Ang Yuta Usa ka Dapit sa Kinabuhi sa Walay Kataposan

ANG hilabihan ka daghang pondo sa kinabuhi dinhi sa yuta makapahinumdom sa mga pulong sa Salmo 104:​24, 25: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat. Kon bahin nianang dagat nga dako kaayo ug halapad, anaa niana ang dili maihap nga nagalihok nga mga linalang, mga buhing linalang, gagmay ug dagko”​—ug mahimong atong ikadugang, bisan diha sa mga dapit nga lisod puy-an!

Apan, ikasubo, ang pagkaignorante ug kahakog sa tawo nakapuo sa ubang mga matang sa kinabuhi ug ang uban paingon na sa pagkapuo. Ang polusyon maoy usa ka dakong hinungdan. Busa, gitun-an sa ubang mga siyentipiko ang pipila ka organismo nga makaagwanta sa hilo ug init​—sama nianang duol sa mga buho sa ilalom sa dagat ug nianang diha sa mga tuboran nga nagbugwak ug init nga tubig sama nianang sa Yellowstone National Park​—sa tuyo nga magamit ang ilang mga tinagoan aron sa pagwagtang sa mga tighugaw. Kasamtangan, ang ubang mga siyentipiko naningkamot sa pagtugkad pa gayod kon sa unsang paagi nagaobra ang sistema sa pagsustiner ug kinabuhi sa yuta ug unsay pagsanong sa tawo niana nga mga sistema.

Gieksperimentohan nga Sistema sa Pagsustiner ug Kinabuhi

Aron mouswag ang ilang pagsabot sa mga sistema sa pagsustiner ug kinabuhi sa yuta, ang mga siyentipiko nag-eksperimento sa mga tuig 1990 sa Arizona, T.B.A. ug bug-os siradong sistema nga makasustiner ug kinabuhi. Nagdahom nga makasuportar kini sa kaugalingon, gitawag nila kining Biosphere 2 (ang yuta mao ang “Biosphere 1”). Kini gibutangan ug kapin sa 3,000 ka matang sa  buhi nga mga butang, apil sa walo ka tawo. Ang tanan gilain gikan sa kalibotan sa gawas sulod sa duha ka tuig. Apan, ang Biosphere 2 nakabaton ug grabeng mga problema. “Halos tanang langgam ug mga hayop ug mga insekto nga gidahom nga mabuhi diha sa sulod nangamatay​—gawas sa mga uk-ok ug ‘mga hulmigas,’” miingon ang taho, nga midugang nga “ang halangdong ideya alang sa Biosphere 2 nahimong kalataw-anan.” Napasiugda gayod niining wala magsilbi nga eksperimento ang kaalam nga makita diha sa “Biosphere 1”!

Ang Maglalalang Moluwas sa Yuta!

Sa magkadaghan ang atong mahibaloan bahin sa yuta ug sa buhi nga mga katingalahan niini, mas angay unta nga ugmaron nato ang lalom nga pagtahod alang niining dinamiko gayod nga planeta ug sa Maglalalang niini nga walay kinutoban ang kaalam. Sa pagkatinuod, daghang tawo nagpasundayag sa ilang gugma alang sa yuta, tingali pinaagi sa pagpalangkit pag-ayo sa mga problema niini sa kalikopan. Apan, ikasubo, kining mga tawhana nag-atubang ug dili-mabangbang nga mga kababagan, apil ang pagkahakog ug pagkaignorante sa tawo, nga dili mawagtang bisan sa labing halangdong mga tuyo.

Bisan pa niana, ang mga tawo nga tim-os gayod nga nabalaka mahupayan sa saad sa Bibliya nga ang Diyos mismo sa dili madugay molihok pinaagi sa pagwagtang sa tanang hakog, walay-diyos nga mga tawo nga ‘nagalaglag sa yuta.’ (Pinadayag 11:​18; 2 Timoteo 3:​1-5) Human niana, sugdan sa Maglalalang, kansang ngalan mao si Jehova, ang usa ka programa sa rehabilitasyon nga bug-os maghinlo sa yuta ug himoon kining usa ka paraisonhon nga tuboran sa kinabuhi.​—Salmo 83:​18; Isaias 35:​1, 2.

Kini nga pagpasig-uli himoon pinaagi sa Gingharian sa Diyos​—usa ka langitnong kagamhanan diha sa mga kamot ni Kristo Jesus. (Daniel 2:​44; Mateo 6:​9, 10) Ilalom niini nga pagmando, kining planeta nga Yuta mabuhi, kay kini pagaatimanon sa mga tawo nga may kahadlok sa Diyos kinsa malipay sa pagkasoberano ni Jehova ug dunay lalom nga pagtahod sa tanan niyang mga buhat. (Salmo 37:​10, 11; Pinadayag 21:​3, 4) Nganong makaseguro kita nga matuman kining mga saara? Tungod kay ang “dili-makita nga mga hiyas” sa Diyos, ingon sa gipadayag diha sa kalalangan ug sa Bibliya, nagpamatuod nga ‘sa Diyos walay pagpahayag nga imposible.’​—Roma 1:​20; Lucas 1:37.

[Hulagway sa panid 12]

Ang atong yuta sa dili madugay mahimong usa ka paraiso