Edukasyon Alang sa Kinabuhi

“Ang Bibliya [mao] ang labing maayong giya sa kahanas sa pagkinabuhi.”​—Thomas Tiplady, 1924.

DILI pagpasobra ang pag-ingon nga ang gibase-sa-Bibliyang edukasyon makapabag-o sa mga kinabuhi. Kini nakahatag ug kahulogan ug paglaom niadtong nakasinati sa kahaw-ang ug pagkawalay-paglaom. Usa ka nag-inusarang ginikanan sa nasod sa Namibia misulat ngadto sa sangang buhatan sa mga Saksi ni Jehova sa Habagatang Aprika:

“Ako 29 anyos, ug gibasa ko ang librong Mga Pangutanang Gisukna sa mga Batan-on​—Mga Tubag nga Mosaler sa duha lamang ka adlaw. Kadto dulot nga nakatandog sa akong kasingkasing tungod kay ako mamingawon kaayo. Ang akong trato namatay sa usa ka aksidente sa sakyanan ug gibiyaan ako uban ang duha ka bata. Nag-antos kaayo kami. May panahong ako nakahunahuna nga maayo pang patyon sila ug unya ang akong kaugalingon. Apan sa nabatonan ko kining libroha, ang akong hunahuna nabag-o. Tabangi intawon ako pinaagi sa walay-bayad nga pagtuon sa Bibliya.”

Ang Bibliya maoy giyang-basahon nga makatabang sa mga tawo nga molampos sa matag natad sa kinabuhi​—diha sa mga relasyon uban sa ilang pamilya, ilang mga kauban sa trabaho, ug sa katawhan sa komunidad. (Salmo 19:​7; 2 Timoteo 3:16) Motagana kinig maayong giya bahin sa kon unsaon pagtinguha nga buhaton ang maayo ug likayan ang daotan. Usa kini ka libro nga matinud-anong naghisgot sa kinabuhi. Samtang ginabasa mo kini, hisayran mo nga puno kinig mga asoy bahin sa tinuod nga mga tawo. Imong masabtan kon unsay naghimo sa kinabuhi sa pipila nga malipayon ug magantihon ug sa uban nga magul-anon ug timawa. Mahimong tin-aw alang kanimo kon unsang mga butang ang mapuslanon ug kon unsay dili.

Edukasyon Alang sa Kinabuhi Karon

Ang Bibliya nagpasiugda sa kahinungdanon sa praktikal nga kaalam. Nag-ingon kini: “Ang kaalam mao ang pangunang butang. Batoni ang kaalam.” (Proverbio 4:7) Giila usab niini nga ang mga tawo kasagarang kulang sa kaalam, ug busa kini nagtambag:  “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan.”​—Santiago 1:5.

Sa unsang paagi ang atong Maglalalang, si Jehova nga Diyos, naghatag nga madagayaon sa kaalam? Gihimo niya kana pinaagi sa iyang Pulong, ang Bibliya, nga gidasig niya nga atong basahon. Ang Diyos naghangyo: “Anak ko, kon dawaton mo ang akong mga pulong ug tipigan mo ang akong mga sugo diha kanimo, aron sa paghatag ug pagtagad sa kaalam . . . , nan imong masabtan ang pagkahadlok kang Jehova, ug imong makaplagan ang mismong kahibalo sa Diyos. Kay si Jehova magahatag ug kaalam.” (Proverbio 2:​1, 2, 5, 6) Sa dihang atong ipadapat ang tambag nga hikaplagan sa Pulong sa Diyos ug masabtan kon unsa kini ka praktikal, atong maamgohan nga kini tinuod nga nagpabanaag sa diyosnong kaalam.

Pananglitan, tagda ang bahin sa pagsagubang sa kakabos. Ang Bibliya nagsugyot sa pagkakugihan ug nagpasidaan batok sa mga pangagpas nga mag-usik sa limitadong kinitaan. Busa, ang mga bisyo sama sa pagtabako ug paghinobra sa alkoholikong ilimnon tin-awng supak sa mga prinsipyo sa Bibliya.​—Proverbio 6:​6-11; 10:​26; 23:​19-21; 2 Corinto 7:1.

