Makakita Ka ba ug Labaw pa Kay sa Makita sa Imong mga Mata?

ANG mga drayber kasagarang dili makakita sa kasugat nga sakyanan nga anaa sa kurbada. Apan pinaagi sa tabang sa usa ka salamin nga gibutang diha sa kurbada, ang taliabot nga sakyanan makita ug malikayan ang mga aksidente. Sa susama, ang mga tawo dili gayod makakita sa usa ka dili-makita nga Maglalalang. Aduna bay paagi aron masayran nga naglungtad ang maong Usa?

Usa ka unang-siglong magsusulat naghisgot kon sa unsang paagi makita nato ang dili nato makita. Siya nagsulat: ‘Ang dili-makita nga mga hiyas [sa Diyos] tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, bisan ang iyang walay kataposang gahom ug pagka-Diyos, mao nga sila walay-ikapangatarongan.’​—Roma 1:20.

Hunahunaa lang kana. Makita ba nimo ang salabotan nga napabanaag diha sa mga butang sa atong palibot nga dili arang maabot sa tawhanong katakos sa paglalang? Kini bang mga butanga makatabang kanimo sa pagkakita pinaagi sa “mga mata sa pagsabot” nga dunay usa nga mas dako kay sa tawo? Atong hisgotan ang pipila ka pananglitan.​—Efeso 1:​18, King James Version.

Pagkat-on Gikan sa Kalalangan

Nahibulong ka ba sa katahom sa masanag, punog-bituon nga kalangitan sa walay bulan nga kagabhion, nga nakita diha niana ang ebidensiya sa usa ka Dakong Maglalalang? “Ang kalangitan nagapahayag sa himaya sa Diyos; ug ang kawanangan nagsaysay sa buhat sa iyang mga kamot,” matod pa sa naobserbahan sa usa ka tawo sa kakaraanan. “Sa dihang makakita ako sa imong mga langit, ang mga buhat sa imong mga tudlo, sa bulan ug sa mga bituon nga imong giandam,” kining tawhana namalandong, “unsa ba ang may-kamatayong tawo nga ikaw nagahunahuna man kaniya, ug ang anak sa yutan-ong tawo nga ikaw nagaatiman man kaniya?”​—Salmo 8:​3, 4; 19:1.

Natural lamang nga matingala kita sa mga kalalangan nga  sobra kaayo ka kahibulongan nga dili masundog sa mga tawo. Ang usa ka iladong mga pulong sa balak nag-ingon: “Ang Diyos lamang ang makahimog kahoy.” Bisan pa niana, labaw pang kahibulongan mao ang paglalang sa usa ka bata, nga mahitabo nga walay bisan unsang direksiyon sa paglalang gikan sa mga ginikanan. Sa dihang ang binhi gikan sa amahan mahiusa sa usa ka itlog gikan sa inahan, ang mga plano madibuho dayon diha sa DNA sa bag-ong napormang selula aron magama ang usa ka bata. “Kon isulat,” kini nag-ingon, ang mga instruksiyon sulod sa DNA “mopuno ug usa ka libong 600-panid nga mga libro.”

Sinugdanan lamang kana. Ang orihinal nga selula mabahin aron mahimong duha, dayon upat, dayon walo, ug padayon. Human sa mga 270 ka adlaw, usa ka bata nga gilangkoban ug linibo ka minilyong buhing mga selula nga kapin sa 200 ka matang ang mahimugso. Ug hunahunaa lang nga sa sulod niining orihinal nga selula adunay impormasyon sa paghimog tanang matang sa mga selula ug sa paggama niini sa hustong panahon! Ikaw ba napukaw sa pagdayeg sa atong Maglalalang? Matikdi ang pagdayeg nga gihatag sa salmista kinsa nagsulat: “Ikaw mao ang nagbuhat sa akong mga rinyon; gisalipdan mo ako sa sulod sa tiyan sa akong inahan. Pagadayegon ko ikaw tungod kay sa makalilisang nga paagi ako katingalahan nga pagkabuhat.”​—Salmo 139:​13-16.

