Ang Hunahuna sa Bibliya

Ang Siyensiya Makahatag ba ug Kinabuhing Walay Kataposan?

MGA tuig kanhi, kining pangutanaha daw binuang gayod. Apan, karon ang pipila ka tawo seryosong naghunahuna sa maong posibilidad. Ang mga siyentipiko nakahimo na sa pagdoble sa gitas-on sa kinabuhi sa mga langaw sa prutas ug mga ulod pinaagi sa paggamit ug mga metodo nga gibati sa uban nga tingali ikapadapat sa mga tawo.

Gipakita sa panukiduki nga mamatay ang normal nga mga selula sa tawo, nga ang pagbahin niini nalimitehan lamang sa pipila ka beses. Human niana kini mohunong sa pagbahin. Kini maoy usa ka proseso nga gitandi ngadto sa pangsulod nga orasan nga mokontrolar kon kanus-a matigulang ug mamatay ang mga tawo. Ang mga siyentipiko nag-eksperimento karon aron ipasibo pag-usab kini nga orasan.

Usa ka popular nga teoriya nag-ingon nga ang kasulbaran sa pagtigulang anaa sa mga tumoy sa matag tuhog sa DNA, usa ka bahin nga gitawag ug telomere. Ang mga telomere gitandi sa plastik nga mga uloulo sa tumoy sa mga liston, nga gidisenyo aron dili mabungkag ang mga liston. Namatikdan sa mga siyentipiko nga matag higayong mabahin ang pipila ka selula, ang mga telomere magkapudpod samag nasunog nga pabilo. Sa ngadtongadto, ang mga telomere daw mapudpod sa punto diin ang mga selula mohunong na sa pagbahin. Apan, tungod sa usa ka enzyme, ang mga telomere dili mapudpod. Busa, sumala sa teoriya, mahimong magpaposible kini sa mga selula nga magpadayon sa pagbahin nga walay takdang panahon. Usa ka opisyal sa usa ka kompaniya nga nalangkit niining buluhatona nag-ingon: “Mao kini ang unang higayon nga kita makahunahuna bahin sa pagkadili-mamatay sa tawo.” Apan dili tanang mga siyentipiko mouyon.

Kon sa Unsang Paagi Mitungha ang Kamatayon

Siyempre, ang mga tawo nga dunay pagtuo sa Bibliya nagtuo sa posibilidad sa kinabuhing walay kataposan alang sa mga tawo sulod na sa daghang milenyo. Ang ilang pagsalig wala diha sa tawhanong mga siyentipiko kondili sa Batid nga Siyentipiko, kinsa naglalang sa tanang buhi nga mga butang, si Jehova nga Diyos.​—Salmo 104:​24, 25.

Gipakita sa Bibliya nga ang kamatayon sa tawo dili bahin sa katuyoan sa Maglalalang. Ang unang tawhanong magtiayon gilalang diha sa dagway sa Diyos ug gibutang diha sa usa ka paraiso nga tanaman. Hingpit sila, nga walay depekto sa hunahuna o sa lawas. Tungod niana, sila may posibilidad nga mabuhi sa walay kataposan dinhi sa yuta. Mao kana ang tinguha sa Diyos alang kanila. Iyang gisugo sila nga manganak ug anam-anam nga pasangkaron ang Paraiso ngadto sa tibuok yuta.​—Genesis 1:​27, 28; 2:​8, 9, 15.

Sumala sa gipakita diha sa Genesis kapitulo 3, si Adan, bisag nasayod nga kamatayon ang silot, tinuyo  nga mirebelde batok sa Diyos. Dugang pa, pinaagi sa pagsubay sa dalan sa pagkadili-matinumanon, iyang gipahinabo ang sala ug kamatayon ngadto sa iyang mga anak nga wala pa matawo. Gisaysay kini ni apostol Pablo niining paagiha: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.” (Roma 5:12) Sa laing pagkasulti, tungod kay nakasala si Adan, ang iyang lawas dili na hingpit. Siya anam-anam nga natigulang ug namatay. Gipanunod sa iyang mga anak kanang depektoha.

