Tinuod Bang Makadaot Gayod Kini?

SA ATO nang nasabtan, ang Internet naghimo sa pornograpiya nga daling makita sa mga hamtong ug mga bata. Angay ka bang mabalaka? Makadaot ba gayod ang pornograpiya?

Daghan ang naghunahuna nga ang panalagsang pagtan-aw sa pornograpiya dili makadaot. Bisan pa niana, lahi ang gipakita sa tinuod nga mga hitabo. Tagda ang kaso sa usa ka magtiayon nga daw dunay mithianong kaminyoon. May kasegurohan sila sa pinansiyal, ug mahiligon sila sa pagbiyahe. Ang ilang mga higala naghunahuna nga sila suod, mabination, ug debotado, ug sa daghang paagi ingon sila niana.

Apan, ang mga suliran mitungha sa dihang ang bana nagsugod pagtan-awg pornograpiya. Misulat sa usa ka popular nga kolumnistang magtatambag, ang iyang nahingawang asawa naghubit sa iyang mga kabalaka: “Sa dihang [ang akong bana] misugod sa paggugol ug daghang panahon diha sa kompiyuter sa tungang gabii ug sa buntag sayo, giingnan ko niya nga kadto maoy ‘pagpanukiduki.’ Usa ka buntag niana kalit akong misulod sa kuwarto ug nasakpan siya nga nagtan-awg [pornograpiya] . . . Matod niya maukiton lamang siya. Sa dihang gisusi nako pag-ayo ang iyang gitan-aw, gingil-aran ko niana. Naulaw siya ug misaad nga mohunong, ug mituo ako nga tumanon niya kana. Sukad kaniadto siya dungganon gayod​—usa ka tawong motuman sa iyang saad.”

Sama niining tawhana, daghan ang nalangkit sa pornograpiya sa sinugdan tungod sa pagkamaukiton. Kay dili gustong masakpan, mogamit sila sa Internet sa lawom na ang gabii o sa buntag sayo. Kon masakpan sila, kasagarang molimod sila sa ilang gibuhat  pinaagi sa pagpamakak, sama sa gihimo niining tawhana. May si bisan kinsa bang makataronganong makapangangkon nga dili makadaot ang usa ka “pasatiempo” nga magpahinabo sa “usa ka tawong motuman sa iyang saad” sa pagkawatkawat pagtan-awg pornograpiya sa tungang gabii ug pagpamakak sa mga minahal?

Ang maong buhat mahimong mosangpot sa seryosong personal ug pamilyahanon nga mga suliran. Ang uban nangangkon nga ang pagtan-awg pornograpiya nagpugong kanila sa pag-ugmad ug suod nga mga relasyon sa uban. Dili nila gustong dunay mga tawo sa duol samtang nagpatuyang sila sa ilang dakong kaikag sa pornograpiya. Ang mga tawo mokiling sa paghanduraw sa dihang magtan-aw silag pornograpiya, ug ang paghanduraw dili magsangkap sa usa ka tawo sa pag-ugmad ug lig-ong mga relasyon o sa pagdumala sa kinabuhi sa tinuod nga kalibotan. Ang usa ba ka kalingawan nga magpalain sa mga tawo gikan niadtong may pagtagad gayod kanila tinuod nga dili makadaot?

Sa pipila ka kahimtang ang mga tawo nga motan-aw o mobasa ug pornograpikong materyal maglisod gani sa pagtagamtam ug normal nga seksuwal nga relasyon uban sa ilang kapikas. Aron masabtan kon ngano, tagda ang orihinal nga katuyoan sa Diyos alang sa mga minyo. Mahigugmaon niyang gisangkapan ang mga bana ug mga asawa ug katakos sa paghatag ug makalilipayng pagpahayag sa ilang gugma sa usag usa pinaagi sa dungganong seksuwal nga mga relasyon. Ang Proverbio 5:​18, 19 nagpakita nga kini gituyo nga mahimong makapahimuot: “Magmaya uban sa asawa sa imong pagkabatan-on . . . Tugoti nga ang iyang mga dughan magatagbaw kanimo sa tanang panahon. Hinaot nga matugob ka kanunay sa kalipay sa iyang gugma.”

Matikdi nga ang gugma mao ang pasukaranan sa seksuwal nga mga relasyon. Ang usa ba ka tawo nga motan-awg pornograpiya nag-ugmad ug mainit nga bugkos sa gugma ug kasuod? Wala, nagatagbaw siya sa iyang kaugalingong seksuwal nga mga tinguha​—nga nag-inusara, sa kadaghanang kaso. Ang usa ka minyong lalaki nga motan-awg pornograpiya mosugod tingali paglantaw sa iyang kapikas ingong butang lamang​—usa nga naglungtad alang lamang sa iyang kalipay. Lahi kini sa dignidad ug dungog nga gituyo sa Maglalalang nga ihatag sa mga lalaki ngadto sa mga babaye. (1 Pedro 3:7) Ang usa ba ka buhat nga mobalda sa labing pribadong mga bahin sa kaminyoon lantawon nga mapuslanon?

Dugang pa, ang tuyo tingali nga panalagsa lang nga pagtan-aw mahimong mosangpot sa tagdugayng pagkagiyan. Usa ka magsusulat nag-ingon: “Maingon nga ang mga giyanon sa droga nagkinahanglan ug mas isog nga mga droga aron mobatig ‘kalalim,’ ang mga tumatan-aw sa pornograpiya kinahanglang dunay mas lalim pang kasinatian aron makab-ot ang susamang makapaukyab nga pagbati kaniadto.”

Dayag nga mao kanay nahitabo sa bana nga gihisgotan sa sinugdan niining artikuloha. Usa ka gabii niana paglabay sa pipila ka bulan human siya misaad nga mohunong pagtan-awg pornograpiya, ang iyang asawa mipauli ug nakaplagan siya diha sa kompiyuter. Sa iyang linihokan masabtan sa asawa nga dunay dili maayong nahitabo. “[Siya] dayag nga ginerbiyos ug napikal,” siya misulat. “Mitan-aw ako sa kompiyuter, ug tuod man, nagtan-aw siya sa law-ay kaayong materyal. Matod niya sinsero siya sa dihang misaad siya nga moundang na niana, apan dili lang gayod siya makabiya niana.”

Tungod sa kadaot nga mahimong ipahinabo sa pornograpiya ug sa pagkakaylap niini, duna kay balidong katarongan nga mabalaka bahin niana. Sa unsang paagi mapanalipdan nimo ang imong kaugalingon ug ang imong mga anak? Ang kataposang artikulo niining seryeha magkonsiderar nianang pangutanaha.

[Hulagway sa panid 6]

Ang pornograpiya makadaot sa moralidad