Pagkabuta—Ang Paggamit Niini Diha sa Kasulatan

DAGHANG higayon nga ang pagkarapkarap sa usa ka buta nagsilbi ingong ilustrasyon sa pagkawalay mahimo. (Deuteronomio 28:​29; Lamentaciones 4:​14; Isaias 59:​10; Sofonias 1:​17; Lucas 6:39) Ang mga Jebusihanon masaligon kaayo nga ang ilang kuta dili malumpag mao nga ilang gibiaybiay si David, nga nag-ingong ang ilang mahuyang nga mga buta, bisan tuod sila maluya, makapanalipod sa salipdanan sa Zion batok sa Israel.​—⁠2 Samuel 5:​6, 8.

Ang sayop nga pagpatuman sa hustisya pinaagig hudisyal nga kadunotan gisimbolohan sa pagkabuta, ug dihay daghang tambag sa Balaod batok sa panghiphip, mga gasa, o pagpihig, kay ang maong mga butang makabuta sa usa ka maghuhukom ug makapugong sa di-mapihigong pagpakanaog sa hustisya. “Ang hiphip makapabuta sa mga tawong tin-awg panan-aw.” (Exodo 23:8) “Ang hiphip makapabuta sa mga mata sa mga maalamon.” (Deuteronomio 16:19) Ang usa ka maghuhukom, walay sapayan kon unsa katul-id ug kamasinaboton, mahimong sa tinuyo o dili-tinuyo nga paagi maapektohan tungod sa gasa gikan niadtong nalanggikit sa usa ka kaso. Ang balaod sa Diyos sa pagkamasinaboton nagtagad sa makapabutang epekto dili lamang sa usa ka gasa kondili sa pagbati usab, kay kini nag-ingon: “Dili ka magpihigpihig sa timawa, ug dili mo palabihon ang dakong tawo.” (Levitico 19:15) Busa, tungod ba kaha sa pagbati o tungod sa pagsunod sa popular nga opinyon sa mga tawo, ang usa ka maghuhukom dili mopakanaog sa iyang hukom batok sa mga dato tungod lamang kay sila dato.​—⁠Exodo 23:​2, 3.

Espirituwal nga Pagkabuta

Gipabilhag dako sa Bibliya ang kahinungdanon sa espirituwal kay sa pisikal nga panan-aw. Gigamit ni Jesus ang okasyon sa pag-ayo sa tawong buta gikan sa pagkatawo aron ipasiugda ang pagkabadlongon sa mga Pariseo tungod kay sila nangangkon nga dunay espirituwal nga panan-aw ug tinuyong midumili sa pag-angkon sa ilang buta nga kahimtang. Sila nahisama niadtong nahigugma sa kangitngit inay sa kahayag. (Juan 9:​39-41; 3:​19, 20) Si apostol Pablo misulti sa kongregasyon sa Efeso bahin sa paghimo sa ilang mga mata sa kasingkasing nga nalamdagan. (Efeso 1:​16, 18) Gipasiugda ni Jesus nga kadtong nag-angkong mga Kristohanon apan dili mahunahunaon sa ilang espirituwal nga panginahanglan maoy mga buta ug hubo, nga wala makasabot sa ilang makaluluoy, nagkarapkarap nga kahimtang. (Pinadayag 3:17) Sama nga ang pagpuyo diha sa kangitngit sa taas nga panahon makapabuta sa natural nga mga mata, gipunting ni apostol Juan nga ang usa ka Kristohanon nga nagdumot sa iyang igsoon nagalakaw nga walay tumong diha sa makapabutang kangitngit (1 Juan 2:11); ug si Pedro nagpasidaan nga ang usa nga wala mag-ugmad sa Kristohanong mga bunga, nga ang kinalabwan niini mao ang gugma, maoy “buta, nga nagpiyong sa iyang mga mata ngadto sa kahayag.” (2 Pedro 1:​5-9) Ang tinubdan sa maong kangitngit ug espirituwal nga pagkabuta mao si Satanas nga Yawa, kinsa, nag-usab sa iyang kaugalingon ingon nga manulonda sa kahayag, sa tinuoray mao ang “diyos niini nga sistema sa mga butang” ug ang diyos sa kangitngit nga nagbuta sa mga hunahuna sa mga di-magtutuo aron sila dili makasabot sa maayong balita bahin sa Kristo.​—⁠Lucas 22:​53; 2 Corinto 4:​4; 11:​14, 15.