Gikan sa Among mga Magbabasa

Globonhong Pamatigayon Buot kong pasalamatan kamo pag-ayo tungod sa tin-aw nga impormasyon nga gipresentar sa artikulong “Globonhong Pamatigayon​—Kon sa Unsang Paagi Kini Mag-apektar Kanimo.” (Septiyembre 8, 1999) Karon mas nasabtan nako kon nganong adunay dakong kal-ang tali sa adunahan ug kabos nga mga nasod.

M. Z., Italya

Nagtuon ako bahin sa ekonomiya sa kolehiyo ug mao pay pagkatapos sa topiko bahin sa internasyonal nga pamatigayon. Ang inyong artikulo adunay mga punto nga wala namo hisgoti sa klase. Akong gamiton kini sa akong pasulit sa sunod bulan.

H. N., Zimbabwe

Sayop nga “Laser”? Ang balita diha sa “Pagpaniid sa Kalibotan” nga gitawag ug “Walay-Sakit nga Pagpatambal sa Dentista?” (Oktubre 22, 1999) naghisgot bahin sa paggamit sa “erbium:YAG laser alang sa pag-opera sa ngipon.” Dili kaha kini ang gitawag ug “neodymium:YAG”?

D. B., Canada

Bisan kon ang Academy of Laser Dentistry naghubit sa neodymium:YAG laser ingong “ang labing komong gigamit nga wavelength sa dentistriya,” usa ka artikulo sa “The Journal of the American Dental Association” (Agosto 1997, Tomo 128, mga panid 1080-​7) naghisgot sa paggamit sa erbium:YAG laser sumala sa gihubit sa “FDA Consumer.”​—ED.

“Crossword Puzzle” Mahitungod sa mga crossword puzzle, dili ba mahimong ipatik ninyo ang kompletong mga tubag diha sa mosunod nga isyu? Kanunay nakong basahon pag-una ang magasin ug tubagan ang puzzle sa ulahi, ug lisod ang pagbasa sa panid diin makita ang mga tubag nga dili mopasiplat niana.

J. L., Tinipong Bansa

Among giapresyar ang sugyot. Apan, sanglit ang “Pagmata!” giapod-apod sa balay-balay, daghan sa among mga magbabasa dili makadawat sa mosunod nga mga isyu. Busa gibati namo nga labing maayo nga ipatik ang mga tubag diha sa mao gihapong isyu. Paningkamoti nga dili mopasiplat daan niana!​—ED.

Pagpang-ungo Ako 13 anyos, ug akong nahimamat ang usa ka dalagita sa eskuylahan kinsa nagtuo sa buhat sa pagpang-ungo. Usa ka adlaw niana iya kong gipangutana kon unsay akong hunahuna bahin niini. Ako siyang giingnan nga ako usa sa mga Saksi ni Jehova ug nga ako dili motuo sa paggamit sa okultong mga gahom. Siya naglagot ug gipatungha ang ulohan sa makadaghan sukad niadto. Ako miampo kang Jehova alang sa tabang, ug kini miabot pinaagi sa artikulong “Ang Hunahuna sa Bibliya: Unsay Hinungdan sa Pagpang-ungo?” (Nobyembre 8, 1999) Akong gihatag kaniya ang artikulo, ug sukad nga nabasa kana, wala na niya kuwestiyona ang akong hunahuna bahin sa ulohan.

K. E., Tinipong Bansa

Baho nga Kinaham nga Pagkaon Salamat sa artikulong “Surströmming​—Baho nga Kinaham nga Pagkaon.” (Hulyo 8, 1999) Wala pa gayod kami makadungog bahin niana kaniadto, mao nga kami nakighinabi sa usa ka isigkamagtutuo nga taga-Sweden. Iyang gihubit kining kinaham nga pagkaon sa madasigong mga pulong ug nagsorpresa kanamo pipila ka panahon sa ulahi pinaagi sa paghatag kanamo ug duha ka lata niana. Usa ka grupo kanamo gikan sa lokal nga kongregasyon mihukom nga duyog nga mokaon niini. Gisunod ang pasidaan diha sa artikulo, among giablihan ang mga lata sa gawas diha sa hardin. Maayo na lang nga gibuhat namo kadto. Ang baho grabe pa kay sa among kinangil-arang mga pagdahom! Imposible alang kanamo ang paghimog way-dapigdapig nga pagtimbangtimbang bahin sa lami! Apan salamat sa artikulo, kon wala kana dili gayod namo maagian kadtong dili-makalimtang eksperyensiya.

C. B., Alemanya

RSD Gidangtag duha ka tuig una ako makasulat sa pagpahayag sa akong mga pasalamat tungod sa artikulong “RSD​—Usa ka Makalibog, Masakit nga Balatian.” (Septiyembre 8, 1997) Wala pa gayod ako makadungog bahin sa maong balatian hangtod nga akong nakaplagan nga aduna ako niana sa akong walang bukton. Ang akong pisikal nga terapista miingon nga siya mas daghag nakat-onan gikan sa artikulo kay sa iyang mga pagtuon sa kolehiyo. Buweno, salamat sa artikulo. Nakatabang gayod kini kanako sa pagsagubang.

L.M.K., Tinipong Bansa