Akong Pangunang Kabalaka—Ang Pagpabiling Maunongon

SUMALA SA GIASOY NI ALEXEI DAVIDJUK

Ang tuig maoy 1947; ang dapit, pipila ka milya gikan sa among balangay sa Laskiv, Ukraine, duol sa utlanan sa Polandia. Ang akong edarang higala nga si Stepan nagserbisyo ingong mensahero nga nagpayuhot ug literatura sa Bibliya gikan sa Polandia ngadto sa Ukraine. Usa ka gabii niana nakita siya sa guwardiya sa utlanan, nga migukod, ug mipusil kaniya. Napulog-duha ka tuig sa ulahi ang kamatayon ni Stepan nakahimog dakong epekto sa akong kinabuhi, segun sa akong isaysay unya.

SA AKONG pagkatawo sa Laskiv sa 1932, napulo ka pamilya sa among balangay maoy mga Estudyante sa Bibliya, sumala sa pagtawag sa mga Saksi ni Jehova kaniadto. Lakip kanila mao ang akong mga ginikanan, nga nagpakitag maayong panig-ingnan sa pagkamaunongon kang Jehova hangtod sa ilang kamatayon sa tungatunga sa katuigang 1970. Sa tibuok nakong kinabuhi, ang pagkamaunongon ngadto sa Diyos mao ang akong pangunang kabalaka usab.​—Salmo 18:25.

Sa 1939, ang tuig sa pagsugod sa Gubat sa Kalibotan II, ang dapit nga among gipuy-an sa silangang Polandia gisakop sa Unyon Sobyet. Nailalom kami sa Sobyet nga pagmando hangtod sa Hunyo 1941, sa dihang ang mga Aleman misulong ug misakop sa among dapit.

Panahon sa Gubat sa Kalibotan II, dihay mga panahong ako naglisod sa eskuylahan. Ang mga bata gitudloan sa pag-awit sa nasyonalistikong mga awit ug sa pagpakigbahin sa mga pagbansaybansay sa militar. Ngani, bahin sa among pagbansay naglakip sa pagkat-on kon unsaon paglabay ug mga granada. Apan midumili ako pag-awit sa patriotikanhong mga awit ug pagpakigbahin sa bisan unsang pagbansay sa militar. Ang pagkakat-on diha sa linghod nga pangedaron sa pagdepensa sa akong gipasukad-sa-Bibliya nga mga tinuohan mitabang kanako sa pagpabiling maunongon sa Diyos sa misunod nga katuigan.

Dihay daghang interesado sa kamatuoran sa Bibliya sa teritoryo sa among kongregasyon mao nga duha ka payunir, sumala sa pagtawag sa bug-os-panahong  mga ministro sa mga Saksi ni Jehova, ang gitudlo sa among lugar aron moabag sa pagtudlo kanila. Usa sa mga payunir, si Ilja Fedorovitsch, maoy nagtuon usab kanako sa Bibliya ug nagbansay kanako sa ministeryo. Panahon sa Aleman nga okupasyon, si Ilja gipagawas sa nasod ug gibilanggo sa usa sa mga kampong konsentrasyon sa Nazi, diin siya namatay.

Pakigbisog ni Papa sa Pagpabiling Neyutral

Sa 1941 ang Sobyet nga mga awtoridad mipugos kang Papa sa pagpirmag dokumento nga nagsaad sa pagbayad ug salapi aron makaabag sa pagtaganag panalapi sa gubat. Iyang giingnan sila nga dili siya makasuportar sa bisan haing kiliran sa gubat ug nga ingong alagad sa tinuod nga Diyos, siya magpabiling neyutral. Si Papa giisip nga kaaway ug gisentensiyahag upat ka tuig sa bilanggoan. Apan nabilanggo lamang siyag upat ka adlaw. Ngano? Tungod kay pagka-Dominggo human sa iyang pagkasulod sa bilanggoan, ang Aleman nga kasundalohan miokupar sa lugar nga among gipuy-an.

