Gikan sa Among mga Magbabasa

Mga Pamilyang Walay Amahan Salamat tungod sa seryeng “Mga Pamilyang Walay Amahan​—Pagpahunong sa Siklo”! (Pebrero 8, 2000) Nayugot ako bahin sa akong diborsiyo sa punto nga buot kong makig-away alang sa bug-os nga pag-atiman sa akong anak nga babaye. Apan ang maong mga artikulo nakapaamgo kanako nga ang akong anak babaye kinahanglang maghupot ug maayong relasyon kutob sa mahimo uban sa iyang amahan. Ang pagpakig-away mahitungod sa pag-atiman dili mao ang kasulbaran.

L. D., Guam

Ingon nga nag-inusarang inahan, ako kanunayng naningkamot sa pagmatuto sa akong anak lalaki sumala sa mga prinsipyo sa Bibliya. Ang akong kanhi-bana mabatbat nimo nga “dili mabination”; wala siyay interes sa iyang anak lalaki. Bisan pag ingon, gitudloan ko ang akong anak lalaki sa paghigugma ug pagtahod sa iyang amahan, sumala sa gisugyot sa inyong artikulo. Makapadasig kaayo ang pagkahibalo nga ako nagabuhat sa hustong butang.

R. S., Brazil

Nagdiborsiyo ang akong mga ginikanan sa dihang singko anyos pa ako. Ang akong amahan wala gayod magpakitag interes sa iyang mga anak. Usahay mobati ako nga mas maayo pa gayod untag wala ko siya hiilhi kay sa makasinati sa iyang pagkadili-matinagdanon. Salamat kang Jehova, gisugdan ko ang pagtuon sa Bibliya uban sa mga Saksi ni Jehova sa sayong edad. Ang pagkahibalo sa mga kamatuoran sa Bibliya nakatabang kanako sa pagsagubang niining mga pagbati sa pagkasinalikway ug kayugot.

C. B., Puerto Rico

Sulod sa duolag pito ka tuig karon, ako nagmatuto ug tulo ka batang lalaki sa akong kaugalingon, ug usahay lisod kini kaayo. Pananglitan, adunay mga panahong ang mga batang lalaki lisod kaayo nga dumalahon. Bisan pa niana, gihigugma ko sila uban sa bug-os kong kasingkasing, ug nagpasalamat ako kang Jehova nga ako silang nabatonan. Ang kinamagulangan karong bag-o nabawtismohan, busa takos kini sa tanang paningkamot. Ang mga artikulong sama niini makadasig kanako sa pagpadayon. Basahon ko kini kanunay.

N. B., Canada

Ang akong amahan mibiya sa dihang sayis anyos pa ako. Karon ako 21 anyos na ug karong bag-o lang nakaamgo sa epekto niini diha kanako. Mahadlok kaayo ako sa kaminyoon tungod kay naghunahuna ako nga ang usa ka lalaki lagmit mosangpot nga magabiya kanako. Gibati ko usab nga ako walay bisan unsa nga ikatanyag sa usa ka lalaki, sanglit wala ako mahibalo kon sa unsang paagi moobra ang regular nga pamilya. Bisan pa niana, kining artikuloha naghupay ug dako kanako. Kini nagpaila kanako nga may adlaw ra nga ako mamahimong usa ka timbang, maunongon, mahigugmaong asawa.

E.V.W., Tinipong Bansa

Mga Suliran sa Panaghigala Daghang panahon nga gusto kong mosulat kaninyo, apan ako wala pa gayod makasulat. Bag-o pa nakong natapos pagbasa ang artikulong “Mga Batan-on Nangutana . . . Nganong Gipasakitan Ko sa Akong Higala?” (Pebrero 22, 2000) May seryoso akong suliran sa usa ka suod nga higala, ug akong nadiskobrehang naghambin akog kasuko kaniya. Kining artikuloha miabot sa hustong panahon.

C. V., Italya

Nasilo ako sa usa sa akong mga higala. Ang artikulo nakatabang nako sa pagsabot nga sanglit kita dili hingpit, makapasilo kita usahay sa usag usa. Gihimo ko ang giingon sa artikulo ug nakighusay sa maong butang kaniya.

N. T., Trinidad

Ako 18 anyos ug adunay duha ka suod nga mga higala. Ang usa mas gulang kaayo kay kanako, ug ang lain maoy duha ka tuig nga mas bata. Aw, ang mas bata ug ako may mga kabingkilan karong bag-o. Kining artikuloha miabot sa hustong panahon. Ang Colosas 3:​13 nagpahinumdom kanato nga si Jehova sa walay pagpanuko magpasaylo kanato sa daghan, daghang higayon ug nga kita sa baylo angayng magpasayloay sa usag usa. Ang kataposang parapo nakatabang sa pagpasabot kanako. Busa ang matag usa kanamo buot nga mahimong usa ka higala nga sama sa gibatbat diha sa Proverbio 18:​24​—“mounong nga labaw pa kay sa usa ka igsoong lalaki” o babaye!

W. C., Tinipong Bansa