Gikan sa Among mga Magbabasa

Baldadong Magwawali Dili nako mapugngan ang mga luha sa pagpangatagak sa dihang akong nabasa ang asoy ni Konstantin Morozov diha sa artikulong “Maayog Panglantaw Bisan pa sa mga Sakit.” (Pebrero 22, 2000) Usa ako ka nag-inusarang inahan nga may duha ka anak nga gimatuto. Dili kini sayon, ug usahay morag ang akong mga problema dili na gayod matapos. Apan sa gihapon, kini gamay ra kon itandi sa kon unsay gisagubang ni Konstantin!

I., Rusya

Usa ako ka bug-os-panahong ebanghelisador. Ako nag-antos sa inanay nga pagkadaot sa tawotawo ug nalisdan gayod sa pagbasa. Ako himasa gayod, ug sa popanahon ako mahigawad ug masubo. Sa dihang akong mahunahunaan si Konstantin, akong bation nga kinahanglang dili gayod ako magreklamo. Iyang nabuntog ang samag-bukid nga mga babag ug nag-alagad ingong bug-os-panahong ebanghelisador. Pagkadakong kusog ang gitagana ni Jehova!

W. W., India

Sa edad nga 16, ako naparalisar gikan sa hawak paubos. Sama ni Konstantin, akong naagoman ang mga kalisod sa adlaw-adlaw. Apan, ang artikulo nagpakita nga ang baldado nga tawo makabaton ug luna sa katilingban ug makapakigbahin sa pagsimba sa Diyos. Bisan pag ang akong pandungog hinay kaayo ug hanap ang akong panan-aw, ako kanunayng magsangyaw nga nag-inusara diha sa dalan samtang maglingkod sa usa ka bangkito nga gisandig ang akong likod sa paril. Akong pahalipayan si Konstantin alang sa iyang kasibot ug debosyon.

D. F., Côte d’Ivoire

Pagpangulipon Karon Diha sa makapatandog nga seryeng “Pagpangulipon Karon​—Ang Kataposan Niini Haduol Na!” (Marso 8, 2000), ang pahayag gihimo: “Walay usa nga mahimong matuod nga Kristohanon ug unya makigbahin sa dili-makitawhanong pagpahimulos ug pagdaogdaog kang bisan kinsa sa iyang isigkatawo.” Ngadto sa unsang gidak-on nga ang usa ka Kristohanon kinahanglang maglikay sa pag-amot niining daotan kaayong buhat? Sa Kasadpang kalibotan, halos imposible ang pagkaplag ug mga produkto nga dili gigama ilalom sa kuwestiyonableng mga kahimtang.

K. H., Tinipong Bansa

Ang artikulo naghisgot sa direktang pagpahimulos sa mga tawo pinaagi sa mga tiggama ug uban pa. Wala namo ipasabot nga ang usa ka Kristohanon obligado sa paggugol ug dakong panahon sa pagpanukiduki sa likod sa matag produkto nga iyang paliton. Apan kon nailado nga ang usa ka butang maoy produkto sa ulipong mamumuo, ang usa ka Kristohanon kinahanglang mohimog personal nga desisyon kon kaha mopalit niana o dili. Niini, sama sa tanang butang, ang usa ka Kristohanon buot nga maghupot ug maayong tanlag atubangan sa Diyos. (1 Pedro 3:16)​—ED.

Ako maoy 16-anyos nga dalagita, ug ako natandog sa inyong artikulo. Aduna akoy nahibaloan nga pipila ka dalagita kinsa nag-antos sa pagpangulipon karon. Sila naghago pag-ayo diha sa mga pamilya nga nagpapuyo kanila. Apan wala silay nadawat nga bisan unsang edukasyon​—o pagmahal. Ako nahupayan pag-ayo sa pagbasa sa Bibliya nga si Jehova mopahigawas sa mga dinaogdaog sa dili madugay.

A. O., Burkina Faso

Pagtuo Karong adlawa akong nabasa ang artikulong “Ang Hunahuna sa Bibliya: Tinuod nga Pagtuo​—Unsa ba Kini?” (Marso 8, 2000) Makataronganong gipakita niini nga ang tinuod nga pagtuo dili pagkamatuotuohon. Daghang magasin ang puno sa mga panganunsiyo ug diyutay lamang ug matulon-anon o makapalig-ong mga artikulo. Dili gayod namo angay ibalewala kon unsay inyong gipatik alang kanamo.

E. S., Italya

“Video” nga Noah Kinahanglan gayod nga akong ipahayag ang akong pagpabili alang sa artikulong “Noah​—He Walked With God​—Kon Giunsa Paggama ang Video.” (Marso 8, 2000) Ang among duha-ug-tunga ka tuig nga anak lalaki nagatan-aw sa video sukad nga dili pa siya makamaong molakaw. Iyang gitan-aw kana nga sublisubli ug buot niyang akong i-rewind ang video ngadto sa pipila ka bahin aron iyang matan-aw kini pag-usab. Pagkatalagsaon gayod ang pagbaton ug mga himan nga nagpasilsil ug gugma kang Jehova diha sa among mga anak!

M.V.G., Tinipong Bansa