Singkuwenta ka Tuig nga Pagdibuho Diha sa Porselana

SUMALA SA GIASOY NI ALFRED LIPPERT

GUSTO ni Mama nga mahimo kong panday. Apan ang akong maestro nag-awhag kaniya nga paaplayon ko ug trabaho sa pabrika sa porselana nga ginama-sa-kamot duol sa among balay sa Meissen, Alemanya. Nganong miinsistir gayod siya? Ang iyang igmat nga mata nakamatikod nga ako dunay katakos sa pagdibuho. Gimahal ko ang akong inahan, apan nalipay ako nga milampos ang akong maestro sa pagkombinsir sa akong inahan nga mouyon. Busa, sa edad nga 14, nagsugod ako pagtuon kon sa unsang paagi mahimong pintor sa pipila sa kinanindotang ginama-sa-kamot nga porselana sa kalibotan.

Ang porselana gigama sa Meissen sulod na sa duolan sa 300 ka tuig. Ang unang pabrika sa Uropa nga naggama ug tinuod nga porselana gitukod dinhing dapita sa 1710. Mga 30 ka tuig sa ulahi, ang pabrika nagtukod ug tunghaan diin ang mga batan-on mahimong magtuon sa arte sa pagdibuho diha sa porselana. Kining maong tunghaan, nga abli gihapon ug karon gidumala sa Meissen Porcelain Manufactory, mao ang dapit diin ako nagsugod ingong mahadlokong pintor sa porselana.

Sa tunghaan nahashasan usab ang akong katakos sa pagdrowing ug pagdibuho ug mga hulagway sa mga bulak, kahoy, mananap, ug mga langgam. Kining maong kurso sa pagtuon maoy pundasyon sa akong trabaho sa ulahi.

Pasinawon o Dili?

Ang porselana maoy sihag nga seramik nga madibuhoan sa duha ka sukaranang mga paagi. Ang pagdibuho mahimong himoon una pa pasinawon ang seramik. Apan ang wala-pasinawa nga porselana lungagon ug mosuhop sa kolor, busa ang pagdibuho nagkinahanglag hilabihang pagsentro sa pagtagad, sanglit ang kadaghanang mga sayop dili na matul-id. Sa laing bahin, ang pintura mahimong ipahid human pasinawa ang porselana. Ang pagdibuho ug mga dekorasyon nga bulak niining paagiha maoy akong giespesyalisar. Kining trabahoa nag-apil dili lang sa pagdibuho kondili usab sa pagdisenyo ug tagsatagsa ka pungpong nga bulak alang sa matag produkto nga porselana. Busa ang pintor, kay nakakat-on na sa pagsentro sa iyang hunahuna ug paglikay sa mga butang nga makapalinga, makakat-on sa paggamit sa iyang handurawan sa paghimo ug usa ka matahom nga dibuho.

Human magdibuho ug mga dekorasyon nga bulak sulod sa ubay-ubayng katuigan, sa kataposan miuswag ako ngadto sa kinalisdang kategoriya sa tanan​—kanang pagdibuho ug mga hulagway sa buhing mga linalang. Dinhing bahina nga ang akong pagtuon sa sinugdan sa pagdibuho ug mga mananap ug mga langgam napuslan.

 Labing Kulbahinam nga Hagit

Ang pagdibuho ug mga mananap, isda, ug langgam maoy usa ka kulbahinam nga hagit tungod kay ang matag linalang kinahanglang buhi tan-awon, dili kay walay-lihok sama sa bulak o kahoy. Ang dibuhista kinahanglang dunay nahibaloan bahin sa kahulmahan ug mga batasan sa mga mananap ug mga langgam nga iyang ginadibuho. Pananglitan, daghan sa mga esena nga akong gihulagway nagpakita ug ihalas nga mga mananap nga gipangayam, lakip na ang mga osa nga dunay dagkong hugpong sa mga sungay.

