Sa Dihang Mobakasyon ang mga Baka!

SINULAT SA KORESPONSAL SA PAGMATA! SA SWITZERLAND

NAHIBALO ka ba nga linibo ka baka sa Switzerland ang mobakasyon kada tuig? Nakita unta nimo kon unsa sila ka malipayon!

Panahon sa bugnaw ug niyebehong mga bulan sa tingtugnaw sa Switzerland, ang gatasang mga baka papuy-on diha sa mga kuwadra. Pagkamakapalipayng kahupayan sa dihang moabot ang tingpamulak ug ang mga baka makagawas ug makasibsib sa lunhawng kabalilihan diin nagkatag ang sulaw-dalag nga mga dandelion. Ang ilang mga pagluksolukso matag karon ug unya daw nagpahayag sa ilang tumang kalipay sa pagkausab sa talan-awon ug panahon.

Pagka-Mayo o sayong bahin sa Hunyo, motungha ang dugang sibsibanan sa dihang makita na ang kabalilihan didto sa mas taas nga mga dapit tungod sa nagkatunaw nga niyebe. Panahon na aron pasibsibon ang mga baka didto sa kabukiran.

Usa ka Yuta sa Daghag-Tubig nga mga Sibsibanan

Sa Switzerland dunay mga 10,000 ka sibsibanan sa mas taas nga mga dapit, nga nagkobreg mga 10,000 kilometro kuwadrado. Kini mokabat ug un-kuwarto sa katibuk-ang luna sa yuta sa nasod. Busa, giseguro pag-ayo nga mapanalipdan kining mapuslanong kahinguhaan.

Ang tawo ug hayop nagtambayayongay aron walay kahoykahoy ug tag-as nga mga sagbot nga manubo sa kabalilihan sa kabukiran. Tungod niini, itugyan sa mga tigbuhig baka ngadto sa propesyonal nga mga tig-alimag hayop ang mga 500,000 ka baka aron atimanon. Ang gatasang mga baka, lakip ang mga nating baka, hakoton sa trak o tren alang sa usa ka bakasyon sa ting-init nga mao ang pagpanibsib sa kabukiran.

Sanglit ang mga dalan ug mga riles dili makaabot sa taas kaayong mga dapit, ang kataposang hugna sa biyahe kinahanglang taposon pinaagig pagbaktas. Ang mga panon sa mga hayop magsigeg irog pataas samtang nagpadayon ang ting-init. Didto, usahay sa mga sibsibanan nga may gihabogong gikan sa 2,000 ngadto sa 2,200 metros ibabaw sa lebel sa dagat, ang mga baka makakaplag ug lami nga balili sa alpino ug matahom nga lainlaig kolor nga mga bulak. Daghag tubod sa bukid, busa walay kakulang sa mainom nga tubig.

Ang maayong gatas nga ipatungha sa mga baka ilugsong usahay sa bukid para pangkonsumo o prosesohon. Apan kini kasagaran nga himoong mantekilya o keso didto mismo sa mga balay sa kilid sa bukid. Sa dihang hapit nang matapos ang ting-init, ang mga panon sa mga hayop dad-on ngadto sa mas ubos nga mga dapit. Sa kataposan ang adlaw moabot​—depende sa klima, kini kasagarang sa hinapos sa Septiyembre​—aron papaulion na ang mga panon sa mga hayop ngadto sa ilang mga puy-anan sa tingtugnaw. Oo, ang ilang bakasyon sa ting-init hapit nang matapos! Apan usa ka linaing parada una ang himoon.

Ang Hinungdanon Kaayong Adlaw!

Dunay gitipigang mga rekord sa kadaghan sa gatas nga napatungha, ug ang mga baka nga molabaw sa tanan dayandayanan sumala sa gidaghanon sa gatas nga ilang gipatungha. Ang baka nga may kinadaghanang gatas nga napatungha maoy manguna sa panon sa pagmartsa pauli. Ang mga ulo sa mga baka adornohan ug mabulokong mga bulak nga ginama sa papel, mga laso, ug mga sanga sa gagmayng mga kahoyng fir. Daghan ang magkulintas ug metal nga mga kampanilya, nga nagpahibalo sa ilang pag-abot gikan sa halayo.

Ang mga tig-alimag hayop magsaulog niining linaing okasyon pinaagig pagsul-ob ug puting mga polo ug binordahang itom nga balhiboong mga dyaket. Sa kasamtangan, didto sa mga walog sa ubos, ang mga molupyo sa uma maghugop ubay sa daplin sa dalan sa pag-abiba sa prosesyon pinaagig pagpamakpak.

Inig-abot sa kapatagan, ang mga baka ibalik ngadto sa ilang tagsatagsa ka mga tag-iya alang sa laing tingtugnaw. Apan, dili magdugay ug moabot na usab ang panahon alang sa laing bakasyon sa kabukiran! Pagkamakalingaw gayod nga kinabuhi!

 [Tibuok-panid nga hulagway sa panid 18]