Pagtabang Niadtong Dunay MCS

ANG pagkasensitibo sa komon nga mga substansiya, mga cologne man o mga panghinlo, naghatag sa mga tawong nag-antos ug labaw pa kay sa medikal nga problema lamang; naghatag usab kini kanila ug katilingbanong problema. Ang mga tawo kinaiyanhong mahigalaon, apan ang multiple chemical sensitivity (MCS) nagpugos sa daghan untang mabination, mahiligon sa lingawlingaw nga mga tawo nga mahiagom sa masulub-ong estilo-sa-kinabuhi. “May lain pa akong mga sakit kaniadto,” matod ni Shelly, usa ka babaye nga nag-antos sa MCS, “apan kining sakita mao ang kinagrabehan. Ang kinalisdang bahin mao ang pagkanahilain.”

Ikasubo, ang mga tawong nag-antos sa MCS usahay isipong katingad-an. Siyempre, usa ka hinungdan niini mao nga ang MCS maoy komplikado nga talagsaong hitabo nga wala pa makat-oni pagdawat ug pagsagubang sa kalibotan. Apan ang kakulang ug kahibalo bahin sa MCS dili katarongan nga magduda niadtong duna niana. Ang magasing American Family Physician nag-ingon: “Kining maong mga pasyente nag-antos gayod ingong resulta sa ilang mga simtomas.”

Inay kay motamay sa mga tawo nga dunay MCS tungod kay ang ilang balatian makapalibog ug wala kaayo masabti, ang usa ka tawong maalamon kinahanglang giyahan sa prinsipyo nga anaa sa Proverbio 18:​13: “Kon ang usa motubag sa usa ka butang sa wala pa niya madunggi kini, kana maoy kabuangan sa iyang bahin ug usa ka kaulawan.” Pagkamaayo nga ipakita ang samag-Kristo nga gugma ngadto sa tanang nagdaot, nga walay pagpihig! Dili gayod kita magbasol nga gipakita ang maong gugma, bisan unsa pay madiskobrehan sa medikal nga siyensiya sa umaabot.

Pagpakita ug Samag-Kristo nga Gugma

Ang samag-Kristo nga gugma sama sa usa ka brilyante nga dunay matahom nga mga nawong nga mohaom sa matag okasyon o panginahanglan. Sa dihang ang usa ka higala dunay MCS, ang  atong samag-Kristo nga gugma kinahanglang mogilak uban ang empatiya, nga mopalihok kanato nga ibutang ang atong kaugalingon sa iyang dapit. Dugang pa, ang gugma “dili magapangita sa kaugalingon niining kaayohan”​—o, moingon tingali kita, sa kaugalingong mga katungod niini. Unahon niini ang kaayohan sa uban. Motabang kini kanato nga mahimong ‘mapailobon, mainantoson sa tanang butang, motuo sa tanang butang, ug moagwanta sa tanang butang.’ Ang maong gugma “dili gayod mapakyas.”​—1 Corinto 13:​4-8.

Si Mary walay MCS, apan ang pipila niya ka higala duna niana. “Ganahan kaayo ko ug pahumot,” misulat si Mary, “apan dili ko magpahumot kon  moduaw sa akong mga higala nga dunay MCS.” Sa iyang kaugalingong paagi, isip pagsundog kang Jesus, si Mary nag-ingon, “Buot kong motabang.” (Marcos 1:41) Si Trevor dunay MCS sukad sa masuso pa. Ang iyang inahan nag-ingon: “Ang akong mga kauban sa trabaho nanglimbasog nga mahatagag konsiderasyon ang akong anak.” Si Joy, usa sa mga Saksi ni Jehova nga nagpuyo sa Australia ug nag-antos pag-ayo tungod sa MCS, nag-ingon nga siya nadasig sa mga higala ug mga paryente nga kanunayng moduaw kaniya ug magpakita nga sila nakasabot sa iyang mga sakitsakit.

Sa laing bahin, ang mga tawo nga dunay MCS kinahanglang maningkamot nga magmapailobon niadtong magpahumot kon naa sila. Si Ernest, nga gikutlo sa miaging artikulo, miingon sa Pagmata!: “Ang among sakit maoy luwan nga kinahanglan namong pas-anon. Ang ubang mga tawo may mga suliran usab, busa pabilhan namo sa dihang motabang usab sila sa amoa.” Oo, ang paghangyo ug kooperasyon, dili pagpugos niana, kanunayng mao ang kinamaayohang polisa. “Sa dihang dunay tawo nga nagbutang ug pahumot o cologne nga mangutana kanako kon nganong lain ang akong gibati,” matod ni Lorraine, “ako moingon kaniya, ‘Sensitibo ako sa pahumot, ug morag migrabe kini karong gabhiona.’ Sa mga tawo nga dunay katakos sa pag-ila, kasagaran igo na kana.” Siyempre, wala kana magpasabot nga kon nag-antos ka sa MCS dili ka makapahinumdom sa imong mga higala sa malulotong paagi nga nagkinahanglan ka sa ilang tabang.

Sa positibong bahin, si Pam, nga gihisgotan sa sinugdan, misulat: “Ang tanan natong giantos karon temporaryo lamang.” Nganong miingon si Pam nga “temporaryo lamang”? Tungod kay ang iyang pinasikad-sa-Bibliya nga paglaom mao nga sa dili madugay ang Gingharian sa Diyos magpapha sa tanang pag-antos gikan sa yuta. Wagtangon gani niini ang kamatayon​—usa ka butang nga ngadtongadto kinahanglang atubangon sa kinamaayohan ug lawas nga tawo.​—Daniel 2:​44; Pinadayag 21:​3, 4.

