‘Kamo Nagapakita ug Gugma Alang sa Tanan’

KINI nga mga pulong sa komendasyon gisulat ngadto sa sangang buhatan sa mga Saksi ni Jehova sa Yugoslavia, usa ka nasod diin ang mga tawo gikan sa nagkalainlaing etnikong kagikan nag-awayay sulod na sa mga siglo. Ang sulat nagkanayon:

“Minahal nga mga Ginoo,

Daghan na kaayo kog nadungog bahin ninyong mga Saksi ni Jehova didto sa akong pinuy-anang lungsod sa Sarajevo, apan wala gayod ako mainteresado sa inyong gituohan hangtod nga nakahigayon ko pagtambong sa inyong kombensiyon sa Alemanya sa miaging ting-init. Nakadayeg kaayo ko sa pagkakita ug mga tawo nga taga-Croatia, Yugoslavia, ug Bosnia nga malinawong nanglingkod nga magkauban ug nagtawganay pag brader ug sister. Wala gayod ako makakita ug sama niana! Ang gugma ninyo sa usag usa naghatag ug lig-ong ebidensiya nga ang politika dili makapabahin kaninyo. Hinaot ang Diyos magapanalangin kaninyo tungod sa gugma nga inyong ginapakita alang sa tanan!”

Ang mga taho nga sama niini nga naggikan sa mga dapit diin ang mga tawo naghambin ug dugay na kaayong pagdumot makapatungha sa pangutanang, Mahitabo ba gayod ang usa ka kalibotan nga walay gubat? Kini ang ulohan sa 32-panid nga brosyur nga nagtaganag kusganong pamatuod nga ang ingon niana nga kalibotan makab-ot. Apan sa unsang paagi? Ug kanus-a?

Makahangyo ka niining brosyura pinaagig pagpil-ap sa nagaubang kupon ug pagpadala niini sa adres nga gipakita sa kupon o sa tukmang adres nga nalista sa panid 5 niining magasina.

□ Interesado ako nga makadawat ug kopya sa brosyur nga Will There Ever Be a World Without War?

□ Palihog kontaka ako mahitungod sa usa ka libreng pagtuon sa Bibliya sa balay.