“Gisulat Ninyo ang Bahin sa Akong Kinabuhi!”

Latas sa katuigan, ang Pagmata! nagpatik ug mga artikulo mahitungod sa lainlaing mga sakit. Hinuon, ang Pagmata! dili usa ka magasin bahin sa panglawas, ug busa wala kini magpasiugda sa usa ka tambal nga labaw kay sa lain. Bisan pa niana, sa paghisgot sa usa ka sakit, kining magasina naningkamot sa pagbatbat sa suliran, pag-ila sa mga hinungdan niini, ug pagtaganag Kasulatanhon ug praktikal nga tambag alang sa kaayohan sa mga masakiton ug sa ilang mga tig-atiman.

Pananglitan, ang artikulong “Pagsabot ug Pag-antos sa Fibromyalgia” napatik sa isyu sa Hunyo 8, 1998, ug kadto nagpatunghag tibuok-kalibotang reaksiyon. Sa pagkatinuod, ang mga sulat sa apresasyon nadawat daghang bulan pa human sa pagkapatik sa artikulo. “Gibati ko nga samag ang usa ka bukid naalsa gikan kanako,” misulat ang usa ka babaye. “Morag gisulat ninyo ang bahin sa akong kinabuhi!” misulat ang lain, nga midugang, “Nahibalo na ako karon kon unsaon pagsagubang niining sakita.”

Ang mga propesyonal nakaangay usab sa artikulo. Ang senyor nga bise-presidente sa medikal nga kahikayan alang sa Arthritis Foundation sa Tinipong Bansa misulat: “Sa akong hunahuna ang artikulo bahin sa fibromyalgia maoy balanse, kompleto, ug maayo kaayo. Gidayeg ko usab ang pagsukip sa mga kinutlo sa Bibliya ug sa pagkahinungdanon sa pagtuo diha sa maong sakit ug sa tanang ubang medikal nga mga kahimtang.”

Daghang ubang mga sulat ang nadawat. Ang mosunod mao ang pipila ka kinutlo.

“Ang akong doktor nagdasig kanako sa pagbasa sa tanang akong makaplagan bahin sa ulohan. Ang inyong artikulo mao ang labing maayo nga akong nabasa sukad.”​—L. R.

‘Daghan ang nangutana kanako bahin sa akong sakit. Kasagaran hatagan ko silag usa ka pulyeto. Karon ikapunting ko sila sa maong isyu sa Pagmata! Bug-os nga walay sama ka makapahupay!’​—K. K.

‘Ang artikulo nagpalig-on kanako nga ako dili usa ka pakyas nga tawo ug nga si Jehova nag-isip gihapon kanako nga bililhon.’​—D. C.

“Gibati ko nga samag, sa unang higayon, ang uban nakasabot kon unsay akong nasinati.”​—C. H.

‘Makapahupay ang pagkahibalo nga kami wala mag-antos nga nag-inusara.’​—C. A.

‘Nasubo kaayo ako nga dili na ako makabuhat sama sa nangagi. Ibutang ko kining artikuloha duol sa akong higdaan aron makabasa ako niini nga balikbalik sa dihang gikinahanglan ko ang pagdasig.’​—K. B.

‘Hangtod karon, kutob sa mahimo dili ko tagdon ang sakit, magbuhat ko kutob sa maarangan, ug unya makuyapan. Ang inyong paagi maorag mas maayong paagi.’​—M. C.

“Ako 14 anyos, ug nadayagnos ako nga may fibromyalgia sa dihang 12 anyos ako. Nanglugmaw ang mga luha sa akong mga mata sa pagkahibalo nga si Jehova matinagdanon kanato. Palihog ipadayon ang pagsulat sa makapadasig nga mga artikulo sama niini!”​—K.A.M.