadailos sa baligtos paingon sa kuwelyo.

[Footnote]

[Mga hulagway sa panid 15]

Mga estilo sa korbata gikan sa ika-17ng siglo hangtod karon