Mga Batan-on Nangutana . . .

Angay ba Akong Mopuyo sa Laing Nasod?

“Gusto nakong mopuyo sa laing dapit.”​—Sam.

“Maukiton lang ako. Gusto kong makakita ug bag-ong butang.”—Maren.

“Gisultihan ko sa usa ka suod nga higala nga ang pagbulag ug gamay sa panimalay makaayo nako.”​—Andreas.

“Naghinamhinam ko sa adbentura.”​—Hagen.

IKAW ba naghunahuna sukad sa pagpuyo sa langyawng nasod​—tingali sa temporaryo lang? Matag tuig, linibo ka batan-on ang naghimo gayod niana. Si Andreas nagsulti bahin sa iyang kasinatian sa langyawng nasod: “Gusto kaayo kong himoon kini pag-usab.”

Ang ubang batan-on temporaryong molalin tungod kay buot nilang mokita ug salapi o mokat-on ug langyawng pinulongan. Pananglitan, sa daghang nasod medyo popular ang au pair nga mga programa. Magtugot kini sa batan-ong mga langyaw nga mohimog mga buluhaton sa balay alang sa usa ka pamilya agig bayad sa puy-anan ug pagkaon, ug ilang magamit ang ilang libreng panahon sa pagtuon sa lokal nga pinulongan. Unya adunay mga batan-on nga molalin sa laing nasod aron sa pag-eskuyla. Ang uban molalin sa pagpangitag trabaho aron sila makatabang sa ilang mga pamilya sa pinansiyal. May uban pa nga molalin tungod kay sila dili segurado kon unsay gusto nilang buhaton human sa pag-eskuyla ug gusto nilang magpalabay ug panahon sa laing nasod.

Makapainteres nga ang ubang Kristohanong mga batan-on nanglalin sa mga nasod diin diyutay ra ang mga magsasangyaw, aron sa pagpauswag sa ilang ministeryo. Kon unsa man ugaling ang katarongan sa paglalin, ang pagpuyo diha sa langyawng nasod mahimong usa ka mapuslanong pagtulon-an sa pagkaindependente ingong usa ka hamtong. Makapasangkad kini sa imong pagsabot sa kultura. Basin pa ganig mahimo kang larino sa usa ka langyawng pinulongan​—usa ka butang nga makapadako sa imong mga kahigayonan nga makakaplag ug trabaho.

Bisan pa niana, ang pagpuyo sa laing nasod dili sa tanang panahon usa ka nindot nga kasinatian. Si Susanne, pananglitan, migugol ug usa ka tuig ingong exchange student. Siya miingon: “Segurado ko niadto nga nindot gyod ang akong pag-estar didto gikan sa sinugdan hangtod sa kataposan. Dili diay.” Ang ubang mga batan-on gipahimuslan o nakasugamak ug grabeng mga problema. Busa sa dili pa mag-empake sa imong bagahe, maalamon nga imong timbangtimbangon ang mga bentaha ug mga disbentaha.

Analisaha ang Imong mga Motibo

Ang pagtimbangtimbang sa mga bentaha ug mga disbentaha tino nga maglakip sa pagsusi sa imong mga motibo kon nganong gusto nimong moadto sa laing nasod. Usa ka butang ang pagbiyahe aron sa pagpangagpas sa espirituwal nga mga intereses o sa pagtagad sa mga responsibilidad sa pamilya. Apan sama sa mga batan-on nga gikutlo sa sinugdanan, daghan ang gustong molalin tungod lamang kay gusto nilag adbentura, mas dakong kagawasan, o maglipaylipay. Dili man kana sayop. Kon  buot sabton, ang Ecclesiastes 11:9 nagdasig sa mga batan-on sa ‘pagkalipay sa ilang pagkabatan-on.’ Ugaling, ang bersikulo 10 nagpasidaan: “Kuhaa ang kagul-anan sa imong kasingkasing, ug ipahilayo ang katalagman sa imong unod.”

Kon ang imong motibo sa paglalin ngadto sa usa ka langyawng yuta mao ang paglikay sa mga restriksiyon sa ginikanan, mahimong imong gipadako ang purohan nga masugamak sa “katalagman.” Nahinumdom ka ba sa sambingay ni Jesus bahin sa mausikong anak? Kini naglangkit sa usa ka batan-ong lalaki nga mahakogong milangyaw, dayag nga aron makabaton ug dugang kagawasan. Apan, wala magdugay may katalagmang nahitabo, ug iyang nakaplagan ang iyang kaugalingon nga gigutom, kabos, ug masakiton sa espirituwal.​—Lucas 15:​11-16.

