Ang Hunahuna sa Bibliya

Angay Bang Mag-impluwensiya sa Imong Kinabuhi ang “Zodiac”?

“ADUNAY DAGHANG BATAN-ON UG MGA HAMTONG NGA NANGITA UG MGA SIMBOLO SA ILANG DULNGANAN DIHA SA MGA BITUON.”—PAPA JUAN PAULO II.

SUMALA sa usa ka surbi, 1 sa matag 4 ka Amerikano mogamit ug astrolohiya sa paghimog mga desisyon. Ang pagkonsulta sa astrolohikal nga mga simbolo dili lamang limitado sa maong bahin sa kalibotan. Halos sa tibuok kalibotan, ang zodiac gikonsulta alang sa tambag maylabot sa panalapi, mga plano sa pagbiyahe, mga kausaban sa panarbaho, mga petsa sa kasal, ug mga pamaagi sa militar. Gikaingon nga pinaagi sa zodiac nga simbolo sa usa ka tawo mahibaloan kon kinsa ang puwedeng minyoan ug madayag pa gani kon haing mga paris ang dili ikasinabot. Gikan sa Silangan ngadto sa Kasadpan, ang astrolohiya nakakuha sa pagtagad sa minilyon. Apan unsa ang sinugdanan sa zodiac?

Makasaysayanhong Gigikanan

Ang lainlaing dagway sa zodiac masubay ngadto sa labing unang nailhan nga mga sibilisasyon. Bisan ang Bibliya naghisgot “sa mga konstelasyon sa zodiac.” (2 Hari 23:5) Dayag nga ang zodiac gikonsulta sa karaang mga panahon sa mga Hindu maingon man sa mga Insek, mga Ehiptohanon, mga Grego, ug ubang mga tawo. Apan, ang kinaunahang paghisgot sa mga simbolo sa zodiac nakaplagan diha sa karaang Babilonya.

Ang mga Babilonyanhon nag-ugmad sa astrolohiya sa paningkamot nga makabaton ug kasayoran sa umaabot. Sa dihang giobserbahan ang mga paglihok sa mga bituon ug mga planeta, ang detalyadong mga tsart ug mga listahan gihimo. Gikan niana, gitagna ang mga kalihokan sa tawo ug mga panghitabo sa yuta. Sa daghang kaso ang mga desisyon labot sa politika o militar dili himoon hangtod mapatawag ang mga astrologo aron sa paghatag sa ilang tambag. Busa, ang usa ka grupo sa mga pari nga nag-angkong may linaing kaalam ug labaw sa kinaiyanhong gahom nakabaton ug dakong impluwensiya. Sa pagkatinuod, ang tanang dagkong templo sa Babilonya dunay mga lawak alang sa pagpaniid sa kalangitan.

Sa modernong kapanahonan ang mga simbolo sa zodiac nagpadayon sa pagdulag hinungdanong papel sa kinabuhi sa daghang tawo. Bisan kadtong wala moangkong nagtuo sa horoscope sa popanahon mokonsulta niini aron lang malingaw o tungod sa pagkamaukiton. Tinuod nga dunay pipila ka panagna sa mga astrologo nga natuman. Apan kini ba nagkahulogan nga ang pagkonsulta sa mga bituon mapuslanon? Sa tinuoray, unsay pag-isip sa karaang  mga alagad sa Diyos bahin sa interes diha sa astrolohiya?

Natagong Kapeligrohan

Dili sama sa mga Babilonyanhon, ang matinumanong mga Hudiyo wala makigbahin sa astrolohiya​—ug may maayong katarongan. Ang Diyos sa tin-aw nagpasidaan kanila: “Walay makaplagan diha kanimo nga . . . bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova.” *​—Deuteronomio 18:​10-12.

Ang mga alagad sa Diyos kusganong midumili sa astrolohiya. Pananglitan, ang matinumanong Haring Josias “miwagtang . . . niadtong naghimog gipaaso nga halad kang Baal, sa adlaw ug sa bulan ug sa mga konstelasyon sa zodiac.” Ang gibuhat ni Josias maoy “matarong sa mga mata ni Jehova,” ug tungod niana gipanalanginan siya sa Diyos. (2 Hari 22:​2; 23:5) Apan ang pipila tingali mosukna, ‘Dili ba sa labing menos natinuod man ang pipila ka panagna sa mga astrologo?’

Makaiikag, diha sa Kristohanon Gregong Kasulatan, atong mabasa ang bahin sa usa ka babaye nga “naghatagan sa iyang mga agalon ug dakong kinitaan pinaagig paggamit sa pamaagi sa pagpanag-an.” Dayag nga ang pipila sa gipanagna niining babayhana natinuod, kay ang iyang mga agalon nakabenepisyo man tungod sa iyang gahom. Apan unsay nagpaluyo sa katakos niining babayhana sa pagtagna sa umaabot nga mga hitabo? Ang Bibliya nag-ingon nga siya nailalom sa impluwensiya sa ‘usa ka espiritu, usa ka demonyo sa pagpanag-an.’​—Buhat 16:16.

Gipakita sa Bibliya nga “ang tibuok kalibotan nahimutang diha sa gahom sa tuman-kadaotang usa,” si Satanas nga Yawa. (1 Juan 5:19) Pinaagig pagmaniobra sa mga hitabo aron ang tinong mga panagna matinuod, nakuha ni Satanas ug sa mga demonyo ang pagtagad sa minilyong tawo.

Ang yanong kamatuoran mao nga ang astrolohiya maoy usa sa “mga malipatlipatong kaugdahan sa Yawa,” nga iyang gigamit sa pagkontrolar ug pag-impluwensiya sa mga tawo aron buhaton ang iyang gusto. Nan, dili ikatingala nga ang Bibliya nag-awhag sa mga Kristohanon sa ‘pagbarog nga malig-on’ batok sa malansisong mga laraw ni Satanas​—nga naglakip sa astrolohiya. (Efeso 6:11) Apan nagpasabot ba kini nga kita walay makuhang giya alang sa umaabot?

Ang Bibliya​—Usa ka Kasaligang Giya

Minilyon ang nakakaplag sa Bibliya ingong kasaligang giya sa paghimog mga desisyon. Ingon sa pagbatbat niini sa salmistang si David, “ang pahinumdom ni Jehova kasaligan, nga nagahimo nga maalamon sa walay-kasinatian.” (Salmo 19:7; 119:​105) Kini wala magpasabot nga ang Bibliya naglatid sa tanang detalye kon unsay buhaton sa usa ka tawo sa matag kahimtang. Apan ang Pulong sa Diyos naundan sa mga prinsipyo nga makatabang kanato sa pagbansay sa atong kagahom sa pag-ila. Kini, sa baylo, magpaarang kanato sa pag-ila sa husto ug sayop ug motabang kanato sa paghimog maalamong mga desisyon.​—Hebreohanon 5:14.

Busa, adunay maayong katarongan nga ang tinuod nga mga Kristohanon dili mokonsulta sa mga horoscope, bisan pag agig kalingawan lamang o tungod sa pagkamaukiton. Hinunoa, sila maalamong mopatalinghog sa mga pasidaan sa Pulong sa Diyos batok sa tanang demonyohanong impluwensiya, lakip sa dili-klarong mga matang niini. Pinaagi sa pagtugot sa Bibliya inay sa zodiac nga maoy mag-impluwensiya sa imong kinabuhi, maangkon nimo ang panalangin sa Diyos sa walay kataposan.​—Salmo 37:​29, 38.

[Footnote]

[Hulagway sa panid 26]

Silangang zodiac

[Hulagway sa panid 26]

Kasadpang zodiac