Gikan sa Among mga Magbabasa

Huntington’s Disease Kinahanglang ipahayag ko ang akong sinserong mga pasalamat alang sa artikulong “Huntington’s Disease​—Pagsabot sa Usa ka Abnormalidad sa Henetika.” (Marso 22, 2000) Sulod sa 20 ka tuig giatiman ko ang akong bana, kinsa gitakboyan niining sakita. Ang usa ka artikulong sama niini, nga gisulat uban ang pagkamabination ug pagkamasinabtanon, gikahinangpan sa daghan.

N. G., New Zealand

Salamat sa artikulo. Mas yano ang inyong katin-awan kay sa iya sa among doktor. Ang akong inahan nadayagnos nga may Huntington’s disease [HD] mga tulo ka tuig kanhi. Makapasubo kaayo ang pagsud-ong kaniya nga maglisod sa pagsulti, pagkaon, ug paglakaw. Usa ka butang nga wala ninyo hisgoti mao nga ang dugay nang panumdoman daw dili madaot sa mas taas nga panahon kay sa dili pa dugayng panumdoman. Busa ang paghisgot bahin sa karaang mga higala o pagpakitag mga letrato sa usa nga adunay seryosong HD mahimong makatabang ug makalingaw.

J. M., Tinipong Bansa

Ang akong bana nadayagnos nga may Huntington’s disease upat ka tuig kanhi. Mga usa ka tuig ug tunga kanhi, misulat ako ngadto sa mga magpapatik sa Pagmata! ug nangayog tabang bahin niining ulohana. Sa nakita ko kining artikuloha, mitulo ang akong mga luha sa kahupayan ug kalipay.

D. B., Tinipong Bansa

Pagtakod sa Hepatitis Daw adunay usa ka sayop sa Abril 22, 2000, “Pagpaniid sa Kalibotan” nga balitang “Labing Kasagarang Impeksiyon nga Mapasa Pinaagi sa Dugo.” Giingon ninyo nga ang hepatitis C virus [HCV] motakod sa panguna pinaagig seksuwal nga pagkontak o pinaagig natakdang dugo. Sa pagkatinuod, ang pagtakod pinaagig seksuwal nga pagkontak maoy talagsaon ug mahitabo lamang ubos sa tinong mga kahimtang, sama sa panahon sa pagregla.

C. A., Pransiya

Ang mubong balita tingali nakahatag ug sayop nga pagsabot, sanglit ang seksuwal nga pagkontak wala mopatim-aw nga may dakong bahin sa pagtakod sa hepatitis C nga sama ka dako sa iya sa pinaagi-sa-ugat nga paggamit ug droga. Sumala sa “Harvard Health Letter” sa Pebrero 1996, ang mga kapikas sa mga tawong positibo sa HCV may gamay ra o walay risgo. Bisan pa niana, usa ka artikulo sa Agosto 19, 1999, nga isyu sa “The New England Journal of Medicine” mitaho bahin sa pagkaylap sa HCV nga impeksiyon sa Tinipong Bansa gikan sa 1988 hangtod sa 1994: “Ang labing kusganong mga hinungdan nga sa linain nalangkit sa HCV nga impeksiyon maoy ilegal nga paggamit ug droga ug ang dakog-risgong seksuwal nga panggawi.” Nag-ingon usab kini: “Bisan kon ang pagkaylap sa HCV pinaagi sa seksuwal nga buhat tingali hinay, . . . ang daghan sa mga tawong gitakboyan sa populasyon mohatag ug daghang kahigayonan nga maladlad niana taliwala sa mga tawong may daghang seksuwal nga kaparis.”​—ED.

Pagpatusok sa Lawas Salamat sa artikulong “Mga Batan-on Nangutana . . . Komosta ang Bahin sa Pagpatusok sa Lawas?” (Marso 22, 2000) Ako 16 anyos ug naghunahuna sa pila ka panahon bahin sa pagpatusok sa akong lawas. Bisan kon gipangutana ko ang ubay-ubayng tawo bahin sa ilang hunahuna niini, ako wala pay seguradong hukom. Bisan pa niana, ang tin-aw ug matulon-anong artikulo nakatabang kanako sa pag-amgo nga ang pagpatusok sa lawas dili alang kanako, bisan pag popular kaayo kini.

E. C., Inglaterra

Ingong usa ka kanhing mag-aawit sa usa ka bandang punk rock, akong nakaplagan nga ang inyong artikulo bahin sa pagpatusok sa lawas tukma kaayo sa panahon. Pagkakataw-anan nga ang mga tawo nagtinguhang mahimong mga linaing tawo pinaagi sa pagsunod sa kinabag-ohang mga uso!

F. S., Tinipong Bansa

Moralidad Kagahapon gibasa ko ang serye sa mga artikulong “Unsay Nahitabo sa Moral?” (Abril 8, 2000) Pagkatalagsaong pagpadayag sa kamatuoran! Kining seryeha nagpakita gayod kon unsa ka ngil-ad ang sala. Sa prangka gayod, sa wala pa ako mahimong usa sa mga Saksi ni Jehova, ako hilabihan ka imoral nga tawo. Bisan karon ako nagpakigbisog batok sa kusog nga mga pangibog sa unod. Bisan pa niana, tungod sa gugma ug pagkamabination ni Jehova, pagtabang sa mahigugmaong mga ansiyano, pagpaluyo sa akong Kristohanong kaigsoonan, ug mga artikulong sama niini, karon ako nakabentaha na sa akong pakigbisog.

J.C.P., Tinipong Bansa