Sa pagkadungog sa mga bantay sa bilanggoan nga ang mga Aleman duol na, giablihan nila ang mga pultahan sa bilanggoan ug mikalagiw. Didto sa gawas, kadaghanan sa mga binilanggo gipamusil sa mga sundalong Sobyet. Si Papa wala dayon migawas apan sa ulahi miikyas ngadto sa balay sa mga higala. Gikan didto iyang gipasugoan si Mama nga dad-on ang iyang mga dokumento, nga nagpamatuod nga siya nabilanggo tungod sa pagdumili nga mosuportar sa mga Sobyet diha sa gubat. Sa pagpakita ni Papa niini ngadto sa Aleman nga mga awtoridad, ilang gisalbar ang iyang kinabuhi.

Ang mga Aleman buot mahibalo sa mga ngalan sa tanang tawo nga mitabang sa mga Sobyet. Ilang gipig-otan si Papa aron ibutyag sila, apan siya midumili. Gisaysay niya ang iyang baroganan bahin sa neyutralidad. Kon iya pang gitug-an ang bisan kinsa kanila, lagmit nga sila gipamusil. Busa, ang neyutralidad ni Papa nakaluwas usab sa kinabuhi sa ubang mga tawo, nga mapasalamaton kaayo kaniya.

Tinagotago nga Paglihok

Ang mga Sobyet mibalik sa Ukraine sa Agosto 1944, ug sa Mayo 1945 ang Uropanhong hugna sa Gubat sa Kalibotan II natapos. Human niana ang gitawag ug Iron Curtain naghimo kanamo didto sa Unyon Sobyet nga nahilain gikan sa ubang bahin sa kalibotan. Lisod bisan ang pagpadayon sa pakigkontak sa mga Saksi ni Jehova saylo sa utlanan sa Polandia. Ang maisogong mga Saksi miyuhot sa utlanan ug mibalik dala ang pipila ka bililhong mga magasing Bantayanang Torre. Sanglit ang utlanan maoy otso kilometros lamang gikan sa among balay sa Laskiv, akong nabalitaan ang mga kapeligrohan nga nasinati niining mga mensaheroa.

Pananglitan, usa ka Saksing ginganlag Silvester kaduha miyuhot ug mibalik sa matag higayon nga walay kakulian. Apan sa ikatulong panaw, nasiplatan siya sa patrolya sa utlanan ug sa ilang guwardiyang mga iro. Gisinggitan siya sa mga sundalo nga mohunong, apan si Silvester midagan aron mabuhi. Ang iyang mahimo lamang aron malikayan ang mga iro mao ang pag-ubog sa lanaw nga diha sa duol. Gigugol niya ang tibuok gabii nga nag-ubog kutob sa liog, nga nagpasalipod sa tag-as nga mga tambo. Sa kataposan, sa dihang milunga pagpangita ang patrolya, si Silvester nagsampiray sa pagpauli, nga gikutasan.

Sumala sa giasoy ganina, ang pag-umangkon ni Silvester nga si Stepan gipatay samtang misulay sa pagtabok. Apan, importanteng magpadayon kami sa pagkontak sa katawhan ni Jehova. Gumikan sa mga paningkamot sa maisogong mga mensahero, nakadawat kamig espirituwal nga pagkaon ug mapuslanong pagtultol.

Sa pagkasunod tuig, sa 1948, gibawtismohan ako sa kagabhion diha sa gamayng lanaw duol sa among pinuy-anan. Kadtong mga bawtismohanan nagtigom sa among balay, apan wala ko makaila kon kinsa sila, tungod kay ngitngit kadto ug ang tanan gipahigayon nga sekreto. Kaming mga kandidato sa bawtismo wala mag-estoryahanay. Wala ko mahibalo kon kinsay nagpakigpulong sa bawtismo, kon kinsay nagsukna kanako sa mga pangutana sa bawtismo samtang nagbarog kami sa tampi sa lanaw, o kon kinsay nagtuslob kanako. Katuigan sa ulahi, sa dihang nagtandi ug mga impormasyon uban sa usa ka suod nga higala, among nakaplagang kauban diay kami sa mga gibawtismohan niadtong gabhiona!

