Nganong Kaylap Kaayo ang Interes sa Espiritismo?

Ang espiritismo gibatbat ingong “pagtuo nga ang usa ka espiritung bahin sa mga tawo magpabiling buhi human mamatay ang lawas ug makakomunikar uban sa mga buhi, nga kasagarang pinaagi sa usa ka espiritista.”

SA 1998 usa ka basahon nga nagsaysay kon unsaon pagkontak ang mga patay napopular kaayo sa Tinipong Bansa mao nga kini dali rang nahimong numero uno sa listahan sa labing himalitang mga basahon sa New York Times.

Pipila ka tuig kanhi sa Moscow, ang mga espiritista ug espiritistikanhong mga tigom maoy gikabuangan sa mga politiko ug mga negosyante, kinsa nagbayad ug mahal alang sa mga pagkonsulta.

Sa Brazil, ang mga drama sa telebisyon nga nagpasundayag ug espiritismo nakadanig daghang tumatan-aw.

Alang sa daghang tawo nga nagpuyo sa Aprika o Asia, ang pagbuhat sa espiritismo naandan na nga sama rag pagpalit diha sa tiyanggihan.

Kon Nganong Daghan ang Modangop sa Espiritismo

Daghan ang modangop sa espiritismo aron makakaplag ug kahupayan human mamatay ang mga minahal. Pinaagi sa mga espiritista sila mahimong makadawat ug linaing impormasyon nga daw naggikan sa mga patay. Tungod niini, ang mga nagbangotan sagad makombinsir nga buhi ang ilang mga minahal ug ang pagpakigkontak sa mga patay makatabang kanila sa pagsagubang sa kasakit nga ilang gibati.

Ang uban nadani sa espiritismo tungod kay giingnan sila nga ang mga espiritu motabang kanila sa pagkaplag ug mga tambal sa mga balatian, paglingkawas sa kakabos, paglampos sa romantikong gugma, pagsulbad sa mga problema sa magtiayon, o pagkaplag ug trabaho. Ug  daghan pang uban ang modangop sa espiritismo gumikan lang sa pagkamausisaon.

Apan, usa pa ka rason kon nganong milyonmilyong tawo ang midangop sa espiritismo mao nga gitudloan sila nga ang espiritismo, sumala pa sa paghubit niana sa usa ka eksperto niining natara, maoy “usa ka suplementong relihiyon” nga naglungtad “duyog sa Kristiyanidad.” Ang relihiyosong kahimtang sa Brazil maoy usa ka pananglitan.

Ang Brazil adunay kinadaghanang populasyon sa Romano Katoliko sa yuta, apan sumala sa pahayag sa awtor nga si Sol Biderman, “milyonmilyong membro ang modagkot ug kandila diha sa simbahan sa Katoliko, maingon man diha sa sentro sa espiritismo ug dili mobati nga nagkasumpaki kini.” Sa pagkatinuod, ang senemanang mantalaan nga Veja sa Brazil nagtaho nga 80 porsiyento niadtong kanunayng moadto sa mga sentro sa espiritismo sa Brazil maoy bawtismadong mga Katoliko nga motambong usab ug Misa. Idugang dinhi ang kamatuoran nga bisan ang ubang mga klero nakigbahin sa espiritistikanhong mga tipontipon, ug masabtan kon nganong daghang magtutuo ang naghunahuna nga giuyonan sa Diyos ang pagpakigkomunikar sa mga espiritu alang sa kahupayan ug giya. Apan giuyonan ba gayod kini?

[Kahon/Mga hulagway sa panid 3]

Lainlaing mga Dagway sa Espiritismo

Ang buhat sa espiritismo tingali maglakip sa pagkonsulta sa espiritista, pagpakisayod sa mga patay, o pagpangitag mga tilimad-on. Ang usa ka iladong dagway sa espiritismo mao ang pagpanagna​—ang pagsulay nga mahibalo bahin sa umaabot o sa mga butang nga wala hisayri pinaagi sa tabang sa mga espiritu. Ang ubang mga dagway sa pagpanagna mao ang astrolohiya, pagtan-aw sa bolang kristal, pagbadbad sa mga damgo, panghimalad, ug pagtagna sa umaabot sa tabang sa mga barahang tarot.