Sa Dihang ang Bukid  Misulay sa Pagduyog sa Dagat

SINULAT SA KORESPONSAL SA PAGMATA! SA VENEZUELA

SA TALIWALA sa kaulohang siyudad sa Venezuela, ang Caracas, ug sa dagat nagbarog ang 2,000-metros nga bukid nga ginganlag El Ávila. Sa amihanang kiliran mao ang hiktin, punog-tawong kabaybayonan. Anaa diha ang dakong tugpahanan sa Venezuela, ug aron makaabot sa Caracas gikan sa tugpahanan, ang mga turista kinahanglang mobiyahe agi sa tunel nga molagbas sa bukid.

Human sa pagbunok sa ulan sa miaging Disyembre, ang natuphan ug tubig nga El Ávila dili na makasuhop. Ang mga kiliran niini daw misiak samtang midagayday ang milyonmilyong metro kubikong tubig gikan sa bukid. Sumala sa usa ka tawo, sama kadtog ang bukid misulay sa pagduyog sa dagat. Ang kabalayan​—gikan sa mga payag ngadto sa mga dagkong residensiya​—gilumsan sa binanlas nga tubig, lapok, mga bato, ug mga kahoy. Gipang-anod ang mga katre, mga repridyeretor, mga telebisyon, ug bisan mga tawo. Usa ka lalaking tigulang miingon nga abi niyag kataposan na kadto sa kalibotan.

Sa ngadtongadto, ang ulan mituang, ug misugod pagkahubas ang katubigan sa baha. Sumala sa usa ka banabana, mga 50,000 ka tawo tingali ang namatay, ug 400,000 ang nawad-ag balay. Tungod sa balidong mga katarongan, kadto ginganlang “ang kinagrabehan nga kinaiyanhong katalagman sa kasaysayan sa Venezuela.”

Igo ra Gayong mga Pagkanakaikyas

Sa Disyembre 15, si Juan Carlos Lorenzo ug ang iyang amahan natanggong tali sa duha ka mitubo nga mga suba. Ilang gibiyaan ang ilang sakyanan ug mikuyog sa 35 ka tawo sulod sa usa ka tinukod. Bisan pa niana, sa taudtaod ang tubig misugod pag-agay pasulod ug kusog nga mitubo. Ang tanan nakaarang sa pagsaka sa bubongan. Kasamtangan, ang tinukod gidabodabohan sa dagkong mga bato ug sa mga punoan sa kahoy. Sa wala madugay, ang mga bungbong sa una ug ikaduhang andana naguba, mao nga mga haligi ug bubongan na lamang ang nahibilin. Ang huyang nang estruktura nag-uyog-uyog samtang nagpadayon ang pagdabodabo.

Mitungha ang usa ka helikopter, apan kadto wala makalandig sa huyang nga tinukod. Samtang nagpalayo kadto, si Juan Carlos ug ang iyang amahan  nagluhaluha nga nanamilit sa usag usa, kay kombinsidong kataposan na nila kadto. Unya miabot ang duha ka helikopter. Nga tinagsa, ang tanang didto sa bubongan nadala ngadto sa luwas nga dapit samtang ang mga piloto mahanasong naglupadlupad sa ibabaw. Igo ra gayong mibiya ang mga helikopter, ang tinukod nalumpag ngadto sa naghaguros nga katubigan. Igo ra gayod silang nakaikyas!

Ang libolibong tawo giebakwet​—sakay sa gagmayng mga ayroplano, agi sa karsada, ug pinaagig mga barko sa kasundalohan nga gidisenyo nga makadunggo sa lapyahan. Ang tag-as nga mga linya sa katawhan​—ang pipila nagpas-an sa ilang mga anak​—gigiyahan pinaagig mga pisi latas sa mga balod paingon sa mga barko. Bisan pag ang pipila nakahimo sa pagdalag pipila ka personal nga mga butang, daghan ang namiya uban sa sininang tapot ra sa lawas.