Sa 1949 ang mga Saksi sa Ukraine nakadawat ug mensahe gikan sa Brooklyn nga nagdasig kanila nga mopetisyon sa Moscow aron himoong legal ang pagsangyaw nga buluhaton sa Unyon Sobyet. Sa pagtuman sa maong pagtultol, ang petisyon gipadala pinaagi sa ministro sa interyor sa Presidium of the Supreme Soviet of the U.S.S.R. Human  niadto si Mykola Pyatokha ug Ilya Babijchuk gisugo sa pag-adto sa Moscow aron kuhaon ang tubag sa gobyerno sa among petisyon. Sila miuyon ug mibiyahe paingon sa Moscow niadtong ting-inita.

Ang opisyal nga midawat niadtong delegasyona naminaw samtang ilang gihatag ang gipasukad-sa-Bibliya nga rason sa among buluhaton. Ilang gisaysay nga ang among buluhaton gihimo isip katumanan sa tagna ni Jesus nga “kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran.” (Mateo 24:14) Bisan pa niana, ang opisyal miingon nga dili gayod kami ilhon sa Estado.

Ang mga Saksi mipauli ug miadto sa Kiev nga mao ang kaulohan sa Ukraine aron makuha ang legal nga pag-ila sa among buluhaton dinhi sa Ukraine. Sa makausa pa gidumilian sa mga awtoridad ang hangyo. Sila miingon nga ang mga Saksi ni Jehova magmalinawon lamang kon ilang paluyohan ang Estado. Ang mga Saksi, matod nila, kinahanglang mosilbi sa armadong puwersa ug moapil sa mga piliay. Gisaysay na usab ang among baroganan sa neyutralidad, nga mao, isip pagsundog sa among Agalon, si Jesu-Kristo, kami kinahanglang dili bahin sa kalibotan.​—Juan 17:​14-16.

Wala madugay human niana, si Igsoong Pyatokha ug Babijchuk gidakop, gipasakaag sumbong, ug gisentensiyahan ug 25 ka tuig nga pagkabilanggo. Halos dungan niadtong panahona, sa 1950, daghang Saksi, lakip ang akong amahan, ang gipangdakop sa mga awtoridad. Gisentensiyahan siyag 25 ka tuig nga pagkabilanggo ug gidala sa Khabarovsk sa kasadpang tumoy sa Unyon Sobyet nga halos 7,000 kilometros ang gilay-on!

Gidestiyero sa Siberia

Dayon sa Abril 1951, ang Estadong Sobyet mihimog organisadong aksiyon batok sa mga Saksi diha sa mga republika niini sa kasadpan nga karon nailhan ingong Latvia, Estonia, Lithuania, Moldova, Belarus, ug Ukraine. Nianang bulana, mga 7,000 kanamo, apil si Mama ug ako, gidestiyero sa Siberia. Basta na lang miabot ang mga sundalo sa among pinuy-anan sa kagabhion ug midala kanamo ngadto sa estasyonan sa tren. Didto gitrangkahan kami sulod sa mga bagon sa baka​—mga 50 ka tawo sa usa ka bagon​—ug kapin sa duha ka semana sa ulahi, kami gipakanaog sa dapit nga ginganlag Zalari, duol sa Lake Baikal sa distrito sa Irkutsk.

Nagbarog sa niyebe nga nangamig sa katugnaw sa hangin ug gilibotan sa armadong kasundalohan, ako namalandong kon unsay among dangatan. Unsaon man nako pagpabiling maunongon kang Jehova dinhi? Misugod kami pag-awit ug mga awit sa Gingharian aron among malimtan ang katugnaw. Unya nangabot ang mga manedyer sa mga negosyong gipanag-iya sa estado sa maong dapit. Ang uban nagkinahanglag mga lalaki alang sa mga trabahong pakusog, samtang ang uban nagkinahanglag mga babaye para sa mga trabaho sama sa pag-atiman sa mga hayop. Si Mama ug ako gidala ngadto sa konstruksiyon diin gitukod ang Tagninskaya Hydroelectric Power Station.