Unsa man ang bahin sa mahimong epekto sa atong mga kauban diha sa atong kinabuhi? Ang Bibliya nag-ingon: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Proverbio 13:20) Nakapaniid ka ba nga ang pagpit-os sa isigkaingon kasagarang mitultol sa mga tawo​—bata ug tigulang​—ngadto sa paghuboghubog, pag-abuso sa droga, ug imoralidad? Oo, kon kita makig-uban sa mga tawong nagbatasan nianang mga butanga, kita mahisama kanila, sama sa giingon sa Bibliya: ‘Ang daotang pakig-uban makadaot sa mapuslanong pamatasan.’​—1 Corinto 15:33.

Segurado, kitang tanan gustong magmalipayon. Apan sa unsang paagi posible kana? Nahibalo ka ba nga ang Bibliya nag-ingon nga dili gayod ang mga butang ang makapalipay kanato kondili, hinunoa, ang maayong mga tinamdan ug mga relasyon, ilabina ang usa ka maayong relasyon uban sa Diyos? (1 Timoteo 6:​6-10) Si Jesu-Kristo, sa iyang bantogang Wali sa Bukid, miingon nga kadtong tinuod nga malipayon maoy “mahunahunaon sa ilang espirituwal nga panginahanglan,” “malumog-buot,” ‘giuhaw sa pagkamatarong,’ “maluluy-on,” ‘putli sa kasingkasing,’ ug ‘makigdaiton.’​—Mateo 5:​1-9.

Sa dihang imong hinuktokan pag-ayo ang mga pagtulon-an sa Bibliya, imong mapabilhan kon sa unsang paagi kini makatabang sa paggiya sa atong kinabuhi. Ingong usa ka tinubdan sa tambag, ang Bibliya maoy talagsaon. Ang tambag niini kanunayng makaayo​—kini dili gayod teoriya lamang ug dili gayod makadaot kanato. Kadtong magpadapat sa gitambag sa Bibliya sa kanunay makabatog kaayohan.

Edukasyon Alang sa Kinabuhi

Bisan pa niana, dugang sa paghatag kanatog kaayohan karon mismo, ang Bibliya naghatag ug paglaom alang sa kinabuhi sa umaabot. Naghisgot kini bahin sa usa ka dako kaayong paghinlo sa yuta ug sa pag-usob niini ngadto sa usa ka maanindot nga puy-anan alang niadtong nag-alagad sa Diyos. Matikdi kining makapalipay nga asoy bahin sa umaabot: ‘Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang nahanaw na.’​—Pinadayag 21:​3, 4; Proverbio 2:​21, 22.

Hunahunaa lamang: Wala nay masakitong mga bata, wala nay kagutmanan, wala nay gikalisangan nga mga sakit nga mout-ot sa kusog sa lawas, wala nay makapaping-it nga kasakit! Ang mga luha sa kapakyasan, kahiubos, ug kasub-anan mahanaw na, kay ang mga kahimtang nga nagpahinabo nianang mga butanga pagausbon o pagahanawon. Sanglit ang mga tawong tinuyo ang pagkadaotan malaglag na man pinaagi sa mga manulonda sa Diyos, ang mga kawatan, mga mamumuno, mga bakakon, ug uban pa nga naghimo sa kinabuhi nga walay kasegurohan mawala na unya. Ang mga tawo makabaton sa kaugalingon nilang mga balay ug magpahimulos niana uban ang kasegurohan.​—Isaias 25:​8, 9; 33:​24; 65:​17-25.

Maayo bang paminawon kana alang kanimo? Buot ka bang makakat-on ug dugang bahin sa pagpadapat sa mga prinsipyo sa Bibliya aron ikaw makabatog kaayohan karon ug sa umaabot? Kon mao, palihog pagkontak sa mga Saksi ni Jehova, ug sila malipay nga ilakip ka ug ang imong pamilya diha sa ilang tibuok-kalibotang “edukasyon alang sa kinabuhi” nga programa.