Mahitungod sa pagtuon bahin sa mga mananap, ang kinamaayohang paagi mao ang personal nga pagpaniid. Katuigan kanhi nagplano ko nga magdibuho ug serye sa mga hulagway sa isda, busa nagdala akog akuwaryum sa balay ug nagbutang sa tanang matang sa isda diha niana. Ako ug ang akong asawa milingkod duol sa akuwaryum sulod sa daghang oras, nga naniid sa mga lihok ug mga batasan sa kada matang sa isda. Human lamang ako masinati niana nga ako nagsugod sa pagdibuho.

Unsay Kinaiya sa Usa ka Maayong Pintor?

Ang mga higala mangutana usahay kanako kon unsay kinaiya sa usa ka maayong pintor sa porselana. Tin-aw, ang pintor kinahanglang dunay artistikong abilidad, igmat nga mata, ug dili-kurog nga kamot. Apan duna pa siyay gikinahanglan. Aron molampos ingong dibuhista, ang usa ka tawo kinahanglang dunay hustong tinamdan sa iyang kaugalingon, iyang trabaho, ug sa ubang mga tawo. Ang maayong pintor maoy usa ka artisano nga nagbansay sa iyang kaugalingon sa pagpaningkamot nga mapauswag ang iyang kahanas. Nahibalo siya nga kinahanglang gamiton nimo ang imong kahanas kay kondili, kini mawala. Dili siya mohunong sa pagkat-on, sanglit mamati siya sa isulti sa uban ug modawat sa ilang mga tambag.

Aniay kataposang punto. Ang batid nga dibuhista sensitibo sa mga kagustohan sa kustomer. Ang mga tawo nga mopalit ug ginama-sa-kamot nga porselana dili gusto ug ordinaryong produkto nga tipigan sa makadiyot ug unya ilabay ug ilisan. Ang kustomer gustog butang sa arte, usa ka butang nga dunay kultural nga bili​—usa nga makadani sa pagtagad, makapahimuot sa kasingkasing, ug makapauswag sa kalidad sa kinabuhi sa tag-iya niana. Ang pintor malipay nga dunay bahin sa pagtagbaw sa maong mga tinguha.

Pagdibuho Moagak Ngadto sa Pagtuo sa Diyos

Ang akong trabaho ingong pintor naghatag kanakog panukmod nga mosusi pag-ayo sa Bibliya ug sa pag-ugmad ug lig-ong pagtuo sa Diyos. Sa unsang paagi? Aw, usahay magtrabaho ako uban sa mga eksperto sa kinabuhi sa mga langgam, nga magdrowing ug magdibuho ug mga ilustrasyon alang sa mga libro nga ilang gisulat. Sa dihang nagsugod ako pagdibuho sa maong mga ilustrasyon, nagtuo ako sa ebolusyon. Apan ang pagpakigsuod sa ubay-ubayng awtor misangpot ngadto sa mga kabildohay bahin sa sinugdanan sa kinabuhi. Ug ang maong mga kabildohay nagbag-o sa akong panglantaw.

Ang nakaapekto pag-ayo kanako mao nga bisan tuod ang mga eksperto ngatanan nagtuo sa ebolusyon, ang matag usa dunay iyang kaugalingong teoriya, nga kanunayng kasukwahi nianang sa ubang mga eksperto. Sa akong nasabtan, walay parehong teoriya sa ebolusyon. Busa, ako nanghinapos nga kon ang mga eksperto dili magkauyon sa usa ka parehong katin-awan sa ebolusyon, kinsa pay laing makapatin-aw niana? Alang kanako, nahanaw ang akong pagtuo sa ebolusyon. Ang bugtong kapuli sa ebolusyon mao nga ang kinabuhi sa yuta mitungha tungod sa paglalang. Diha nagsugod ang akong pagtuo sa atong Maglalalang.

Nalipay kaayo ako nga ang mga tawo karon mahimuot sa akong trabaho, ug kini naghatag kanakog katagbawan. Dili gayod nako wad-on ang akong hilig sa pagdibuho o ang akong hilig sa porselana.

[Picture Credit Line sa panid 17]

Mga hulagway sa mga panid 16 ug 17: Mit freundlicher Genehmigung der Staatlichen Porzellan-Manufaktur Meissen GmbH