Dayon anaa kadtong gustong molalin tungod kay sila gustong molikay sa mga problema sa balay. Apan, sumala sa gisulat ni Heike Berg diha sa iyang librong What’s Up, “kon ikaw gustong magpalayo tungod lamang kay ikaw dili malipayon . . . ug ikaw nagtuo nga moarang-arang ang kahimtang kon ikaw atua na sa laing dapit​—ayaw kanag hunahunaa!” Sa pagkatinuod, mas maayo nga imong atubangon sa tinuoray ang mga problema. Walay kaayohang mabatonan sa paglikay sa mga kahimtang nga wala nato maangayi.

Ang ubang peligrosong mga motibo mao ang kahakog ug materyalismo. Kay gipalihok sa pangandoy nga makabaton ug bahandi, daghang batan-on ang nagpalambo ug mapagawalon, di-realistikanhong mga ideya sa matang sa kinabuhi diha sa industriyalisadong kayutaan. Ang uban naghunahuna nga adunahan ang tanang taga-Kasadpan. Apan dili gayod kini tinuod. Human molalin, daghang batan-on ang nakakaplag sa ilang kaugalingon diha sa usa ka dili-sinating nasod, nga nakigbisog aron mahaw-as sa kakabos. * Ang Bibliya nagpasidaan: “Ang gugma sa salapi maoy usa ka gamot sa tanang matang sa makadaot nga mga butang, ug sa pagpangab-ot niini nga gugma ang pipila napahisalaag gikan sa pagtuo ug lukop nga nagtusaktusak sa ilang kaugalingon sa daghang kasakit.”​—1 Timoteo 6:10.

Andam Ka na Ba?

Dunay laing butang nga pagatagdon: Hamtong ka na ba gayod aron atubangon ang mga kalisdanan, mga problema, ug kabangian nga motungha unya sa laing nasod? Malagmit kinahanglan kang magpuyo nga may kauban sa kuwarto o uban sa usa ka pamilya ug magpasibo sa ilang rutina. Busa komosta ang imong relasyon sa imong pamilya karon? Ang imong ginikanan moreklamo ba nga ikaw walay konsiderasyon ug makikaugalingon? Ikaw ba himili kon unsay imong kan-on? Unsa ka kaandam sa paghimo sa imong bahin sa buluhaton sa balay? Kon kini lisod nga mga isyu alang kanimo karon, handurawa kon unsa pa gayod ka lisod kini kanimo diha sa usa ka langyawng nasod!

Kon ikaw usa ka Kristohanon, ikaw ba makaarang sa pagmentinar sa imong espirituwalidad? O ikaw ba kinahanglan pang pahinumdoman kanunay sa imong mga ginikanan nga dili pasagdan ang imong pagtuon sa Bibliya, Kristohanong panagkatigom, ug ang buluhatong pagsangyaw? Ikaw ba lig-on na sa espirituwal aron masuklan ang mga kapit-osan ug mga tentasyon didto sa laing nasod nga dili tingali nimo maatubang diha sa imong yutang pinuy-anan? Sa iyang unang adlaw sa eskuylahan diha sa usa ka langyawng yuta, usa ka batan-ong Kristohanon, nga exchange student, giingnan kon asa siya makakuhag ilegal nga mga droga. Sa ulahi gihagad siyang makigdeyt sa usa ka babayeng eskolmet. Didto sa iyang yutang natawhan, ang usa ka babaye dili gayod magpahayag sa iyang interes nga direkta kaayo. Usa ka batan-ong Aprikano nga milalin sa Uropa miingon usab: “Didto sa akong nasod dili ka gayod makakitag imoral nga mga hulagway diha sa publiko. Apan dinhi imo kining makita bisag asa.”  Ang paglalin ngadto sa laing nasod mahimong mosangpot sa espirituwal nga pagkalunod kon ang usa dili “lig-on diha sa pagtuo.”​—1 Pedro 5:9.

Pagkuhag mga Impormasyon!

