Nabilanggo sa Kaminyoon nga Walay Gugma

“Sa usa ka katilingban diin daghan ang nagdiborsiyo, dili lang kay dunay kalagmitan nga ang dili-malipayong mga kaminyoon mosangko sa diborsiyo, kondili dugang pa niana, mas daghang kaminyoon ang lagmit nga mahimong dili malipayon.”—COUNCIL ON FAMILIES IN AMERICA.

GIINGON nga dakong bahin sa kalipay sa kinabuhi ug dakong bahin sa kagul-anan niini naggikan sa mao gihapong tinubdan​—ang kaminyoon sa usa ka tawo. Sa pagkatinuod, pipila lang ka butang sa kinabuhi ang posibleng makahatag ug hilabihang kalipay​—o hilabihang kasubo. Ingon sa gipakita sa nag-ubang kahon, daghang magtiayon ang nakasinati ug dakong kasubo.

Apan ang gidaghanon sa nagdiborsiyo nagpadayag lamang ug usa ka bahin sa suliran. Sa matag usa ka kaminyoon nga malunod, daghang uban pa ang naglutaw gihapon apan nabara sa wala-mag-agos nga katubigan. “Kaniadto malipayon ang among pamilya, apan ang milabayng 12 ka tuig dili gayod makapahimuot,” matod sa usa ka babayeng minyo sulod na sa kapin sa 30 ka tuig. “Ang akong bana walay interes sa akong gibati. Siya gayod ang akong labing bangis nga kaaway sa pagbati.” Sa susama, usa ka bana sulod na sa duolan sa 25 ka tuig nagmulo: “Giingnan ko sa akong asawa nga wala na siya mahigugma kanako. Matod niya kon mahimo kaming magpuyo ingong magkauban na lang sa kuwarto ug mag-iyahay kon bahin sa paglingawlingaw, ang kahimtang maagwanta.”

Aw, ang uban nga makaagom sa maong malisod nga kahimtang magtapos sa ilang kaminyoon. Apan, alang sa daghan ang diborsiyo dili usa ka kapilian. Ngano man? Sumala kang Dr. Karen Kayser, ang mga hinungdan sama sa mga anak, kaulaw sa komunidad, panalapi, mga higala, mga paryente, ug relihiyosong mga tinuohan magpaposible nga magkauban gihapon ang magtiayon, bisan pag wala na mahigugma sa usag usa. “Lagmit dili magdiborsiyo sa legal nga paagi,” matod niya, “kining maong mga kapikas mopili nga magpuyo uban sa usa ka kapikas kang kinsa sila walay pagbati.”

Ang usa ba ka magtiayon kansang relasyon nabugnaw modawat na lang sa usa ka kinabuhi nga walay-katagbawan? Ang kaminyoon ba nga walay gugma mao ang bugtong kapilian gawas sa diborsiyo? Ang kasinatian nagpamatuod nga daghang gubot nga kaminyoon ang mahimong maluwas​—dili lamang gikan sa hilabihang kasakit tungod sa panagbulag kondili usab gikan sa kagul-anan tungod sa pagkahanaw sa gugma.

[Kahon sa panid 3]

DIBORSIYO SA TIBUOK KALIBOTAN

• Australia: Ang gidaghanon sa nagdiborsiyo halos kaupat pil-a sukad sa unang bahin sa katuigang 1960.

• Britanya: Sumala sa mga panagna, 4 sa 10 ka kaminyoon ang mosangko sa diborsiyo.

• Canada ug Hapon: Ang diborsiyo mag-apektar sa mga un-tersiya sa mga kaminyoon.

• Tinipong Bansa: Sukad pa sa 1970, ang purohan nga dili magbulag ang mga minyo mao lamay 50 porsiyento.

• Zimbabwe: Ang diborsiyo magtapos sa mga 2 sa matag 5 ka kaminyoon.