Usa ka Katingalahang Emperador

ANG kinadak-an sa tanang penguin, ang emperador mokabat ug kapin sa usa ka metros ang gitas-on ug motimbang ug hangtod sa 40 kilos. Sa dihang ang ubang mga penguin mopaingon sa amihanan aron makalikay sa grabe, ngitngit nga tingtugnaw sa Antartika, ang mga emperador mopaingon sa habagatan​—sa Antartika! Ngano? Katingalahan, aron mangitlog ug makabaton kini ug kuyabog.

Sa dihang ang baye nga emperador mangitlog, ang laki mohakop dayon niana gikan sa yelo ug ibutang kini sa iyang mga tiil. Iya dayong iluklok kini sa iyang bulsabulsa​—usa ka pilo sa panit sa ubos nga bahin sa iyang tiyan. Dayon ang baye mopaingon sa lawod aron mangitag pagkaon. Sulod sa 65 ka adlaw, panahon sa kinangil-aran nga klima, lumloman sa laki ang itlog samtang nagkonsumo sa kaugalingon niining tambok sa lawas. Aron mapreserbar ang kainit sa lawas samtang girapido sa bagyo nga niyebe nga hayan mokabat ug 200 kilometros kada oras ang gikusgon, kining maalam nga mga langgam magtapok sa dagkong mga grupo, ang matag usa magpulihanay pagpuwesto sa gawas, nga ang likod niini gipaapopa sa hangin.

Uban sa katingalahang paniempo, ang itlog mapusa sa dihang mobalik na ang baye. Apan sa unsang paagi makaplagan niya ang iyang kapikas taliwala sa linibo nga parehog dagway? Pinaagi sa usa ka awit. Sa pagsugod sa ilang panagtratohay, ang paris nag-awitay sa usag usa ug nagsag-ulo sa awit sa usag usa. Sa dihang ang mga baye mamalik, ang mga laki ug baye moawit nga kinasingkasing. Ang mga tawo maglibog gayod sa nagkayabag nga tingog, apan ang mga emperador daling makakaplag sa ilang mga kapikas. Dayon, human sa kontra-gustong pagtunol sa bag-ong napusa nga kuyabog, ang hapit-nang-malunosi nga laki magkindankindang ug magpadailos nga magkulob latas sa mga 45 milyas nga yelo paingon sa lawod aron mangitag pagkaon.

[Picture Credit Line sa panid 31]

By courtesy of John R. Peiniger