Sa dili pa molalin, kinahanglang imong makuha ang tanang impormasyon. Ayaw pagsalig sa segunda-manong mga impormasyon. Kon, pananglitan, ikaw nagplanong moapil sa student-exchange nga programa, pilay imong magasto niini? Makurat ka tingali sa pagkahibalo nga sagad kining naglangkit ug linibo ka dolyar. Kinahanglan usab nga imong mahibaloan kon ang edukasyon nga imong madawat sa laing nasod pagailhon diha sa imong nasod. Dugang pa, pagtigom ug daghang impormasyon kutob sa imong maarangan bahin sa maong nasod​—sa mga balaod, kultura, kostumbre niini. Unsang mga gastos ang nalangkit sa pagpuyo didto? Unsang mga buhis ang kinahanglan nimong bayran? Aduna bay mga kapeligrohan sa panglawas nga angay nimong konsiderahon? Tingali makatabang kanimo nga makig-estorya sa mga tawong nakapuyo mismo didto.

Unya anaa ang mahitungod sa puy-anan. Ang mga ginikanan nga maoy mosagop sa mga exchange student kasagarang dili magpaabot ug bisan unsang materyal nga balos. Bisan pa niana, ang pagpuyo uban sa mga tawong wala magtahod sa mga prinsipyo sa Bibliya makapahinabog dagkong mga tensiyon ug mga kabug-at. Ang pagpuyo uban sa mga higala o mga paryente mahimong usa ka kapilian. Apan pag-amping nga dili magpabug-at kanila​—bisan pag gidasig ka nilang magpuyo uban kanila. Kini makadaot o makaguba pa gani sa imong relasyon kanila.​—Proverbio 25:17.

Kon ikaw nagplanong mokitag salapi samtang nagpuyo sa laing nasod, ayaw kalimti ang imong Kristohanong obligasyon sa pagtuman sa sekular nga awtoridad. (Roma 13:​1-7) Ang balaod nagtugot ba kanimong magtrabaho nianang yutaa? Kon mao, ubos sa unsang mga kondisyon? Kon ilegal ang imong trabaho, imong makompromiso ang imong baroganan ingong matinud-anong Kristohanon ug naghimo sa imong kaugalingon nga walay paninugdang proteksiyon, sama sa insyurans sa aksidente. Bisan pag legal ang pagtrabaho, ikaw kinahanglang mag-amping ug magmaigmat. (Proverbio 14:15) Ang walay-prinsipyong mga amo kasagarang mamentaha sa mga langyaw.

Paghimog Desisyon

Nan, tin-aw nga ang desisyon sa paglalin ngadto sa usa ka langyawng yuta maoy usa ka hinungdanong desisyon​—ug dili angayng sayonsayonon lang. Lingkod uban sa imong mga ginikanan, ug timbangtimbanga pag-ayo ang gidahom nga mga kaayohan ug ang posibleng mga kapeligrohan. Paningkamoti nga dili malabwan sa tumang kaikag ang imong panabot. Magmatinud-anon sa pag-analisar sa imong mga motibo. Paminaw pag-ayo sa imong mga ginikanan. Kon buot sabton, sila mobati gihapon nga maoy responsable kanimo, bisan pag ikaw ginatos ka kilometro na ang gilay-on. Malagmit nga ikaw magkinahanglan sa ilang pinansiyal nga suporta aron padayong molampos.

Human matimbangtimbang ang tanang butang, mahimong dili maalamon nga molalin​—labing menos sa pagkakaron. Tingali dili kini makapadasig, apan adunay daghang ubang makaiikag nga mga butang nga imong mahimo. Pananglitan, imo na bang nahunahuna ang posibilidad sa pagduaw sa makaiikag nga mga dapit diha sa imong nasod mismo? O nganong dili sugdan ang pagtuon sa usa ka langyawng pinulongan? Sa ngadtongadto, tingali duna kay kahigayonan nga makaadto sa laing nasod.

Apan, komosta man kon makadesisyon ka gayod sa paglalin? Ang umaabot nga artikulo magahisgot kon sa unsang paagi mapalampos nimo ang imong pagpuyo sa laing nasod.

[Footnote]

[Hulagway sa panid 13]

Ang ubang mga batan-on nanglalin aron sa pagpauswag sa buluhatong pagsangyaw sa Gingharian

[Hulagway sa panid 14]

Pakig-estorya sa imong mga ginikanan bahin sa mga kaayohan ug mga kapeligrohan sa paglalin