Gikan sa Among mga Magbabasa

Ika-20ng Siglo Talagsaon ang Disyembre 8, 1999 nga isyu! Nakapahimulos akog dako niadto, ilabina gikan sa seryeng “Ang Ika-20ng Siglo​—Makuyaw nga Katuigan sa Kausaban.” Kadto maoy matulon-anon ug pintok kaayo. Kini nakapukaw sa akong tinguha nga dugang pang magmaigmat sa espirituwal niining kataposang mga adlaw.

M. V., Pilipinas

Pagpangidnap Pagkamaayong mensahe ang nasulat sa seryeng “Pagpangidnap​—Kon Nganong Usa ka Tibuok-Yutang Hulga”! (Disyembre 22, 1999) Kining artikuloha miabot sa dihang ang kalibotan mahinamong nagbantay sa nahitabong pag-hijack sa ayroplano nga Indian Airlines sa Disyembre 24. Nanghinaot ko nga ang mga awtoridad mobasa ug mopadapat sa mga sugyot nga gihatag diha sa inyong artikulo bahin sa pagkontrolar sa pagpangidnap!

A. S., India

Biktima sa “Coma” Salamat sa kasinatian ni Michiko Ogawa. (“Gipalig-on sa Paglaom sa Paglahutay sa mga Pagsulay,” Disyembre 22, 1999) Naaksidente ang iyang bana sa nag-edad pa akog lima ka adlaw. Ang paghunahuna nga siya walay panimuot sa halos tibuok nakong kinabuhi maorag di-matukib! Nadawat gayod niya ang tabang ni Jehova sa pagmatuto sa duha niya ka batang lalaki ug sa paglahutay nianang masulayong kahimtang.

L. N., Tinipong Bansa

Ang artikulo nakatandog pag-ayo sa akong kasingkasing. Nag-inusara ako sa kinabuhi ug di pa dugayng nahibalo nga ako may kanser. Human mabasa kining artikuloha, gusto nakong halogon si Michiko ug pasalamatan siya sa pagkamatinumanon ngadto kang Jehova bisan pa sa mga pagsulay. Sa sinugdan, sa akong kahimtang, gusto kong mahitabo ang usa ka milagro. Apan karon, sama kang Michiko, gusto ko lang nga matuman ang kabubut-on ni Jehova.

M. S., Tinipong Bansa

Walay-Dugo nga Pagpanambal Ang seryeng “Walay-Dugo nga Pagpanambal ug Operasyon​—Ang Nagdakong Panginahanglan” (Enero 8, 2000) maoy resulta sa abanteng panukiduki. Nagtungha ako sa tunghaan sa pagkanars ug akong gihatag ang magasin ngadto sa usa ka kauban ug sa usa sa akong mga magtutudlo. Sa unang mga okasyon kining mga tawhana nagpakitag pagpihig batok sa mga Saksi ni Jehova. Apan nalipay sila sa pagdawat niining mga artikuloha uban sa dugang impormasyon bahin sa mga Saksi ni Jehova.

R. P., Switzerland

Duha sa akong mga anak naaksidente sa sakyanan sa 1998. Nabali ang bitiis sa akong anak lalaki. Sublisubli niyang gisulti nga dili siya gustog dugo! Apan ang ospital walay kahimanan alang sa walay-dugo nga operasyon. Gibalhin siya sa laing ospital, apan ang kawani sa ospital dili buot moopera gawas lang kon ang iyang hematocrit moabot ug 35. (Kini mius-os pag-ayo ngadto sa 8.1.) Sila tinuyong nagpasagad, morag naghulat na lang sila sa pagtan-aw nga siya mamatay. Bisan pa niana, sa dihang gipadapat nila ang walay-dugo nga mga pamaagi​—giisa ang iyang bitiis, gidapatan ug erythropoietin, ug uban pa​—ang iyang hematocrit miuswag ngadto sa 35.8! Malamposon ang operasyon, apan ang kalangan sa pagtambal nagpahinabo kaniyag dakong permanenteng kadaot. Ako nanghinaot nga ang kada doktor, siruhano, ug anestesiologo pabasahon niining mga artikuloha.

L. L., Tinipong Bansa

Makapahupay ang pagkahibalo nga daghang doktor ang andam sa pagtabang sa mga Saksi ni Jehova. Ako dayong dad-on kining magasina ngadto sa akong doktor. Ako nahibalo nga pabilhan niya kini.

U. M., Tinipong Bansa

Ang artikulo miabot sa hustong panahon nga ako gieskedyul nga operahan. Sa dihang ang akong dugo mius-os tungod sa sobrang pagdugo, akong gigamit kining magasina sa pagsaysay ngadto sa kawani sa ospital ug sa mga membro sa akong pamilya kon nganong dili ko modawat ug dugo. Sa tabang ni Jehova, ako naayo sa bug-os.

C. B., Tinipong Bansa