Ang Gumonhap Bahin sa mga Goriyon sa Britanya

TINAMPO SA MAGSUSULAT SA PAGMATA! SA BRITANYA

ANG nahadiindiin nga goriyon, uban sa iladong mga piyakpiyak ug mga tuwittuwit, dugay nang naandang talan-awon sa Britanya. Apan kini karon nagakahanaw​—sagad kalit​—gikan sa kasiyudaran, ug walay nahibalo kon ngano. Ang mantalaang Independent sa London nagtanyag ug premyong £5,000 ($7,200) alang sa unang siyentipikanhong sinulat gikan ni bisan kinsa nga makasulbad sa misteryo. Ang Royal Society for the Protection of Birds and the British Trust for Ornithology magsilbing mga maghuhukom. Ang proyekto gidahom nga dangtag labing menos duha ka tuig aron makompleto.

Gipadayag sa mga surbi nga ang mga lungsod ug mga siyudad sa tibuok nasod nakaagom ug dakong pag-us-os sa gidaghanon sa mga goriyon. Sa pipila ka dapit sila bug-os nga nahanaw. Bisan pa niana, ang mga goriyon daghan gihapon sa ubang mga siyudad sa Uropa, sama sa Paris ug Madrid. Si Dr. Denis Summers-Smith, eksperto sa kalibotan bahin sa goriyon, nag-ingon: ‘Kini usa sa labing talagsaong mga misteryo sa ihalas nga kalalangan sa miaging 50 ka tuig.’

Ang 65-porsiyentong pag-us-os sa mga populasyon sa goriyon sa kabalangayan gisabot nga maoy tungod ilabina sa malukopong pagpanguma. Ang ubang mga espisye sa langgam nakaagom ug susamang seryosong mga pag-us-os sa kabalangayan. Apan kini dili mopatin-aw sa 92-porsiyentong pagkawala sa goriyon sa kasiyudaran. Ang espesyalista sa kalikopan nga si Michael McCarthy mihinapos nga ang talagsaong pagkahanaw sa goriyon “maoy usa ka tinong timailhan nga may nahitabong dakong kadaot sa sistema sa ekolohiya sa goriyon​—ug tingali sa atoa usab.” Tan-awonon pa kon unsa ka dako ang kadaot ug kon unsa ka seryoso kini.