Asa Nimo Mabatoni ang Labing Maayong Edukasyon?

“Kon unsay matuod sa eskultura alang sa bloke sa marmol, ingon man ang edukasyon alang sa kalag.”​—Joseph Addison, 1711.

NAKAESKUYLA ka ba? Ang kadaghanang tawo makatubag ug oo​—apan dili ang tanan. Sa atong pagsulod sa ika-21ng siglo, ang di-maihap nga minilyong bata wala magdawat ug regular nga instruksiyon diha sa eskuylahan. Kini nahitabo na sa hataas nga panahon, mao nga sa pagkakaron duolan sa usa ka bilyong hingkod nga mga tawo dili makabasa ug makasulat.

Bisan pa niana, usa ka pangunang panginahanglan ang maayong edukasyon. Inay isipon kini nga usa ka maluhong butang nga dili makab-ot, gisabot kini sa daghan karong adlawa nga usa ka katungod sa mga bata ug sa mga tawong hingkod. Apan sa unsang paagi mabatonan ang maayong edukasyon kon wala ang gikinahanglan nga kahinguhaan? Unsa na man kon kulang ang mga libro, kulang ang mga magtutudlo nga may-katakos, ug kulang ang mga eskuylahan?

Sa pagkatinuod, asa ba makabaton ang mga tawo sa maayog-kalidad nga edukasyon nga modasig sa indibiduwal nga pakiglangkit, mopauswag sa ilang kahibalo bahin sa kalibotan alirong nila, ug mohatag kanilag espirituwal nga mga prinsipyo nga makapabag-o sa ilang mga kinabuhi? Unsa ang edukasyon nga mopasiugdag maayong mga sukdanan sa moralidad, mopadayag kon unsaon pagkab-ot ang mas maayong matang sa kinabuhi, ug motaganag may-pasikaranan nga paglaom alang sa umaabot? Mabatonan ba gayod sa tanan ang maong edukasyon?

Pasukaranan sa Labing Maayong Edukasyon

Bisan pag daw katingad-an, masaligong makatubag kitag oo, nga ang usa ka maayog-kalidad nga edukasyon mabatonan sa tanan. Tungod kini kay adunay usa ka epektibong galamiton sa edukasyon nga makahatag ug usa ka pasukaranan niini. Kini ang karaan kaayong “tun-anang basahon” nga mabatonan, sa tibuok o sa bahin, sa kapig 2,200 ka pinulongan sa kalibotan. Ang tanan sa yuta makabaton niini sa pinulongan nga masabtan niya. Unsa ba kining basahona?

Kini mao ang Bibliya, usa ka basahon nga gidayeg sa daghan ingon nga labing bililhong basahon nga nasulat sukad. “Ang matag usa nga adunay mabug-osong kahibalo sa Bibliya matawag gayod nga edukado,” misulat ang eskolar sa sinugdanan sa ika-20ng siglo nga si William Lyon Phelps. “Walay laing kahibalo o kultura, bisan unsa ka dako o kahamili, ang mahimong . . . tukmang kapuli.”

Ang Bibliya maoy koleksiyon sa mga basahon nga nasulat latas sa yugtong mga 1,600 ka tuig. Bahin niining bililhong librarya sa mga basahon, si Phelps midugang: “Ang atong mga ideya, atong kaalam, atong pilosopiya, atong literatura, atong arte, atong mga mithi, labaw nga kinuha gikan sa Bibliya kay sa tanang laing mga basahon nga tingbon. . . . Nagtuo ako nga ang kahibalo sa Bibliya bisag wala ang usa ka kurso sa kolehiyo mas bililhon kay sa usa ka kurso sa kolehiyo nga wala ang Bibliya.”

Karong adlawa ang talagsaon, gipasukad-sa-Bibliya nga edukasyonal nga buluhaton ginahimo sa tibuok kalibotan sa Kristohanong pundok sa mga Saksi ni Jehova. Ang maong edukasyon molabaw pa sa mga paninugdan sa pagbasa ug pagsulat. Motagana kinig mental ug moral nga kaugmaran. Sa positibong paagi, mag-apektar kini sa panglantaw sa mga tawo bahin sa umaabot, nga naghatag sa pasikaranan sa lig-ong paglaom nga ang anaa sa unahan mas maayo pa gayod kay sa nangagi.

Palihog sayra kining programa sa edukasyon alang sa kinabuhi pinaagi sa pagbasa sa mosunod nga artikulo.