Pagkadili-Tawhanon sa Tawo—Matapos ba Gayod Kini?

Usa ka kopya sa Marso 8, 2000 nga isyu sa Pagmata! naghisgot bahin sa malisod nga mga problema sa pagpangulipon nga, ikasubo, nagpadayon gihapon sa lainlaing bahin sa kalibotan, gihatag ngadto kang Livia Turco, Ministro sa Social Solidarity sa Italya. Diha sa usa ka sulat ngadto sa sangang buhatan sa mga Saksi ni Jehova sa Italya, siya miingon:

“Ang modernong mga dagway sa pagpangulipon, nga nag-apektar ilabina sa mga babaye ug mga bata, maoy usa ka seryoso kaayong emerhensiya diin minilyon sa mga tawo ang nag-antos gihapon tungod sa dili-tawhanong mga kahimtang.” Siya mihinapos: “Ang matag hunahuna nga gipatugbaw agig kapungot batok niining dili-dalawatong katinuoran maoy bililhon kaayong kontribusyon, ug kon maabot niini ang publiko nga ingon ka daghan kaayo sa magbabasa sa [Pagmata!], kini mas dako pa ug epekto.”

Tungod sa sirkulasyon sa kapin sa 20 ka milyong kopya sa matag isyu sa Pagmata! diha sa 82 ka pinulongan, minilyon sa mga magbabasa ang wala lamang mahatagig impormasyon bahin sa kinaiyahan sa mga problema karon kondili nahatagan usab ug binase-sa-Bibliya nga mga solusyon niini.

Bisan pa, nagpabilin gihapon ang pangutanang, Kon tinuod nga may Diyos, nganong iyang gitugotan ang grabeng pag-antos sa inosenteng mga tawo? Daghan ang natingala, ‘Sa unsang paagi akong mahigugma ang Maglalalang kang kansang kaalam dayag diha sa kahibulongang mga linalang apan daw wala magpakitag kaluoy sa mga tawo karon?’ Ang maong mga pangutana matubag sa makapatagbawng paagi diha sa brosyur nga Tinuod Bang May Pagtagad ang Diyos Kanato? Makahangyo kag kopya pinaagi sa pagpil-ap sa kaubang kupon ug pagpadala niini ngadto sa adres nga gipakita diha sa kupon o sa nahiangayng adres nga nalista sa panid 5 niining magasina.

□ Interesado ako nga makadawat ug kopya sa brosyur nga Tinuod Bang May Pagtagad ang Diyos Kanato?

□ Palihog kontaka ako bahin sa libreng pagtuon sa Bibliya sa balay.