Gikan sa Among mga Magbabasa

Ang “Gladiolus” Gusto ko kamong pasalamatan sa artikulong “Ang ‘Gladiolus’​—Usa ka Talagsaong Bulak nga Madanihon ang Katahom.” (Pebrero 22, 2000) Malingaw ako sa dihang may mga membro sa inyong simbahan nga mobisita kanako, bisan tingali nga dili ako mahimong usa kanila. Bisan pa, ang artikulo gisulat sa usa nga aduna gayoy kahibalo sa mga gladiolus. Niining gubot nga kalibotan, ang pagpananom ug gladiolus maoy nindot nga paagi sa pagrelaks ug pagtagamtam ug kalipay sa kinabuhi.

C. M., Tinipong Bansa

Paghikog Ang mga serye nga “Paghikog​—Kinsay Labing Nameligro?” (Pebrero 22, 2000) mihaom gayod sa akong kahimtang. Ang akong inahan kalit nga namatay walo ka bulan na ang milabay. Sa iyang pagkamatay wala diha ang akong amahan busa mibati siyang sad-an. Siya naghisgot nga dili na gustong mabuhi pa. Busa, ang mga artikulo dako kaayog natabang sa akong amahan ug kanako.

R. Z., Alemanya

Ang akong lolo naghikog duha na ka tuig ang milabay. Human sa kamatayon sa iyang asawa, ang iyang panghunahuna nadaot. Ang inyong mga artikulo nakatabang kanako nga masabtan kon nganong iyang gibuhat kadto.

A. M., Tinipong Bansa

Niadtong Enero ang akong 48-anyos nga igsoong lalaki naghikog. Usa ka adlaw human sa iyang lubong, ang akong amahan, nga dili Saksi ni Jehova, nakakaplag niining isyuha sa Pagmata! diha sa among mailbox. Wala siya makatingog ug naghilak samtang iya kining gipakita kanamo. Ang akong pamilya mihilak sa kalipay ug kamapasalamaton tungod niining makapahupayng mga serye.

B. J., Tinipong Bansa

Sa distrito sa among tunghaan, unom ka bata ang naghikog sulod sa miaging tuig. Dako kaayo ang kabalaka mahitungod niini nga ang distrito sa tunghaan nagdeklarar ug mapinadayonong pagbantay batok sa paghikog sulod sa tunghaan. Among gitanyag kining isyuha sa mga dapit diin ang mga tawo kasagarang dili madinawaton sa atong mensahe. Usahay kuhaon dayon sa mga tawo ang mga magasin sa dili pa kami makahuman sa among presentasyon!

C. C., Tinipong Bansa

Sa dihang ako tin-edyer pa, ako misulay paghikog sa makaduha human sa kamatayon sa akong amahan. Ang pulong mismo nga “paghikog” giisip sa pipila nga makauulaw busa dili angay nga hisgotan. Salamat nga inyo kining gibutang sa hapin sa Pagmata! Akong nakaplagan kining mga artikuloha nga prangka, realistiko, ug masinaboton kaayo.

M. G., Pransiya

Mga Suliran sa Panaghigala Ang artikulong “Mga Batan-on Nangutana . . . Nganong Gipasakitan Ko sa Akong Higala?” (Pebrero 22, 2000) nakatabang kanako. Ang kinasuoran nakong higala sulod na sa unom ug tunga ka tuig nakapasakit kaayo kanako. Pinaagi sa pagsunod sa mga sugyot sa inyong artikulo, among giestoryahan sa akong higala ang problema sa kalmado ug malinawong paagi. Ingong resulta, mas suod kami karon kay sukad masukad.

M. L., Tinipong Bansa

Baldadong Magwawali Ang artikulong “Maayog Panglantaw Bisan pa sa mga Sakit” (Pebrero 22, 2000) nakapatandog gayod kanako. Ako batan-on pa, ug may mga panahong ang akong mga suliran daw dili madaog. Ang kaagi ni Konstantin Morozov makapadasig kaayo. Akong gipakabahandi ang iyang mga pulong: “Buot akong magpadayon sa pag-alagad [kang Jehova] samtang ang akong kasingkasing magpadayon pa sa pagpitik.”

L. C., Italya

Aduna koy tulo ka anak, ug tungod kay ang akong bana dili man parehas nako ug tinuohan, kinahanglan ko silang tudloan sa espirituwal nga mga butang. Kinahanglan usab akong motrabaho ug mag-atiman sa balay, ug usahay morag wala na koy kusog nga nahibilin. Ang positibong tinamdan ni Konstantin maoy talagsaon! Salamat sa inyong pagpatik sa iyang kaagi.

O. K., Rusya