Busa ang kamatayon sa tawo mitungha ingong resulta sa pagrebelde ni Adan ug ingong paghukom sa Diyos tungod niana. Ang mga tawo dili magmalamposon sa pag-usab niana nga paghukom. Bisan pag nakahimo ug daghang medikal nga mga pag-uswag ang siyensiya, ang inspiradong mga pulong ni Moises, nga gisulat 3,500 ka tuig kanhi, tinuod gihapon: “Ang mga adlaw sa among panuigon maoy kapitoan ka tuig; ug kon tungod sa talagsaong kabaskog kini maoy kawaloan ka tuig, bisan pa niana ang ilang pagpanlimbasog mosangpot lamang sa kasamok ug sa mga butang nga makapadaot; kay kini molabay sa madali, ug kami mahanaw.”​—Salmo 90:10.

Ang Tagana ni Jehova Alang sa Kinabuhing Walay Kataposan

Ikalipay, dunay paglaom! Bisag sa pagkakaron ang tanang tawo sa ngadtongadto mamatay, dili kabubut-on ni Jehova nga kining kahimtanga magpadayon hangtod sa hangtod. Bisan tuod takos nga mamatay si Adan ug Eva, ang Diyos nahibalo nga daghan sa ilang wala pa mangatawo nga mga anak ang mapasalamatong mosanong unya sa iyang mahigugmaong pag-atiman. Alang nianang mga tawhana siya naghimog tagana alang sa kinabuhing dayon dinhi sa yuta. Ang salmista misulat: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Apan sa unsang paagi kini matuman?

Dili kini mahitabo ingong resulta sa pagkatuki sa mga tawo sa mga misteryo sa DNA. Hinunoa, ang kinabuhing walay kataposan maoy usa ka gasa nga igahatag ni Jehova niadtong magpasundayag ug pagtuo kaniya. Nag-ila nga ang mga anak ni Adan ug Eva kinahanglang luwason, siya nagtagana ug paagi aron sila makabaton ug kinabuhing walay kataposan​—ang halad lukat ni Jesu-Kristo. Si Jesus naghisgot niini nga tagana sa dihang siya miingon: ‘Gihigugma pag-ayo sa Diyos ang kalibotan nga iyang gihatag ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.’​—Juan 3:16.

Sama kang Adan, si Jesus maoy hingpit nga tawo. Dili sama kang Adan, si Jesus bug-os nga nagmatinumanon sa Diyos. Busa nahimo ni Jesus nga ihalad ang iyang hingpit nga tawhanong kinabuhi aron bayran ang sala ni Adan. Pinaagi niining mahigugmaong buhat, nga nagbalanse sa timbangan sa hustisya, ang mga anak ni Adan puwedeng mapahigawas sa pagkahinukman sa kamatayon. Tungod niana, ang tanan nga magpasundayag ug pagtuo kang Jesus makadawat unya sa gasa sa Diyos nga kinabuhing walay kataposan.​—Roma 5:​18, 19; 1 Timoteo 2:​5, 6.

Kon ang mga tawo makaarang sa pagbuntog sa pagkadili-hingpit ug makapahinabog kinabuhing walay kataposan alang sa ilang kaugalingon, wala na untay panginahanglan pa alang sa lukat. Ang Bibliya naghatag niining maalamong tambag: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan. Mogula ang iyang espiritu, mobalik siya sa iyang yuta; nianang adlawa mahanaw ang iyang mga hunahuna. Malipayon siya nga ang Diyos ni Jacob maoy iyang panabang, kansang paglaom anaa kang Jehova nga iyang Diyos, ang Magbubuhat sa langit ug sa yuta, sa dagat, ug sa tanan nga anaa niana, ang Usa nga nagatuman sa kamatinud-anon hangtod sa panahong walay tino.”​—Salmo 146:​3-6.

Mabatonan ang kinabuhing walay kataposan, dili tungod sa siyentipikanhong panukiduki, kondili tungod kang Jehova. Bisag unsay buot sa Diyos nga buhaton, kini iyang mahimo ug pagatumanon. “Sa Diyos walay kapahayagan nga maimposible.”​—Lucas 1:37.

[Picture Credit Line sa panid 18]

© Charles Orrico/SuperStock, Inc.