Modernong-Adlawng mga Tigpuyog Langob

SINULAT SA KORESPONSAL SA PAGMATA! SA LESOTHO

MGA tigpuyog langob sa atong panahon? May nakit-an kami sa Lesotho, usa ka bukiron nga gingharian sa habagatang Aprika. Ang ilang baryo, Ha Kome, nahimutang mga 60 kilometros gikan sa Maseru, ang kaulohang siyudad sa Lesotho, sa tiilan sa mga bukid sa maanindot nga Maluti Mountains. Panahon sa mga bulan sa ting-init, kining maong mga bakilid kanunayng matabonan sa pula kaayong mga bulak. Nailhan sa kadaghanan ingong red-hot pokers, kining maanindot nga mga bulak molahi sa labong kaayo lunhaw nga mga tanom sa maong dapit.

 Dinhi gisunod gihapon sa ubay-ubayng pamilya ang naandang paagi sa pagkinabuhi sulod sa kasiglohan. Sila aktuwal nga nagtukod sa ilang mga balay sa sulod sa mga langob sa bakilid. Ang mga lipak nga kahoy ug ubang mga materyales, sama sa mga tangbo, nagsilbing dugokan sa baga nga bungbong sa atubangan. Ang bungbong sinapawan ug mikskla nga lapok ug tai sa baka. Kini nga sapaw maghatag ug proteksiyon sa kamig nga mga tingtugnaw sa Lesotho, sa dihang ang temperatura moubos sa grado sa pagyelo. Diha sa sulod, dunay hulpa nga luna sa salog nga gitawag ug ifo, nga nagkahulogang “dapogan,” nga gamiton usab sa paghatag ug igong kainit kon bugnaw ang panahon.

Ang bato sa langob mismo mao ang atop, likod nga bungbong, ug kasagaran ang mga bungbong sa kilid. Apasan kinig mikskla nga lapok ug tai sa baka, ug kini apasan pag-usab matag tuig. Kini makahatag ug kolor ug hamis nga nawong sa bato. Ang mga panit sa baka nagdayandayan sa sulod ug gamiton usab ingong mga kutson nga katulgan.

Ang mga bisita nga taga-Kasadpan makakita sa karaang paagi sa pagkinabuhi nga makapaikag sa lahi nga paagi. Ang popular nga paagi sa besti gilangkoban ug daghag kolor nga mga habol ug pormag-kono nga mga kalo nga gama sa sagbot. Ang mga bayong nga magbalantay nga nagtiniil kasagarang makit-ang nag-atiman sa ilang kahayopan. Ang mga lalaki sa baryo makita nga nagtrabaho sa ilang kamaisan o bibong nakighinabi sa ubang mga lalaki.

Ang mga timaan sa modernong teknolohiya motumaw matag karon ug unya. Ang panagsang gagmayng mga ayroplano nga maglupadlupad sa ibabaw ug ang mga sakyanan nga kuwarta-martsa nga magdala sa mga bisita ngadto sa mga langob nakahatag ug kalipay sa batan-on ug tigulang sa baryo. Ang kadaghanan sa pagluto himoon sa gawas diha sa tuloy-tiil itom nga mga kaldero ibabaw sa mga sug-angan. Tungod kay nihit ang kahoyng igsusugnod, ang gipauga nga tai sa baka, mga tangbo, ug pipila ka sangasanga sa kahoy gamiton alang sa sugnod. Ang komon nga mga gamit sa balay nga makita diha niining mga puy-anang langob nag-apil sa kinaraang galingan nga de-mano alang sa paggaling sa mais ug lipak alang sa pagsugkay sa lugaw nga mais.

Ang Lesotho naila sa mga dibuho sa Bushmen, nga makita diha sa daghang langob ug sa mga bato sa tibuok nasod. Ang Bushmen mao ang mga tawo nga unang namuyo sa mga langob sa Ha Kome. Gilarawan sa ilang mga dibuho ang lainlaing mga kalihokan, gikan sa pagpangisda nga dunay mga sakayan ug mga baling ngadto sa lisod nga mga sayaw diin ang mga entrante makita nga nagsul-ob ug maskarang hayop. Gilarawan usab sa mga dibuho ang mga hayop, sama sa mga unggoy, leyon, hipopotamus, ug eland, ang kinadak-ang matang sa osa. Ang kadaghanan sa mga dibuho diha sa mga langob sa Ha Kome nangawala na. Pipila na lamang ang nabilin ingong mga pahinumdom sa paagi sa pagdibuho sa Bushmen.

Usa ka pundok sa mga Saksi ni Jehova ang nakigbahin sa ilang buluhatong pagsangyaw sa usa ka dapit nga dili kaayo layo gikan sa Ha Kome. Matag karon ug unya, sila moduaw sa mga tigpuyog langob, nga naila sa ilang pagkamaabiabihon sa mga bisita. Ang mga Saksi kasagarang dalitan ug usa ka panaksan sa lokal nga linugaw nga gitawag ug motoho. Daghan sa Ha Kome maikagong modawat sa literatura sa Bibliya. Kasagaran ilang ipakita ang ilang apresasyon sa literatura pinaagi sa paghatag ug mga utanon, itlog, ug ubang mga butang ingong mga donasyon alang sa edukasyonal nga buluhaton sa mga Saksi.

Ang modernong-adlawng mga tigpuyog langob dakog pagtahod sa Bibliya ug gustong mosukna ug daghang pangutana bahin sa kinabuhi, kamatayon, ug sa ilang naandang mga pagtuo. Ang kalihokan sa madasigong mga Saksi sa maong dapit miresulta ug ubay-ubayng mga pagtuon sa Bibliya. Niining paagiha, ang mga binhi sa kamatuoran nakakaplag ug tabunok nga yuta diha sa mga kasingkasing niining mapaubsanong mga tawo.​—Mateo 13:8.

[Mapa sa panid 26]

(Alang sa aktuwal nga pagkahan-ay, tan-awa ang publikasyon)

HA KOME