Ang Hunahuna sa Bibliya

Ang Imong Pagpili ug Medikal nga Pagtambal—Hinungdanon ba Kini?

NAANDAN na kaayo sa mga tawo ang sakit, balatian, ug kadaot. Sa dihang maatubang kining maong mga kaaway sa panglawas, daghan ang mangitag kahupayan pinaagig medikal nga pagtambal. Giila ni Jesu-Kristo ang posibleng kaayohan sa maong mga paningkamot, nga nag-ingong “kadtong mga himsog wala magkinahanglan ug mananambal, kondili kadtong mga masakiton.”​—Lucas 5:31.

Ang magsusulat sa Bibliya nga misulat niining mga pulonga, si Lucas, maoy usa ka mananambal mismo. (Colosas 4:14) Malagmit samtang magkauban sila nga nagbiyahe, si apostol Pablo nakapahimulos sa medikal nga kahanas ni Lucas. Apan ang Kasulatan naghatag ba ug mga giya kon unsang mga matanga sa medikal nga pag-atiman ang dalawaton sa mga Kristohanon? Hinungdanon ba ang imong pagpili ug medikal nga pagtambal?

Kasulatanhong mga Giya

Ang Bibliya makagiya sa usa ka tawo sa paghimog maalamong mga desisyon mahitungod sa medikal nga pagtambal. Pananglitan, tin-aw nga gipakita diha sa Deuteronomio 18:​10-12 nga ang mga buhat sama sa pagpanagna ug madyik “dulumtanan” kang Jehova. Ang “pagbuhat sa espiritismo,” nga batok niana si Pablo nagpasidaan, naglakip nianang gidili nga mga buhat. (Galacia 5:​19-21) Busa, ang tinuod nga mga Kristohanon maglikay sa bisan unsang pamaagi sa pagdayagnos ug terapiya nga dayag nga maglangkit sa espiritismo.

Gipadayag usab sa Bibliya nga bililhon kaayo alang sa Maglalalang ang pagkabalaan sa kinabuhi ug dugo. (Genesis 9:​3, 4) Kay determinado sa pagtuman sa tambag nga ‘padayong mag-ayad sa dugo,’ tutol ang mga Saksi ni Jehova sa medikal nga mga pamaagi nga nagsupak sa sugo sa Bibliya sa pag-ayad sa dugo. (Buhat 15:​28, 29) Wala kini magpasabot nga ilang isalikway ang tanang medikal nga pagtambal. Hinunoa, sila nagtinguha sa labing maayong pag-atiman nga posibleng mabatonan nila ug sa ilang mga anak. Apan mohangyo sila sa propesyonal nga mga tig-atiman sa panglawas  sa pagtaganag pagtambal nga nahiuyon sa ilang relihiyosong mga tinuohan.

Palandonga ang Imong mga Lakang

Si Haring Solomon nagpasidaan nga “si bisan kinsa nga walay kasinatian motuo sa matag pulong, apan ang usa nga maalamon magapalandong sa iyang mga lakang.” (Proverbio 14:15) Bisan pag ang usa ka medikal nga desisyon dili direktang supak sa mga prinsipyo sa Bibliya, ang usa ka tawo kinahanglang ‘mamalandong sa iyang mga lakang.’ Dili tanang matang sa medikal nga pagtambal mapuslanon. Sa dihang si Jesus miingon nga ‘kadtong mga masakiton magkinahanglan ug mananambal,’ siya wala mouyon sa tanang medikal nga mga pagtambal nga mabatonan sa iyang panahon. Nahibalo siya nga ang ubang matang sa medikal nga paagi maayo ug ang uban sayop. *

Karon usab, ang ubang mga pagtambal mahimong dili mapuslanon, panglimbong pa gani. Ang kakulang sa maayong panghukom makaladlad sa usa ka tawo sa wala kinahanglanang mga kapeligrohan. Angay usab ilhon nga ang pagtambal nga mapuslanon alang sa usa ka tawo mahimong dili epektibo​—makadaot pa gani​—sa laing tawo. Sa dihang kinahanglan nga mohimog medikal nga desisyon, ang maalamong tawo magtimbangtimbang pag-ayo sa iyang mga kapilian imbes nga ‘motuo sa matag pulong,’ bisag makadawat ug sugyot gikan sa maayog-tuyo nga mga higala. Siya magpasundayag ug “maayong panghunahuna” pinaagi sa pagpangitag kasaligang impormasyon aron maanaa sa kahimtang nga makahimo ug binase-sa-kahibalo nga pagpili.​—Tito 2:12.

Mahimong Realistikanhon ug Makataronganon

Dili sayop alang sa usa ka tawo nga mabalaka sa iyang panglawas. Ang paghatag ug timbang nga pagtagad sa pisikal nga kahimsog nagpakitag pagpabili sa gasa sa kinabuhi ug sa balaang Tinubdan niini. (Salmo 36:9) Bisag naningkamot sa pagbaton ug nahiangayng medikal nga pagtambal, ang mga Kristohanon buot nga mahimong timbang sa mga butang may kalabotan sa panglawas. Pananglitan, kon ang usa ka himsog nga tawo sobra nga malinga sa panglawas ug kahimsog, magpahinabo kini kaniya nga malimtan “ang mas hinungdanong mga butang.”​—Filipos 1:​10; 2:​3, 4.

Ang usa ka masakiton kaayong babaye sa adlaw ni Jesus “nakagasto na sa tanan niyang kahinguhaan” sa paningkamot nga matambalan sa mga mananambal ang iyang dugay na nga sakit. Unsa ang resulta? Imbes nga maayo, migrabe ang iyang kahimtang, nga nakapahigawad kaayo kaniya. (Marcos 5:​25, 26) Iyang gihimo ang tanan kutob sa iyang maarangan aron makabatog kahupayan, apan wala ra gihapoy epekto. Ang iyang kasinatian nagpasiugda sa limitasyon sa medikal nga siyensiya sa iyang panahon. Bisan karon, bisan pa sa mga pag-uswag sa medikal nga panukiduki ug teknolohiya, daghang tawo ang anaa sa susamang kahimtang. Busa hinungdanon nga dunay realistikanhong panglantaw sa mahimo sa medikal nga siyensiya. Ang hingpit nga panglawas dili maangkon sa pagkakaron. Ang mga Kristohanon nahibalo nga ang panahon sa Diyos alang sa “pagtambal sa kanasoran” maoy sa umaabot pa. (Pinadayag 22:​1, 2) Busa, kinahanglang atong ugmaron ang timbang nga panglantaw sa medikal nga pagtambal.​—Filipos 4:5.

Tin-aw, hinungdanon ang mga pagpili nga atong himoon. Tungod niana, sa diha nga kinahanglang mohimog mga desisyon bahin sa medikal nga pagtambal, ang atong pagpili kinahanglang magpabanaag sa atong tinguha alang sa maayong panglawas ug sa atong tinguha nga mahuptan ang maayong relasyon uban sa Diyos. Sa atong pagbuhat niini, kita masaligon nga makapadayon sa pagpaabot sa katumanan sa saad ni Jehova nga sa mahimayaong bag-ong kalibotan nga moabot, “walay pumoluyo nga moingon: ‘Ako masakiton.’”​—Isaias 33:24.

[Footnote]

[Hulagway sa panid 26]

“The Doctor,” 1891, ni Sir Luke Fildes

[Credit Line]

Tate Gallery, London/Art Resource, NY