Maayong Paglupad!

“Ang mga paglagiw gikan sa nameligrong depasaherong mga ayroplano mahitabo halos kausa matag semana,” matod pa sa taho sa USA Today. Bisan pag kasagaran niini maoy gagmayng mga panghitabo o sayop nga alarma, mas sayon ang paglagiw kon imong sundon ang mosunod nga mga sugyot:

● PAGSUL-OB  UG ANGAYNG BESTI.  Pagsul-ob ug sinina nga komportable ug magtugot kanimo nga sayon makalihoklihok. Kinahanglang matabonan sa sinina ang dakong bahin sa imong panit kon posible. Gisugyot nga magsul-ob ug mga karsones ug mga pang-ibabaw nga tag-as ug bukton. Pagsul-ob ug mga sinina nga ang panapton ginama sa natural nga materyales, sama sa de hilo, balhibo sa karnero, maong, ug panit. Ang artipisyal nga mga panapton, sama sa rayon, polyester, ug naylon (ilabina medyas o estaking), malanay kon madangdang sa init, nga may purohang maoy hinungdan sa grabeng mga paso sa lawas ug mga tiil.

● ANDAMA  ANG HUNAHUNA.  Hunahunaa kon unsay imong buhaton kon pananglit may emerhensiya. Sa dihang makalingkod na, timan-i ang kinadul-ang mga pultahan alang sa emerhensiya, sa unahan ug sa likod sa lumbay nga imong gilingkoran. Pamati sa detalyadong mga instruksiyon alang sa kahilwas nga ipasundayag sa atendant sa ayroplano sa dili pa mogikan. Basaha pag-ayo ang tarheta sa kahilwas nga naghatag ug mga detalye bahin sa mga pamaagi sa paglagiw.

● AYAW  KATARANTAR.  Kon dunay emerhensiya, pabiling kalmado ug sunda ang mga instruksiyon sa mga tripulante. Kon gikinahanglang mokalagiw, ibilin ang imong mga gamit ug adto sa kinadul-ang pultahan alang sa emerhensiya.

● PAG-AMPING  SA PAGLAGIW GIKAN SA NAMELIGRONG AYROPLANO.  Ambak nga nag-una ang tiil ngadto sa padailosan imbes molingkod aron mopadailos. Ikiyugpos ang imong mga kamot. Kipia ang imong paa ug tiil, ug huboa ang mga sapatos nga talinis ug mga takon. Sa makaabot ka na sa yuta, palayo sa ayroplano, ug pagbantay sa pag-abot sa pang-emerhensiyang mga sakyanan.

Ang pagsunod ba niining maong mga instruksiyon makatabang sa pagpamenos sa mga katalagman? Oo! “Dili tanang aksidente sa ayroplano makamatay,” nag-ingon ang Intercom nga pulyeto sa Federal Aviation Administration. Kini midugang: “Halos 50 porsiyento sa tanang katalagman sa depasaherong mga ayroplano maoy mga aksidente nga puwedeng maluwas ang mga pasahero.”