Gikan sa Among mga Magbabasa

Droga Ang seryeng “Gikontrolar ba sa Droga ang Kalibotan?” (Nobyembre 8, 1999) maayo kaayong pagkatuki. Nagtrabaho ako ingong usa ka opisyal sa probasyon sa usa ka dapit diin daghang batan-on nga giyanon sa droga. Kining gulaa motabang sa daghan sa pag-undang sa bisyo sa droga.

J. T., Alemanya

Nadasig ako pag-ayo sa sugilanon ni Pedro ug sa iyang asawa, si Ana. Sulod sa unom ka tuig ang droga nagdaot sa akong kinabuhi. Pinaagi sa pagtuon sa Bibliya ug pagsulti sa uban bahin sa akong nakat-onan, nabatonan ko ang espirituwal nga kalig-on sa pag-undang sa bisyo sa droga.

D. J., Tinipong Bansa

Nagatudlo ako sa mga klase sa eskuylahan bahin sa kahimsog sulod na sa 15 ka tuig. Kining gulaa sa Pagmata! tukma gayod sa panahon, sanglit sa pagkakaron kami nagakobre sa ulohan bahin sa alkohol, droga, ug pagmaneho. Seguradong gamiton nako ang impormasyon niining gulaa!

C. J., Tinipong Bansa

Bunga sa Tagua Nabasa ko ang matag isyu sa inyong magasin sukad sa 1954, ug wala gayoy undang ang akong pagkahibulong sa mga artikulo nga naghubit sa nagkadaiyang mga gamit sa mga butang nga gilalang ni Jehova. “Ang Bunga sa Tagua​—Makaluwas ba Kini sa Mga Elepante?” maoy usa sa maong artikulo. (Nobyembre 8, 1999) Salamat sa pagtabang kanamo nga dugang ug dugang maapresyar ang kahibulongang kaalam sa atong Diyos.

D. H., Tinipong Bansa

Pagpang-ungo Salamat kaayo sa artikulong “Unsay Hinungdan sa Pagpang-ungo?” (Nobyembre 8, 1999) Daghang tawo ang naghunahuna nga ang mga ungo maoy maot-ug-dagway ug tigulang. Bisan pa niana ang Wicca nga kalihokan nakadani na karon ug daghang batan-ong mga lalaki ug babaye. Ang ako mismong anak nga babaye misugod sa pagkainteres niini. Hinunoa, siya mihangyog kaugalingon niyang suskrisyon sa Pagmata!, ug ang unang isyu nga miabot naundan niining artikuloha! Miabot kini sa hustong panahon.

B. H., Tinipong Bansa

Mga Anghel Mga pahalipay sa inyong prangkang serye sa mga artikulo nga “Unsa ang Kamatuoran Bahin sa mga Anghel?” (Nobyembre 22, 1999) Sa kataposan adunay usa nga nakabatog kaisog sa pagsulat ug usa ka matinahuron, apan matinud-anon, nga pagyagyag sa mga kapeligrohan nga gimugna sa tinuis nga mga pagtuo bahin sa mga anghel. Gipabilhan ko ilabina ang larawan sa panid 9, nga nagpakita nga ang mga anghel mismo misalikway sa pag-ulog-ulog ug kabantog nga gihatag kanila karon.

J.L.A.H., Brazil

Medikal nga Kalisdanan Ang sugilanon sa pamilyang Major sa artikulong “Nakakat-on Kami sa Pagsalig sa Diyos Latas sa Kasakitan” (Nobyembre 22, 1999) nagdasig kanako. Ang among anak nga lalaki adunay daghang grabeng depekto sa kasingkasing nga nagkinahanglag pagdisdis. Ang mga doktor miingon kanamo, ‘Ang inyong anak mamatay kon dili abonohag dugo!’ Gibulag pa gani ang akong bana ug ako sa mga doktor aron pit-oson pa kami ug dugang aron mouyon sa pag-abonog dugo. Apan sama sa pamilyang Major, kami miampo alang sa kalig-on ug kaisog. Ang among anak nakalabang-buhi sa mga pagdisdis ug maayo na karon. Iyang gipahayag ang iyang tinguha nga mabawtismohan ingong usa sa mga Saksi ni Jehova.

B. C., Tinipong Bansa

Ang akong bana naospital, ug ang mga doktor miingon nga siya mahimong magpabilin didto sulod sa daghang bulan. Gikapoy na ako kaayo sa pag-atiman sa tulo ka anak samtang nagaduaw usab sa akong bana matag adlaw. Ang akong Kristohanong mga igsoong lalaki ug babaye napamatud-ang bililhon sa pagtabang sa akong mga anak. Sa diha nga morag dili na gayod nako maagwanta, ang akong bana nahibalik sa balay. Sa dihang akong gibasa kining makapadasig nga artikulo, dili ko kapugngan ang paghilak sa kinasingkasing nga empatiya ug kasubo tungod sa tanang naagoman sa pamilyang Major. Pagkamalipayon ko gayod sa pagkahibalo kon unsa ka dako ang ilang pagsalig kang Jehova!

J. A., Tinipong Bansa