Mga Kalihokan sa Pagtabang

Sa sangang buhatan sa mga Saksi ni Jehova sa Venezuela, nagsugod dayon ang kalihokan sa pagtabang sa pagkadawat sa balita bahin sa katalagman. Bisan pa niana, ang mga karsada napuno sa mga hugaw o sa yano gibanlas. Human sa pipila ka adlaw, gibuksan ang usa ka agianan sa dakong dalan alang sa emerhensiyang paggamit, ug gipaagi ang mga sakyanan sa mga Saksi nga nagdalag medikal nga mga abiyo ug may-katakos nga mga tawo. Usa ka opisyal sa ulahi miingon: “Ang gobyerno nahibalo gayod nga ang mga Saksi ni Jehova nahiapil sa unang moabot nga may tabang ug sa pagkuha sa mga tawo gikan sa maong dapit.”

Ang mga Saksi nag-organisar ug tigpangita nga mga pundok aron makaplagan ang mga nagkinahanglag tabang. Ang mga sakyanan gihikay aron dad-on ang mga nangbakwet ngadto sa Caracas, diin daghan ang nangabot nga walay bisan unsang butang. Gitukod ang mga dapit nga matigoman diha sa siyudad aron ang pagkaon, besti, ug medisina ikaapod-apod ngadto sa mga tawong nagkinahanglan. Apan dili lamang pagkaon ug besti ang gikinahanglan sa kadaghanan kanila. Sila nagkinahanglan ug puy-anan. Ang ilang Kristohanong mga igsoon malipayong nagpapuyo kanila.

Bisan dugay na human sa katalagman, ang katawhan may mga higala ug mga paryente pang kaipon nila sa puy-anan. Si Joel ug Elsa, mga Saksi sa Puerto Cabello, nagpuyo sa gamayng apartment. Usa ka bulan human sa bagyo, may 16 pa ka tawo nga ipon nila sa puy-anan. Daghan ang nawad-an dili lamang sa ilang mga balay kondili sa ilang mga trabaho usab. Yanong nahanaw na ang ilang mga dapit-trabahoanan.

Ikasubo, halos dili na mailhan ang kanhi puliking mga lungsod sa lulinghayaw ug dunggoanan. Ang pipila ka sakyanan nangigdal sa lapok samtang ang uban mitapot sa mga paril, nalikos sa mga poste, o napasok sa mga pultahan o mga bentana. Ang usa ka hut-ong sa migahing lapok​—abot ug tres metros ang giladmon diha sa pipila ka dapit​—nakapataas kaayo sa mga kalye mao nga inig-agi sa usa ka tawo niana, ang iyang mata katupong na sa ibabawng andana o bisan sa mga bubong sa mga tinukod nga iyang giagian!

Ang pipila sa Venezuela mikomento nga ang katalagman nagtudlo kanilag usa ka bililhong leksiyon​—ang dili pagbutang sa ilang pagsalig diha sa materyal nga mga butang. (Lucas 12:​29-31) Ang ubay-ubay nakapabili sa tambag ni Jesu-Kristo: ‘Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot, ug diin ang mga kawatan magalungkab ug magapangawat. Hinunoa, pagtigom kamo ug mga bahandi alang kaninyo sa langit, diin walay tangkob ni taya nga magakutkot, ug diin walay mga kawatan ang magalungkab ug magapangawat. Kay kon hain gani ang imong bahandi, atua usab didto ang imong kasingkasing.’​—Mateo 6:​19-21.

[Mapa/Mga hulagway sa panid 16, 17]

(Alang sa aktuwal nga pagkahan-ay, tan-awa ang publikasyon)

VENEZUELA

Caracas

Dapit nga gibahaan

COLOMBIA

[Hulagway sa panid 17]

Si Rubén Serrano, uban sa nabilin sa iyang balay

 [Mga hulagway sa panid 18]

1. Gitigom sa mga boluntaryo ang mga suplay nga hinabang sa Caracas

2, 3. Gikuha sa Kongregasyon sa Maiquetía ang migahing lapok nga pito ka tiil ang gibag-on gikan sa ilang Kingdom Hall

4. Kining maong mga Saksi nawad-an sa ilang mga balay ug unya miboluntaryo sa pagtukod ug bag-ong mga balay alang sa ilang kaugalingon ug sa uban

5. Usa sa hapit nang mahuman nga mga balay sa San Sebastián de los Reyes