Usa ka Makapaukyab nga Pagluwas

SINULAT SA KORESPONSAL SA PAGMATA! SA BENIN

“KADTONG tulo ka lalaki nabuhi lamang tungod kay giluwas sila sa mga Saksi ni Jehova!” Kana ang balitang kalit nga mikaylap sa tibuok siyudad sa Calavi sa nasod sa Benin sa Kasadpang Aprika, niadtong Miyerkoles, Abril 19, 2000. Kinsa ang tulo ka lalaki, ug sa unsang paagi nalangkit ang mga Saksi ni Jehova sa pagluwas kanila?

Mga alas 6:​30 s.b., si Philippe Elegbe ug Roger Kounougbe nangandam aron motrabaho sa nataran sa tigomanan sa mga Saksi ni Jehova haduol sa sangang buhatan sa Watch Tower Society sa Benin. Nianang gabhiona ginatos ang magtigom didto alang sa tinuig nga Memoryal sa kamatayon ni Jesu-Kristo. * Sa kalit lang, usa ka makabungog nga paglugapak ang nakatugaw sa malinawong kabuntagon. Dihadiha, si Philippe ug Roger nakaamgo nga may aksidenteng nahitabo sa karsada.

Pipila ka segundo sa ulahi may nadungog silang tawo nga misinggit: “Ang akong tulo ka kauban natabonan ilalom sa mga sako sa semento!” Si Philippe ug Roger midagan paingon sa karsada. Didto ilang nakita ang usa ka 20-toneladang trak dekarga nga natumba. Dinosenang sako nga puno sa semento ang nayabo gikan sa trak.

Si Josué Didolanvi, usa ka trabahante usab sa nataran sa tigomanan, didto na sa dapit nga nahitaboan nga nagbira ug tawo gikan sa tunga sa draybanan sa trak ug sa mga sako sa semento. Ang drayber, nga nakahimo sa paggawas gikan sa draybanan, wala na makalihok tungod sa kalisang. Bisan pa, nakatigom siyag kusog sa pagsinggit: “Aduna pay duha ka tawo ilalom sa mga sako sa semento!” Ang pipila nga nanan-aw misugod pagpanguha sa mga sako, apan wala madugay sila mihunong tungod sa hilabihang kainit. Ang semento mao pa lang diay paggawas gikan sa hurnohan sa tiggama!

Ang Pagluwas

Si Philippe, Roger, ug Josué misugod pagpanguha sa nagtipun-og nga mga sako sa semento, nga tagsatagsa kining gikuha. Ang ilang mga kamot nanakit pag-ayo tungod sa kainit ug kabug-at sa tag-50-kilos nga mga sako. Nagpasamot sa kalisod sa kahimtang mao ang pag-ulbo sa semento gikan sa nabungkag nga mga sako, nga nagpaslot sa ilang mga tudlo ug nagpalisod sa pagginhawa. “Hapdos ang akong mga kamot, ilabina ang akong mga tudlo,” matod ni Josué sa ulahi. “Apan nagsige ko ug hunahuna nga basin may kahigayonan pang maluwas kon kinsa man kadtong natabonan didto.”

Human makuha ang halos 40 ka sako, ang tulo nakakita ug linala nga banig. Sa ilang kahingangha, ilang nakita ang duha ka lalaki didto​—ilalom mismo sa banig. Buhi sila! Sa dihang nahitabo ang aksidente, kining mga tawhana didto sa likod sa trak nga natulog sa banig nga nagtabon sa mga sako sa semento. Sa dihang sila nahulog sa trak, natabonan sila sa banig, nga nagpanalipod kanila gikan sa makapaso nga kainit sa mga sako sa semento nga mitabon kanila.

Sa panahon ug human sa pagluwas, ubay-ubayng tawo ang midugok. Ang tanan nahingangha nga si Philippe, Roger, ug Josué dali ra kaayong nakakuha sa duha ka toneladang nagtipun-og nga mga sako sa semento ug ilalom pa sa lisod kaayong kahimtang. Sila usab nakadayeg niining tulo ka lalaki nga mihimog dako kaayong paningkamot sa pagtabang sa mga tawo nga dili gani nila kaila. Wala madugay ang tanan sa Calavi daw nasayod na bahin sa ilang bayanihong buhat.

[Footnote]

[Hulagway sa panid 31]

Si Roger nga nagkupot sa linala nga banig human sa pagluwas