Sa among pag-abot, among nakita ang naglinyang mga kuwartel nga kahoy, nga maoy puy-anan sa mga gidestiyero. Gitudlo ako nga motrabaho isip drayber sa traktor ug elektrisyan, ug si Mama gipabaol. Kami opisyal nga giklasipikar nga mga pinalagpot, dili ingong mga binilanggo. Busa libre kaming makalakawlakaw diha sa duol sa planta sa koryente, bisan tuod gidid-an kami pagduaw sa sunod nga mga puy-anan mga 50 kilometros ang gilay-on. Gipig-otan kami sa mga awtoridad sa pagpirmag deklarasyon nga nag-ingong magpabilin kami hangtod sa hangtod. Kadto morag sobra na ka dugay para nako, usa ka 19 anyos, busa wala ako mopirma. Sa gihapon, nagpabilin kami sa maong dapit ug 15 ka tuig.

Didto sa Siberia ang kalay-on sa Polakong utlanan dili lamang anaa sa otso kilometros gikan sa among nahimutangan kondili kapin sa 6,000 kilometros! Kaming mga Saksi naningkamot pag-ayo sa pag-organisar sa among kaugalingon aron mahimong mga kongregasyon na usab, nga nagtudlog mga lalaki nga manguna. Sa sinugdan, kami walay literatura sa Bibliya gawas lamang sa pipila ka basahon nga nadala sa ubang mga Saksi gikan sa Ukraine. Gikinamot kini pagkopya, ug among gipasa kini tali kanamo.

Sa wala madugay nagsugod kami sa paghimog mga tigom. Sanglit daghan kanamo nagpuyo diha sa mga kuwartel, nagtigom kami halos kada gabii. Ang among kongregasyon gilangkoban ug mga 50 ka tawo, ug ako gitudlo nga modumala sa Tunghaan sa Teokratikanhong Ministeryo. Diha ray pipila ka lalaki sa among kongregasyon, busa ang mga babaye mohatag usab ug mga pakigpulong sa estudyante, nga maoy usa ka paaging gitudlo ngadto sa mga kongregasyon sa mga Saksi ni Jehova sulod sa  tuig 1958. Ang tanan ugdang nga naghatag sa ilang mga asaynment, nga nag-isip sa tunghaan ingong usa ka paagi sa pagdayeg kang Jehova ug sa pagdasig sa uban diha sa kongregasyon.

Gipanalanginan ang Among Ministeryo

Sanglit kauban namo pagpuyo sa kuwartel ang mga dili-Saksi, walay adlaw nga molabay nga kami dili makasulti sa uban bahin sa among pagtuo, bisan tuod kadto estriktong gidili. Human mamatay si Joseph Stalin, ang primer ministro sa Sobyet, sa 1953, ang mga kahimtang miarang-arang. Gitugotan kami sa pagsangyaw nga mas dayag ngadto sa uban bahin sa among gipasukad-sa-Bibliya nga mga tinuohan. Pinaagig mga sulat sa mga higala sa Ukraine, among nasayran kon hain nahimutang ang ubang mga Saksi sa among dapit ug nakigkontak kanila. Nakapaarang kini kanamo sa pag-organisar sa among mga kongregasyon ngadto sa mga sirkito.

Sa 1954, ako naminyo kang Olga, nga gidestiyero usab gikan sa Ukraine. Latas sa katuigan dako kaayo ang iyang pagpaluyo kanako sa akong pag-alagad kang Jehova. Ang igsoong lalaki ni Olga, si Stepan, mao ang gipatay didto sa utlanan tali sa Ukraine ug Polandia sa 1947. Sa ulahi nahimugso ang among anak nga babaye, si Valentina.