Kadtong nakatuon niining maong “mga milagro” mibatig kataha. Si Dr. James H. Hutton, kanhi presidente sa Medikal nga mga sosyedad sa mga Estado sa Chicago ug Illinois, miingon nga siya nahibulong sa “madyikanhong katakos [sa selula] sa pagpasa ngadto sa sumusunod nga mga selula sa impormasyon nga buot nilang hularon. Kahibulongan gayod nga ang among mga siyentipiko nga nanukiduki nakahibalo bahin niining mga butanga. Apan usa ka Balaang Salabotan segurado nga mao gayoy nagplano niini nga katingad-anan.”

Si Dr. Hutton nagpadayon: “Ang akong pagkahimong espesyalista usab sa endocrinology, ang pagtuon sa mga obra sa endocrine ug sa mga sakit niini nga mga glandula nakadugang sa akong pagtuo nga usa ka Balaang Gahom ang mao gayoy responsable sa katingalahang pagkakomplikado ug obra niining hinungdanong mga gambalay.” Siya mihinapos: “Ang pagpalandong niining mga katingalahan daw alang kanako maoy dakong katarongan sa pagtuo nga ang usa ka makagagahom-sa-tanan ug nahibalo-sa-tanan maoy nagplano niini nga uniberso, nagpalihok niini ug nagdumala niini.”

Human sa pagsulti niini, si Dr. Hutton nangutana: “Siya ba maoy usa ka personal nga Diyos nga makamatikod sa pagkahulog sa matag usa ka goryon?” Siya mitubag: “Sa usa ka paagi nagduhaduha ako niana. Wala usab ako magtuo nga Siya magtagad sa akong walay-kapuslanang mga kalihokan sa adlaw-adlaw.”

Nganong daghan ang midawat nga makita ang salabotan diha sa “mga milagro” sa paglalang apan nagduhaduha nga naglungtad ang usa ka personal nga Diyos nga nabalaka sa katawhan?

Tinuod Bang May Pagtagad ang Diyos Kanato?

Daghan ang nangatarongan nga kon adunay Diyos, dili niya tugotan nga mag-antos sa hilabihan ang mga tawo. Ang kasagarang pangutana nga ipatugbaw sa pipila mao, “Diin ang Diyos sa dihang nanginahanglan kita kaniya?” Usa ka tawo nga naluwas sa minilyong gipamatay sa mga Nazi sa Gubat sa Kalibotan II naguol kaayo sa pag-antos nga iyang nakita nga siya nakaingon: “Kon makatilap ka pa unta sa akong kasingkasing, mahilo ka gayod.”

Busa alang sa daghan kini maoy usa ka gumonhap. Sama sa naobserbahan sa tawo sa kakaraanan nga gihisgotan sa sinugdan, ang ebidensiya sa usa ka Maglalalang dayag kaayo sa dihang atong tukion ang milagrosong kahikayan ug disenyo sa mga butang. Bisan pa niana, kon Siya usa ka Diyos nga may pagtagad kanato, nganong nakatugot Siya nga maagoman ang grabe nga pag-antos? Aron kita makasabot ug makasimba sa Diyos sa hustong paagi, kita kinahanglang adunay makapatagbawng tubag nianang hinungdanong pangutana. Asa nato kini makita?

Among gidapit kamo sa pagbaton ug usa ka kopya sa brosyur nga Tinuod Bang May Pagtagad ang Diyos Kanato? Diha sa panid 32 niini nga Pagmata!, imong mahibaloan kon unsaon sa pagbaton ug usa. Nagtuo kami nga ang pag-usisag maayo sa mga seksiyong “Kon Nganong Gitugotan sa Diyos ang Pag-antos” ug “Unsa ang Sangpotanan sa Pag-alsa?” mohatag kanimo sa makapatagbawng mga tubag.

[Mga hulagway sa panid 11]

Nakita mo ba niining mga butanga ang ebidensiya sa usa ka Maglalalang?