Gikan sa Among mga Magbabasa

Gilubong nga mga Mina Natandog ako sa seryal nga “Gilubong nga mga Mina​—Unsay Arang Mahimo?” (Mayo 8, 2000) Makalilisang gayod nga daghan kaayong inosenteng mga sibilyan ang mangamatay tuig-tuig tungod sa gilubong nga mga mina.

E. U., Pinlandia

Mibati akog kaulaw sa dihang nagbasa ako bahin niining mananapong mga kasangkapan nga gigamit sa mga tawo aron sa pagdaot sa ilang mga isigkatawo. Ang Diyos duna gayoy katarongan sa pagsalga ug sa pagwagtang sa pagkadaotan gikan sa atong yuta.

G. S., Brazil

Kining seryal sa artikulo hinungdanon kaayo, nga nagpaamgo sa publiko bahin sa usa ka dakong isyu. Ang letrato sa hapin nakadani gayod sa pagtagad.

R. H., Tinipong Bansa

Medikal nga Pagtambal nga Walay Dugo Ang artikulong “Mamatay Gyod Ka!” (Mayo 8, 2000) nagpahinumdom kanako sa naagoman sa akong amahan. Sa mga tuig nga milabay naestrok siya samtang nagmaneho ug awto. Ang iyang awto nabalintong, ug sa naulian siya sa panimuot, giingnan siya sa doktor nga kinahanglang abonohan siya ug dugo. Sa dihang midumili ang akong amahan, ang doktor miingon: “Kon dili ka magpaabono, mamatay gyod ka.” Ang akong amahan midumili gihapon. Pagkasunod adlaw ang doktor misulod sa iyang lawak ug nangutana: “Komosta man ka?” Ang akong amahan miingon: “Ania buhi gihapon!” Buhi pa gihapon ang akong amahan ug nag-alagad kang Jehova kutob sa iyang maarangan.

T. M., Tinipong Bansa

Duna akoy talagsaong kanser sa dugo, ug sa dihang kini nadayagnos, giingnan ako sa doktor nga mamatay ako sulod sa unom ka bulan kon dili dayon ako magpaabono ug dugo. Kana nahitabo balik sa 1991. Nakakita ako ug doktor nga nagtahod sa akong pagtuo bahin sa dugo, ug personal nga midesisyon ako sa pagdawat, ilalom sa iyang pagdumala, ug senemanang pag-ineksiyon ug erythropoietin, nga nakatabang sa pagtaas sa gidaghanon sa akong dugo.

E. G., Tinipong Bansa

Nabasa nako ang sugilanon ni Leanne Karlinsky, ug ingong usa ka doktor, nakurat ako sa pagkawalay-puangod sa mga tawo nga wala magbalebale kaniya human sa iyang operasyon [tungod sa iyang pagdumili sa mga pag-abono ug dugo]. Pagkalisod handurawon ang mga tawo nga ingon niini ka sirado ug mga hunahuna!

C. C., Tinipong Bansa

Pagsagubang sa Kawalay-Paglaom Sanglit nag-antos ako sa depresyon, gibasa ko dayon ang artikulong “Ang Hunahuna sa Bibliya: Kon Unsaon Pagsagubang ang Kawalay-Paglaom” (Mayo 8, 2000) sa dihang nadawat nako kini. Sumala sa inyong giingon, ang pagpakigsulti sa usa ka tawo nga mamati nga masinabtanon makapadasig gayod. Buot kong ipahayag ang akong pasalamat sa inyong maayo kaayong mga artikulo.

A. D., Lithuania

Sensitibo sa “Lactose” Miadto ang akong asawa sa iyang doktor tungod kay gibati niya ang grabeng mga simtoma. Ang doktor miingon nga basin sensitibo siya sa lactose. Wala pa gayod ako makadungog niana sukad, busa mapasalamaton kami sa artikulong “Sensitibo Ka ba sa ‘Lactose’?” (Mayo 8, 2000) Kining maayo kaayong impormasyon miabot sa husto gayod nga panahon.

E. P., Tinipong Bansa

Brazil Ang artikulong “Ang Pantanal​—Usa ka Makaiikag nga Dangpanan” (Septiyembre 8, 1999) nakapukaw sa akong kaikag sa pagtan-aw mismo niining bahina sa kalalangan ni Jehova. Busa ako ug ang akong igsoong babaye nagplano sa pag-adto sa Brazil, ug ang artikulong “Ang Talagsaong Kasaysayan sa ‘Yuta sa mga Kalainan’” (Mayo 8, 2000) miabot duha ka semana sa wala pa kami mogikan. Kini nagsilbing usa ka maayo kaayong giya ngadto sa labing maayong mga dapit nga pagaadtoan.

E. V., Inglaterra

Mga Langgam ug mga Priso Natagamtam nako ang kalipay sa pag-atiman​—ug pagbuhi balik ngadto sa kasulopan​—ug ubay-ubayng mga langgam. Ang artikulong “Unsay Ikatudlo sa Langgam sa Usa ka Priso?” (Mayo 8, 2000) makapahinumdom kon sa unsang paagi nga bisan ang gamayng linalang ni Jehova daghan kaayog ikatudlo kanato.

E. D., Tinipong Bansa