Si Olga ug ako nakatagamtam sa daghang panalangin sa among Kristohanong ministeryo sa Siberia. Pananglitan, among nahimamat si George, nga pangulo sa usa ka grupong Baptist. Kanunay namo siyang giduaw ug gitun-an sa bisan unsang mga magasing Bantayanang Torre  nga nabatonan. Sa wala madugay nasabtan ni George nga ang gisangyaw sa mga alagad ni Jehova gikan sa Bibliya mao ang kamatuoran. Gisugdan usab namo pagtuon ang daghan sa iyang mga higalang Baptist. Nahinam kami pag-ayo sa dihang si George ug ubay-ubay sa iyang mga higala nabawtismohan ug nahimong among mga igsoon sa espirituwal!

Sa 1956, ako gitudlo ingong nagapanawng magtatan-aw, nga kinahanglang moduaw ako ug usa ka kongregasyon sa among dapit kada semana. Motrabaho ako sa tibuok adlaw ug mogikan inigkagabii sakay sa akong motorsiklo aron makigtigom sa kongregasyon. Sayo sa pagkasunod buntag, ako mobalik ug motrabaho. Si Mykhailo Serdinsky, nga gitudlo sa pagtabang kanako sa nagapanawng buluhaton, namatay sa aksidente sa dalan sa 1958. Namatay siya sa Miyerkoles, apan among gilangan ang paglubong kaniya hangtod sa Dominggo aron mahatagag kahigayonan ang daghang Saksi nga makatambong kutob sa mahimo.

Sa dihang ang among dakong grupo misugod pagbaktas ngadto sa menteryo, ang mga membro sa State Security misunod. Ang pagpakigpulong nga nagkobre sa among gipasukad-sa-Bibliya nga paglaom sa pagkabanhaw nagpasabot nga kami nameligro nga dakpon. Apan ako natukmod sa pagpamatuod bahin kang Mykhailo ug sa iyang talagsaong mga palaaboton. Bisan tuod akong gigamit ang Bibliya, ang State Security wala modakop kanako. Dayag ilang gibati nga dili kadto makahatag nila ug kaayohan, ang tinuod ila na usab akong nailhan pag-ayo, sanglit kanunay na nila akong “bisita” sa ilang hedkuwarter aron masukitsukit.

Gibudhian sa Usa ka Impormer

Sa 1959 ang State Security midakop sa 12 ka Saksi nga maoy nanguna sa buluhatong  pagsangyaw. Daghan pang uban ang gipatawag aron sukitsukiton, ug ako naapil. Sa dihang miabot na ang akong turno nga sukitsukiton, ako nalisang nga naminaw sa mga opisyales nga nagbutyag sa kompidensiyal nga mga detalye sa among buluhaton. Giunsa man nila pagkahibalo niining mga butanga? Seguradong dihay impormer, usa ka tawo nga daghag nahibaloan bahin kanamo ug taudtaod nang nagtrabaho alang sa Estado.

Ang 12 nga gipangdakop gibanlod sa dug-ol nga mga selda, ug sila nagkasabot nga dili na gayod mosultig usa ka pulong ngadto sa mga awtoridad. Nianang paagiha ang impormer kinahanglang personal nga motambong sa husay aron mosaksi batok kanila. Bisan tuod ako wala isumbong, ako miadto sa korte aron makita kon unsay mahitabo. Ang huwes misuknag mga pangutana, ug ang 12 wala motubag. Dayon usa ka Saksi nga ginganlag Konstantyn Polishchuk, nga kaila nako sulod na sa daghang tuig, mitestigo batok sa 12. Natapos ang husay nga ang ubang mga Saksi nakadawat ug mga sentensiya sa pagkabilanggo. Didto sa dalan gawas sa korte, akong gisukmatan si Polishchuk.

