Ampingi ang Dali-Madaot nga mga Ngipon
Ampingi ang Dali-Madaot nga mga Ngipon
SA UNSANG pangedaron ang imong mga ngipon mosugod sa pagtubo? Ikaw tingali mahibulong sa pagkahibalo nga ang proseso magsugod sa panahon nga didto ka pa sa tagoangkan—lagmit una pa ang imong inahan masayod nga siya nagsabak! Busa hinungdanon alang sa nagsabak nga inahan sa pagkuha ug igong tagana sa mga sustansiya, nga naglakip sa calcium, phosphorus, mga protina, ug mga bitamina.
Unsa na man ang bahin sa mga bag-ong gipanganak? Ang mga eksperto miingon nga ang gibeberon nga mga bata maoy ilabinang dali mataptan ug daot sa ngipon, nga kasagarang magsugod diha sa ibabaw nga mga ngipon sa atubangan. Apan sa unsang paagi kini motungha? Ang pipila ka masuso sagad mahikatulog sa panahong nagsuso sa beberon nga nasudlan ug gatas, juice, sugar water, o soda. Kining makapaaslom nga mga likido adunay carbohydrates nga niana ang bakterya mosanay. Ang bakterya, sa baylo, mopatunghag mga asido nga magdaot sa ngipon sa mga bata—ilabina kon ang mga asido motapot sa mga ngipon sa tibuok gabii. Ang pipila ka bata nga dunay grabeng pagkadaot sa ngipon mahiagom sa ahat nga pagkawala niini, nga makabalda sa pag-ugmad sa ilang permanenteng mga ngipon.
Sa unsang paagi maampingan sa mga ginikanan ang dali-madaot nga mga ngipon sa bata? Ang pagpasuso pinaagi sa gatas sa inahan maoy girekomendar, sanglit kay ang gatas sa inahan luwas gikan sa kagaw ug abunda sa pangontra-sa-kagaw. Apan, kon ang beberon maoy gamiton, ang mga eksperto miingon nga kinahanglang ihunong ang paggamit niini human ang bata makaabot sa 18 ka bulan nga pangedaron. Sila usab kusganong mirekomendar nga gamiton lamang ang beberon alang sa pagpakaon—ug dili sa pag-alam-alam. Dugang pa, kon ang bata pakatulgon nga magtutoy ug beberon, labing maayo kon kini sudlan ug natural nga tubig. Human sa matag pasuso, ang limpiyo, humok nga panapton mahimong gamiton aron sa paglimpiyo sa mga ngipon sa bata.
Ang sayong pagkadaot sa ngipon mahimong masanta. Ang hustong pag-amping sa ngipon—oo, bisan sa masuso—gikinahanglan!