Sa kasamtangan, ang tanan nga kinahanglang moagwanta sa usa ka sakit nga walay tambal sa pagkakaron makapaabot sa panahon sa dihang, ilalom sa pagmando sa Gingharian sa Diyos, ‘walay tawo nga moingon: “Ako masakiton.”’ (Isaias 33:24) Samtang giagwanta nato ang bisan unsang mga pagsulay nga modangat kanato niining presenteng sistema sa mga butang, hinaot maningkamot kitang tanan nga mahisama kang Jesus ug itumong ang pagtagad diha sa ganti nga gibutang sa atong atubangan.​—Hebreohanon 12:​2; Santiago 1:​2-4.

[Kahon/Hulagway sa panid 9]

Pagpakitag Gugma sa Usag Usa

Ang mosunod nga mga prinsipyo sa Bibliya motabang kanimo kon usa ka higala o usa ka paryente dunay multiple chemical sensitivity (MCS) o kon ikaw mismo duna niana:

“Busa, ang tanang butang nga buot ninyo nga buhaton sa mga tawo nganha kaninyo, kamo usab kinahanglang magbuhat sa ingon ngadto kanila.”​—Mateo 7:12.

“Higugmaon mo gayod ang imong silingan ingon sa imong kaugalingon.”​—Mateo 22:39.

“Tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug labi pa gayod nga ingon samtang inyong nakita nga ang adlaw nagakaduol na.” (Hebreohanon 10:​24, 25) Kitang tanan nagkinahanglan ug espirituwal nga pagdasig, ilabina sa dihang kita magdaot. Dalayegon nga daghang Kristohanon nga dunay MCS naningkamot sa pagtambong sa mga tigom sa kongregasyon sa personal; ang uban nga mas grabeng nag-antos usahay mamati pinaagi sa telepono. Sa ubang mga kahimtang, ang walay-pahumot nga mga dapit gireserba diha sa mga Kingdom Hall alang sa mga tawo nga dunay MCS. Apan tingali dili kini kanunayng posible o praktikal.

“Ayaw kalimti ang pagbuhat sa maayo . . . , kay sa maong mga halad ang Diyos nahimuot pag-ayo.” (Hebreohanon 13:16) Matikdi nga ang pagbuhat ug maayo kasagarang nagkinahanglan ug personal nga mga pagsakripisyo. Andam ka bang mosakripisyo aron sa pagtabang sa usa ka tawo nga dunay MCS? Sa laing bahin, ang mga tawo nga dunay MCS kinahanglang magmakataronganon sa ilang mga panahom sa uban. Pananglitan, ang Kristohanong mga ansiyano dili makahimog mga lagda bahin sa paggamit ug mga agwa ug mga cologne, ni sila tingali kanunayng makapahibalo bahin niana. Dugang pa, ang bag-ong mga interesado ug mga bisita nga nagpahumot mahimong motambong sa mga tigom​—ug abiabihon nato sila. Tinong dili nato buot nga maulawan sila o pabation silang dili komportable tungod sa ilang paggamit ug pahumot.

‘Pangitaa ang pakigdait ug tinguhaa kini.’ (1 Pedro 3:11) Dayag, ang mga isyu bahin sa panglawas kinahanglang dili maghikaw sa mga Kristohanon sa kalinaw. “Ang kaalam gikan sa itaas maoy . . . makigdaiton, makatarunganon, . . . puno sa kaluoy,” matod pa sa Santiago 3:17. Ang mga tawong makigdaiton, sila man dunay MCS o wala, dili maghinobra o magkinahanglan ug dako maylabot sa paggamit o dili paggamit ug kemikal nga mga produkto. Sa susama, ang mga tawong makataronganon nga “puno sa kaluoy” maglikay usab sa pag-insistir sa ilang katungod nga magpahumot kon ilang naamgohan nga makaapektar kini sa panglawas sa laing tawo. Niining paagiha ilang gipasundayag nga sila usab nangita ug ‘malinawong mga kahimtang’ ug ‘nakigdinaitay.’​—Santiago 3:18.

Sa laing bahin, ang dili-mausab-usab, dili-makataronganon nga tinamdan, sa bahin sa tawong nag-antos sa MCS o sa laing tawo, maoy sama sa usa ka kalso nga makapabahinbahin sa mga tawo. Ang maong tinamdan dili makabenepisyo ni bisan kinsa ug mahimong makadaot pa gani sa relasyon sa usa uban sa Diyos.​—1 Juan 4:20.

Siyempre, ang mga Kristohanon dunay dako kaayong bentaha​—ang espiritu ni Jehova. Samtang regular silang mangayo kang Jehova sa iyang espiritu, ilang maugmad ang maayo kaayong mga bunga niini, ilabina ang gugma​—“usa ka hingpit nga bugkos sa panaghiusa.” (Colosas 3:14) Sa samang panahon, sila mapailobong magtugot nianang maong espiritu sa pagpalambo sa samag-Kristong mga hiyas diha sa uban.​—Galacia 5:​22, 23.

[Hulagway sa panid 10]

Ang mga tawo nga dunay MCS nagkinahanglan ug mga higala sama usab sa uban