“Nganong imo man ming gibudhian?” Ako misukna.

“Tungod kay wala na ko magtuo,” siya mitubag.

“Unsa may wala na nimo tuohi?” Ako misukna.

“Dili na ko makatuo pa sa Bibliya,” siya mitubag.

Mahimo untang budhian usab ako ni Polishchuk, apan sa iyang pagtestigo wala niya gisulti ang akong ngalan. Busa ako siyang gipangutana kon nganong wala niya kadto himoa.

“Dili ko gustong mabilanggo ka,” siya misaysay. “Gihasol pa gihapon ko bahin sa igsoon sa imong asawa, si Stepan. Ako ang responsable sa pagpatabok kaniya sa utlanan niadtong gabhiona nga siya gipatay. Gikasubo ko kana pag-ayo.”

Ang iyang mga pulong nakapalibog kanako. Nakubalan na gayod ang iyang tanlag! Nagbasol siya sa kamatayon ni Stepan, unya karon iyang gibudhian ang mga alagad ni Jehova. Wala na nako makita pag-usab si Polishchuk. Namatay siya pipila ka bulan sa ulahi. Alang kanako, ang paglantaw sa usa ka tawo nga akong gisaligan sa daghang tuig ug unya nagbudhi sa among mga igsoon nagbilin kanakog grabeng kasakit sa emosyon. Apan ang kasinatian naghatag kanakog hinungdanong leksiyon: Si Polishchuk wala magmaunongon kay siya mihunong sa pagbasa ug pagtuo sa Bibliya.

Sa pagkatinuod kinahanglang atong hinumdoman kining leksiyona: Aron kita magpabiling maunongon kang Jehova, kinahanglang kita regular nga magtuon sa Balaang Kasulatan. Ang Bibliya nag-ingon: “Ampingi ang imong kasingkasing, kay niana nagagikan ang mga tuboran sa kinabuhi.” Dugang pa, giingnan ni apostol Pablo ang mga Kristohanon nga magbantay. Ngano? “Kay basin ug may maugmad diha kang bisan kinsa kaninyo nga usa ka tuman-kadaotang kasingkasing nga walay pagtuo pinaagi sa pagpahilayo gikan sa buhi nga Diyos.”​—Proverbio 4:​23; Hebreohanon 3:12.

Balik sa Ukraine

Sa dihang ang among pagkadestiyero sa Siberia natapos sa 1966, si Olga ug ako mipauli sa Ukraine, sa lungsod nga ginganlag Sokal, mga 80 kilometros gikan sa L’viv. Daghan ang angay namong buhaton, sanglit diha lamay 34 ka Saksi sa Sokal ug sa sikbit nga mga lungsod sa Cervonograd ug Sosnivka. Niining dapita karon, adunay 11 ka kongregasyon!

Si Olga namatay nga matinumanon sa 1993. Tulo ka tuig sa ulahi ako naminyo kang Lidiya ug sukad niadto siya dako kaayog tabang kanako. Dugang pa, ang akong anak nga babaye, si Valentina, ug ang iyang pamilya maoy masibotong mga alagad ni Jehova ug nahimo usab nga tinubdan sa pagdasig. Bisan pa niana, ang padayong nakahatag kanakog kinadak-ang kalipay mao nga ako nagpabiling maunongon kang Jehova, ang Diyos nga maunongon.​—2 Samuel 22:26.

Si Alexei Davidjuk namatay nga maunongon kang Jehova sa Pebrero 18, 2000, samtang kining artikuloha giandam pa aron patikon.

[Hulagway sa panid 20]

Ang among kongregasyon nga nagtigom diha sa mga kuwartel sa 1952 sa silangang Siberia

[Hulagway sa panid 23]

Ang among Tunghaan sa Teokratikanhong Ministeryo sa 1953

[Hulagway sa panid 23]

Ang paglubong kang Mykhailo Serdinsky sa 1958

[Hulagway sa panid 24]

Uban sa akong asawa nga si Lidiya